GMT+7 14/12/2017 17:13

ສືບຕໍ່ອະນຸຮັກຫັດຖະກຳຕ່ຳຫູກ ຄຽງຄູ່ກັບການສ້າງລາຍຮັບໃຫ້ເອື້ອຍນ້ອງແມ່ຍິງ

 

 

ຫັດຖະກຳ​ໄຄ​ສີ ເປັນ​ຫັດຖະກຳໜຶ່ງ​ທີ່​ສືບ​ທອດ​ນຳ​ເອົາ​ພູມ​ປັນຍາຈາກ​ທ້ອງຖິ່ນ ​ຄື​ການ​ຕ່ຳຫູກ​ທໍ​ໄໝ ມາ​ສືບຕໍ່​ປະກອບ​ເປັນ​ອາຊີບ ​ສ້າງຄວາມ​ຍືນ​ຍົງ​ໃຫ້​ຫັດຖະກຳ​ຕ່ຳຫູກ ​ຄຽງ​ຄູ່​ກັບ​ການ​ສົ່ງເສີມ​ໃຫ້​ບັນດາ​ເອື້ອຍ​ນ້ອງ​ແມ່ຍິງ​ສ້າງ​ໄດ້ລາຍ​ຮັບ.

 

ທ່ານ​ນາງ ໄຄ​ສີ ສໍ​ພາບ​ມີ​ໄຊ ເຈົ້າ​ຂອງ​ຫັດຖະກຳ​ໄຄ​ສີ ບ້ານໜອງ​ບົວທອງ ເມືອງ​ສີ​ໂຄດ​ຕະບອງ ນະຄອນຫຼວງ​ວຽງ​ຈັນ ໄດ້ໃຫ້​ສຳພາດ​ໃນ​ງານ​ມະ​ຫະ​ກຳ​ສີມື​ຫັດຖະກຳ​ລາວ ປະຈຳ​ປີ 2017 ວ່າ: ຕ້ອງການ​ອະນຸ​ຮັກ​ຮັກສາການ​ຕ່ຳຫູກ ​ທີ່​ຜູ້​ເປັນ​ແມ່​ໄດ້​ຖ່າຍທອດ​ໃຫ້​ແຕ່​ຕອນ​ເປັນ​ເດັກ​ຈົນເກີດ​ຄວາມ​ມັກ​ຮັກ ແລະ ຄວາມຊ່ຽວຊານ ໂດຍ​ສະເພາະ ການຕ່ຳຫູກ​ໃນ​ຮູບ​ແບບ​ທີ່​ເປັນ​ເອກະລັກ​ຂອງ​ແຂວງ​ຫົວພັນ ຈຶ່ງ​ໄດ້​ຢຶດຖື​ເອົາ​ອາຊີບ​ດັ່ງກ່າວ​ມາ​ເປັນ​ທຸລະ​ກິດ​ຂະໜາດ​ນ້ອຍ​ຂອງ​ຄອບຄົວ ມາ​ຮອດ​ປີ 2003 ຈຶ່ງ​ໄດ້​ເຂົ້າຮ່ວມ​ກຸ່ມ​ສົ່ງເສີມ​ຫັດຖະກຳ ພາຍຫຼັງ​ໄດ້​ເຂົ້າ​ເປັນ​ສະມາຊິກ​ກຸ່ມ​ ທາງ​ກຸ່ມ​ກໍ່​ໄດ້​ເປີດ​ໂອກາດ​ໃຫ້​ຫັດຖະກຳ​ໄຄ​ສີ​ຂອງ​ຂ້າພະເຈົ້າ ​ນຳ​ເອົາເຄື່ອງ​ຫັດຖະກຳ​ໄປ​ວາງສະແດງ ແລະ ຈຳໜ່າຍ​ຢູ່​ຫຼາຍ​ປະເທດ ນັບ​ຈາກ​ນັ້ນ​ມາ​ຈຶ່ງ​ສົ່ງ​ຜົນ​ໃຫ້​ຕະຫຼາດ​ການຈຳໜ່າຍ​ກວ້າງ​ຂຶ້ນ ນອກຈາກ​ນັ້ນ ຕະຫຼາດ​ພາຍ​ໃນ​ກໍ່ໄດ້​ຮັບ​ຄວາມ​ນິຍົມ​ເພີ່ມ​ຂຶ້ນ ປັດ​ຈຸບັນ​ໄດ້​ສົ່ງເສີມ​ເອື້ອຍ​ນ້ອງ​ແມ່ຍິງຕ່ຳຫູກ​ພາຍ​ໃນ​ຮ້ານ ທັງ​ໝົດ 7 ກີ່ ແລະ ຂະຫຍາຍ​ອອກ​ໄປ​ໃຫ້ເອື້ອຍ​ນ້ອງ​ແມ່ຍິງ​ຕ່ຳ​ພາຍ​ໃນຄອບຄົວ​ເຂົາເຈົ້າ ທັງ​ໝົດ 10 ກີ່ ສະເລ່ຍ​ລາຍ​ຮັບ​ທີ່​ເອື້ອຍ​ນ້ອງ​ແມ່ຍິງ​ໄດ້​ຮັບ​ຈາກ​ການ​ຕ່ຳ​ປະມານ 1-3 ລ້ານ​ກີບ​ຕໍ່​ເດືອນ.

