GMT+7 14/12/2017 17:08

ແຂວງຊຽງຂວາງ ສົ່ງເສີມປະຊາຊົນປູກໄມ້ແປກ ເອົາຢາງເປັນສິນຄ້າ

 

 

ທ່ານ ​ຄຳສີ ຈັນທະ​ວົງ​ສີ ຫົວໜ້າ​ພະ​ແນ​ກ ກະສິກຳ​ ​ແລະ ປ່າ​ໄມ້ ​ແຂວງ​ຊຽງ​ຂວາງ ​ໄດ້​ໃຫ້​ສຳພາດ​ ຕໍ່ນັກ​ຂ່າວ ສຳນັກ​ຂ່າວສານ​ປະ​ເທດ​ລາວ ​ໃນ​ວັນ​ທີ 2 ພະຈິກ 2017 ນີ້ວ່າ: ການ​ຈັດ​ຕັ້ງ​ປະຕິບັດ ​ວຽກ​ງານປູກ, ຟື້ນ​ຟູ, ຄຸ້ມ​ຄອງ​ປ່າ​ແປກ​ ​ແລະ ການປູກ​ຕົ້ນແປກ ​ເພື່ອ​ກີດ​ຢາງ​ເປັນ​ສິນຄ້າ ​ແມ່ນ​ໄດ້​​ເລີ່​ມປູກ ມາ​ແຕ່ ​ປີ 2015 ໃນ 8 ບ້ານ ຢູ່ 4 ​ເມືອງ​ ຄື: ​ເມືອງ​ແປກ, ພູ​ກູດ, ຜາ​ໄຊ ​ແລະ ​ເມືອງ​ຄູນ ​ໃນ​ເນື້ອ​ທີ່ 160 ​ເຮັກຕາ, ​ເຊິ່ງທາງ​ແຂວງ ໄດ້​ອະນຸຍາດ​ໃຫ້ບໍລິສັດ ວູຊົງ (WOSONG) ສປ ຈີນ ​​ເຂົ້າ​ມາ​ປູກ ​ແລະ ກີດ​ຢາງ​ແປກທຳ​ມະ​ຊາດ. ​ປັດຈຸ​ບັນ​ນີ້ ​ໄດ້ປູກ​ຕົ້ນໄມ້​ແປກ​​ແລ້ວ ຈຳນວນ 169.000 ​ເບ້ຍ ​​ໃນ​ເນື້ອ​ທີ່ 141 ​ເຮັກຕາ, ໂດຍ​ແມ່ນບໍລິສັດ​ດັ່ງກ່າວ​ ເປັນ​ຜູ້​ສະໜອງ​ເບ້ຍ​ໄມ້​ແປກ ​ພັນ​ປັບປຸງຈາກ ສປ ຈີນ.

