GMT+7 14/12/2017 17:11

ກົດໝາຍອຸຕຸນິຍົມ ແລະ ອຸທົກກະສາດ ຖືກຮັບຮອງ ຈາກສະພາແຫ່ງຊາດ

 

 

ກອງປະຊຸມ ສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ XIII ໃນວັນທີ 13 ພະຈິກ 2017 ພາຍໃຕ້ການເປັນປະທານຂອງ ທ່ານ ບຸນປອນ ບຸດຕະນະວົງ ຮອງປະທານ ສະພາແຫ່ງຊາດ, ບັນດາສະມາຊິກ ສະພາແຫ່ງຊາດ ໄດ້ພ້ອມກັນ ປະກອບຄຳຄິດຄຳເຫັນ ແລະ ພິຈາລະນາຮັບຮອງ​ເອົາ ຮ່າງກົດໝາຍວ່າດ້ວຍ ອຸຕຸນິຍົມ ແລະ ອຸທົກກະສາດ, ​ເຊິ່ງ​ເປັນ​ກົດໝາຍ​ສ້າງ​ໃໝ່ ທີ່ສະເໜີ ໂດຍ ທ່ານ ສົມມາດ ພົນເສນາ ລັດຖະມົນຕີ ກະຊວງຊັບພະຍາກອນ ທຳມະຊາດ ແລະ ສິ່ງແວດລ້ອມ, ເຊິ່ງຮ່າງກົດໝາຍດັ່ງກ່າວ ປະກອບມີ 11 ພາກ 6 ໝວດ  71 ມາດຕາ.

 

​​ໂອກາດ​ນີ້, ບັນດາ​ສະມາຊິກ​ສະພາ​ແຫ່ງ​ຊາດ​ ໄດ້​ສຸມ​ໃສ່​ພິຈາລະນາ, ປະກອບ​ຄຳ​ຄິດ​ຄຳ​ເຫັນ ຢ່າງ​ກົງ​ໄປ​ກົງ​ມາ​ ເພື່ອເຮັດໃຫ້ ຮ່າງກົດໝາຍດັ່ງກ່າວ ມີເນື້ອໃນຄົບຖ້ວນສົມບູນ ແລະ ສາມາດນຳໄປຈັດຕັ້ງປະຕິບັດ ໃນຕໍ່ໜ້າໄດ້ຢ່າງມີປະສິດ ທິຜົນ. ​ໂດຍ​ສະ​ເພາະ​ແມ່ນ ​ໄດ້​ເນັ້ນ​ໃສ່ການປັບປຸງ ດ້ານໂຄງສ້າງ, ການ​ເພີ່ມ​ຄຳ​ສັບ, ຄວາມເໝາະສົມໃນການ ກຳນົດນະໂຍບາຍຂອງລັດຖະບານ ຕໍ່ກັບກົດໝາຍວ່າດ້ວຍອຸຕຸນິຍົມ ແລະ ອຸທົກກະສາດ, ການແບ່ງຂັ້ນຄຸ້ມຄອງ ລະຫວ່າງສູນກາງ ແລະ ທ້ອງຖິ່ນ ກ່ຽວກັບການສ້າງສະຖານີອຸຕຸນິຍົມ ແລະ ອຸທົກກະສາດ, ການນິຍາມຄຳສັບ, ການພະຍາກອນອາກາດ, ການເຕືອນໄພລ່ວງໜ້າ, ສິດ ແລະ ໜ້າທີ່ ຂອງອົງການປົກຄອງທ້ອງຖິ່ນ, ການເຂົ້າເຖິງ ແລະ ນຳໃຊ້ຂໍ້ມູນອຸຕຸນິຍົມຢ່າງມີປະສິດທິຜົນວ່ອງໄວ ທັນກັບສະພາບການ ແລະ ບັນຫາສຳຄັນອື່ນໆ ທີ່ກ່ຽວຂ້ອງ.

 

ຜ່ານ​ການ​ປະກອບ​ຄຳ​ຄິດ​ຄຳ​ເຫັນ​ ເປັນ​ເວລາ 1 ວັນ​ເຕັມ, ສະມາຊິກ​ສະ​ພາ​ແຫ່ງ​ຊາດ​ ໄດ້​ພ້ອມ​ກັນ​ຮັບຮອງ​ເອົາ​ ຮ່າງ​ກົດໝາຍວ່າດ້ວຍອຸຕຸນິຍົມ ແລະ ອຸທົກກະສາດ ດ້ວຍ​ຄະ​ແນ​ນສຽງ​ເຫັນ​ດີ ​ເປັນ​ສວນ​ຫລາຍ. ຈາກ​ນັ້ນ, ກອງ​ປະຊຸມ​ໄດ້​ສະ​ເໜີ ​ໃຫ້​ອະນຸ​ກຳມະການ​ຮ່າງ​ກົດໝາຍ ​ນຳ​ເອົາ​ຄຳ​ຄິດ​ຄຳ​ເຫັນ ​ຂອງ​ສະມາຊິກ​ສະພາ​ແຫ່ງ​ຊາດ​ ແຕ່ລະ​ທ່ານ ​ໄປ​ປັງ​ປຸງ​ໃສ່​ຮ່າງ​ກົດໝາຍ​ດັ່ງກ່າວ​ ໃຫ້​ຄົບ​ຖ້ວນ​ສົມບູນ, ກະທັດ​ຮັດ ​ເພື່ອ​ເຮັດ​ໃຫ້​ ກົດໝາຍ​ດັ່ງກ່າວ ​ສາມາ​ດນຳ​ໄປ​ຈັດ​ຕັ້ງ​ປະຕິບັດ​ ຢ່າງ​ມີ​ປະສິດທິ​ຜົນ ​ແລະ ສອດຄ່ອງ​ກັບ​ສະພາບ​ຄວາມ​ເປັນ​ຈິງ​ ໃນ​ປັດຈຸບັນ.

 

 

ຂໍ້ມູນຈາກ: ສຳນັກຂ່າວສານປະເທດລາວ

 

ຄວາມຄິດເຫັນຂອງຜູ້ອ່ານ (0)