GMT+7 14/12/2017 17:09

ຫັດຖະກຳສະພ່າຍ ໄດ້ຮັບຄວາມນິຍົມຈາກລູກຄ້າ

 

 

ກຸ່ມ​ຫັດຖະກຳ​ຕ່ຳຫູກ​ສະ​ພ່າຍ ຕາງໜ້າ​ໃຫ້​ຊາວ​ຊ່າງ​ຫັດຖະກຳ ແຂວງ​ຈຳປາ​ສັກ ນຳ​ເອົາ​ຜະລິດຕະ​ພັນ​ຫັດຖະກຳ​ມາ​ວາງ​ຈຳໜ່າຍ ​ໃນ​ຫ້ອງ​ວາງສະແດງ​ການທ່ອງ​ທ່ຽວຂອງ​ແຂວງ​ຈຳປາ​ສັກ ຢູ່​ໃນ​ງານ​ບຸນ​ນະມັດສະການ​ພະທາດຫຼວງ ປີ 2017 ເຊິ່ງ​ໃນ​ໄລຍະ 3 ວັນທີ່​ຈຳໜ່າຍ​ ແມ່ນ​ໄດ້ຮັບ​ຄວາມ​ນິຍົມ​ຈາກ​ລູກ​ຄ້າ​ທີ່ເຂົ້າ​ມາ​ທ່ຽວ​ຊົມ​ພາຍ​ໃນ​ງານ.

ທ່ານ ພຸດ​ສະຫວັນ ຮອງ​ຫົວໜ້າ​ກຸ່ມ​ຫັດຖະກຳ​ຕ່ຳຫູກ ບ້ານສະ​ພ່າຍ ເມືອງ​ຊະນະ​ສົມບູນ ແຂວງ​ຈຳປາ​ສັກ ໃຫ້​ສຳພາດ​ວ່າ: ຜະລິດ​ຕະ​ພັນ​ທີ່​ນຳ​ມາ​ວາງ​ສະແດງ​ຄັ້ງ​ນີ້ ປະກອບ​ມີ ສິ້ນໄໝ ແລະ ແພ​ເສື້ອ ເຊິ່ງ​ເປັນ​ປີ​ທຳ​ອິດ ໂດຍ​ໄດ້​ເລີ່ມ​ນຳ​ມາ​ຈຳໜ່າຍ​ແຕ່ວັນ​ທີ 28 ຕຸລາ 2017 ແລະ ເຫັນວ່າ​ຜະລິດ​ຕະ​ພັນ​ທີ່​ລູກ​ຄ້າ​ທີ່​ມາທ່ຽວ​ງານ​ບຸນ​ໃຫ້​ຄວາມ​ສົນໃຈຫຼາຍ​ກວ່າ​ໝູ່​ແມ່ນ​ສິ້ນໄໝ.

ສຳລັບ​ກຸ່ມ​ຫັດຖະກຳ​ຕ່ຳຫູກສະ​ພ່າຍ ໄດ້​ສ້າງຕັ້ງ​ມາ​ໄດ້ 5 ປີ ມີ​ສະມາຊິກທັງ​ໝົດ 100 ຄົນ ປະກອບ​ມີ ບ້ານ​ດອນ​ໂຄສະ​ໝັນ ສະ​ຜາຍ ບ້ານ​ເໜືອ ແລະ ບ້ານຍົງ ສຳລັບ​ຜະລິດ​ຕະ​ພັນ​ຫັດຖະກຳ​ທີ່​ຜະລິດ​ປະກອບ​ມີ ຜ້າແພສຳລັບ​ຕັດ​ເສື້ອ ແລະ ເຄື່ອງ​ທີ່ເປັນ​ຂອງຝາກ​ຂອງຕ້ອນ ເຊິ່ງ​ສະມາ​ຊິກ​ພາຍ​ໃນ​ກຸ່ມ​ຄອບຄົວ​ໜຶ່ງ ສາມາດ​ສ້າງ​ລາຍ​ຮັບ​ໄດ້​ເດືອນໜຶ່ງ​ປະມານ 5 ລ້ານ​ກີບ ແລະ ມີຕະຫຼາດ​ຈຳໜ່າຍ​ທົ່ວ​ປະເທດ​ ໃນລາຄາ​ຕ່ຳ​ສຸດ 150.000 ກີບ ແລະ ສູງ​ສຸດ 8 ແສນ​ກີບ ສ່ວນວັດຖຸ​ດິບກໍ່​ຄືໄໝ​ທີ່​ນຳ​ມາ​ຜະລິດ ປະກອບ​ມີ ໄໝ​ມະນີ​ກັດ ຝ້າຍ​ຖຸເລ ແລະ ໄໝ​ຍີ່​ປຸນ ເຊິ່ງ​ຜະລິດຕະ​ພັນ​ທີ່​ໄດ້​ຂາຍ​ດີ​ກວ່າ​ໝູ່​ແມ່ນສິ້ນ​ທີ່​ຜະລິດ​ຈາກ​ໄໝ​ຍີ່​ປຸນ ແລະ ການ​ສ້າງ​ເປັນ​ກຸ່ມ​ຫັດຖະກຳ​ແມ່ນມີ​ສ່ວນ​ດີ ມັນ​ໄດ້​ເຮັດ​ໃຫ້​ປະຊາຊົນ ກໍ່​ຄືເອື້ອຍ​ນ້ອງ​ແມ່ຍິງ​ມີລາຍ​ຮັບ​ທີ່​ແນ່ນອນ ແລະ ມີວຽກ​ເຮັດ​ງານ​ທຳ​ທີ່​ໝັ້ນຄົງ ໂດຍບໍ່​ຕ້ອງ​ໄປ​ເຮັດ​ວຽກ​ຢູ່​ຕ່າງປະເທດ.

 

 

 

ຂໍ້ມູນຈາກ: ວຽງຈັນໃຫມ່

 

ຄວາມຄິດເຫັນຂອງຜູ້ອ່ານ (0)