ຢາງ​ແປກ​ທີ່​ກີດ​ໄດ້​ ແມ່ນ​ຈະ​ສົ່ງ​ອອກ​​ໄປ​ປະ​ເທດ​ຈີນ ​ໃນ​ລາຄາ 3.000-5.000 ກີບ​ຕໍ່ກິ​ໂລ ​ໂດຍ​ຢາງ​ແປກ​ດັ່ງກ່າວ ຈະຖືກ​ນຳ​ໄປ​​ຜະລິດເປັນ ຜະລິດຕະພັນ​ຫລາຍ​ກວ່າ 40 ຊະນິດ ເຊັ່ນ: ອຸປະ ກອນ​ຍານ​ອາ​ວະ​ກາດ, ​ເຄື່ອງ​ສຳອາງ, ​ເອ​ເລັກ​ໂທຣນິກ, ອຸປະກອນ​ໄຟຟ້າ, ຢາ​ປົວ​ພະຍາດ​ ​ແລະ ອື່ນໆ. ທົ່ວ​ແຂວງຊຽງ​ຂວາງ ​ມີ​ເນື້ອ​ທີ່​ປ່າ​ແປກ​ທຳ​ມະ​ຊາດ 8.000 ກວ່າ​ເຮັກຕາ ​ແລະ ​ມີເນື້ອ​ທີ່​ດິ​ນ ເພື່ອ​ຮອງ​ຮັບ ​ການ​ປູກ​​ໄມ້ແປກ 366 ​ເຮັກຕາ ​ໃນ 8 ບ້ານ ຂອງ 4 ​ເມືອງ​ດັ່ງກ່າວ. ຢ່າງ​ໃດ​ກໍ​ຕາມ ການ​ອະນຸຍາດ ໃຫ້ບໍລິສັດ ວູຊົງ ​​ເຂົ້າ​ມາ​ປູກ ​ແລະ ກີດ​ຢາງ​ແປກທຳ​ມະ​ຊາດ ​ໃນ​ເທື່ອ​ນີ້ ທາງ​ແຂວງ​ໄດ້​ມີ​ການ​ຊີ້​ນຳ​ຢ່າງ​ໃກ້ຊິດ ​ໃຫ້​ນຳ​ໃຊ້​ເຕັກນິກ​ວິຊາ​ການ ​ໃນ​ການ​ກີດ​ຢາງເພື່ອຮັບປະກັນ ​ໃຫ້​ຕົ້ນ​ແປກ​ມີ​ອາຍຸ​ຍືນ​ບໍ່ຕາຍ​ໄວ ທັງ​ກີດທັງ​ປູກ​ຕົ້ນ​ແປກ​ ເປັນ​ການ​ທົດ​ແທນ. 

ທ່ານ ​ຄຳສີ ຈັນທະ​ວົງ​ສີ ​ໄດ້ໃຫ້ຮູ້ຕື່ມວ່າ: ​ໃນ​ໄລຍະ​ຜ່ານ​ມາທາງ​ແຂວງ ​ ​ໄດ້​ກຳນົດ​ເອົາ​ເຂດ​ປ່າ​ແປກພູ​ບ້າ ​ເພື່ອ​ເປັນ​ບ່ອນ​ທົດ​ລອງ, ສາທິດ, ຝຶກ​ອົບຮົມ, ກີດ​ຢາງ​ແປກ​ໃຫ້​ກັບ​ປະຊາຊົນ ​ເຊິ່ງ​ມີ​ຕົ້ນ​ແປກ​ທີ່ສາມາດ​ກີດ​ຢາງ​ ໄດ້​ທັງ​ໝົດມີ 2.710 ຕົ້ນ. ປັດຈຸ​ບັນ​ ທາງພະ​ແນ​ກກະສິກຳ​ ​ແລະ ປ່າ​ໄມ້ ​ແຂວງ ​ໄດ້​ສົມທົບ​ກັບ​ ອຳນາດ​ການ​ປົກຄອງ​ເມືອງ​ທີ່​ກ່ຽວຂ້ອງ ​​ລົງ​ເຜີຍ​ແຜ່ນະ​ໂຍບາຍ​ ໃຫ້​ແກ່​ປະຊາຊົນ​ ​ຢູ່​ບ້ານ​ລາດ​ງ່ອນ, ນາ​ສົມ, ຄັງ​ໄຂ ​ແລະ ບ້ານ​ນ້ຳ​ເກາະ ກ່ຽວ​ກັບ​ໂຄງການ ​ປູກ​ໄມ້​ແປກ ​ເພື່ອ​ກີດ​ເອົາ​ຢາງ​ເປັນ​ສິນຄ້າ, ຊຸກຍູ້​ໃຫ້​ປະຊາຊົນ​ເຂົ້າ​ໃຈ ຄວາມ​ໝາຍ​ຂອງ​ການ​ພັດທະນາ​ ເສດຖະກິດ​ກະສິກຳ-ປ່າ​ໄມ້ ​ເຊິ່ງ​ຈະ​ສາມາດ​ສ້າງ​ລາຍ​ຮັບ ​ແລະ ສ້າງວຽກ​ເຮັດ​ງານ​ທຳ​ຕື່ມ​ອີກ.

 

 

 

ຂໍ້ມູນຈາກ: ສຳນັກຂ່າວສານປະເທດລາວ

 

ຄວາມຄິດເຫັນຂອງຜູ້ອ່ານ (0)