 

ສຳລັບ​ວັດຖຸ​ດິບ​ເປັນຕົ້ນ ເສັ້ນຝ້າຍ ໄໝ ແມ່ນ​ໃຊ້​ວັດຖຸ​ດິບ​ພາຍໃນ​ ຜ່ານ​ການ​ຍ້ອມ​ສີ​ທຳ​ມະ​ຊາດ ສ່ວນ​ລວດລາຍ​ທີ່​ເປັນ​ເອກະລັກຂອງ​ຮ້ານ ​ສ່ວນ​ໃຫຍ່​ແມ່ນ​ອອກແບບ​ເປັນ​ລາຍ​ບູຮານ ເຊັ່ນ: ລາຍ​ນາກ ລາຍ​ຜັກກູດ ແລະ ລາຍ​ອື່ນໆ ຜະລິດ​ຕະ​ພັນ​ທີ່​ຜະລິດ​ປະກອບ​ມີ: ສີ້ນ ຜ້າ​ພັນ​ຄໍ ຜ້າຄຸມ​ໄລ່ ຜ້າ​ໂຊ ຜ້າ​ປູ​ໂຕະ ແລະ ຜ້າ​ຕັດ​ເສື້ອ ໃນ​ນັ້ນ ຜະລິດ​ຕະ​ພັນທີ່​ໄດ້​ຮັບ​ຄວາມ​ນິຍົມ​ຈາກ​ລູກ​ຄ້າພາຍ​ໃນ​ແມ່ນ​ຜ້າຄຸມ​ໄລ່ ຫຼື ຜ້າ​ໂຊ ທີ່​ໄດ້​ອອກ​ແບບ​ລວດລາຍ​ທີ່​ສວຍງາມ ​ຜ່ານ​ຂັ້ນ​ຕອນ​ການ​ຕ່ຳ ແລະ ເກັບ​ລາຍ​ທີ່​ລະອຽດ​ອ່ອນເຖິງ 550 ໄມ້ ໃຊ້​ເວລາ​ຕ່ຳ​ປະມານ 2 ເດືອນ​ຈຶ່ງ​ສຳເລັດ ຈຳໜ່າຍ​ໃນລາຄາ 9 ລ້ານ​ກວ່າ​ກີບ​ຕໍ່ 1 ຜືນ ລູກ​ຄ້າ​ສ່ວນ​ໃຫຍ່​ແມ່ນ​ລູກ​ຄ້າພາຍ​ໃນ ແລະ ໄດ້​ຜະລິດ​ຜ້າ​ມັດແອວ​ ສົ່ງ​ໄປ​ປະເທດ​ຍີ່ປຸ່ນ​ຈຳນວນໜຶ່ງ.

 

 

ຂໍ້ມູນຈາກ: ວຽງຈັນໃຫມ່

 

ຄວາມຄິດເຫັນຂອງຜູ້ອ່ານ (0)