GMT+7 14/12/2017 17:10

ໂຈ້ບຸນມີ ເປີດບໍລິການສະຖານີຂົນສົ່ງ ຄ່ຽນຖ່າຍສິນຄ້າສາກົນທີ່ທ່າແຂກ

 

 

ບໍລິສັດ ໂຈ້​ບຸນ​ມີ ກຣຸບ ຂົນສົ່ງ​ສິນຄ້າ​ສາກົນ ໄອ​ຊີ​ດີ (ICD) ຈຳກັດ​ຜູ້​ດຽວ ​ໄດ້​ລົງທຶນ​ພັດທະນາ​ສະຖານີ​ຂົນ​ສົ່ງຄ່ຽນ​ຖ່າຍ​ສິນຄ້າ ແບບ​ມາດຕະຖານ​ຂອງ​ສາກົນ ແລະ ຄົບ​ວົງ​ຈອນ ທີ່​ເຂດ​ເສດຖະ​ກິດ​ສະເພາະ​ທ່າ​ແຂກ ແຂວງຄຳ​ມ່ວນ ດຳເນີນ​ການ​ກໍ່ສ້າງ​ມາແຕ່​ປີ 2015 ດ້ວຍ​ມູນ​ຄ່າ​ການລົງທຶນ​ທັງ​ໝົດ 100 ລ້ານ​ໂດ​ລາສະຫະລັດ ຫຼື ປະມານ 800 ຕື້ກີບ ແລະ ມາ​ຮອດ​ທ້າຍ​ເດືອນຕຸລາ 2017 ໄດ້​ສຳເລັດ​ພ້ອມ​ເປີດນຳ​ໃຊ້​ໃຫ້​ບໍລິການ​ຢ່າງ​ເປັນ​ທາງການ ມີ​ທ່ານ ໂອ​ໄດ ສຸດາ​ພອນ ເຈົ້າແຂວງ​ຄຳ​ມ່ວນ ທ່ານ ອາ​ລຸນ ແກ້ວກິດ​ຕິ​ຄຸນ ລັດຖະມົນຕີ​ປະຈຳ​ສຳນັກງານ​ນາຍົກ​ລັດ​ຖະ​ມົນຕີ ທ່ານ​ນາງ ວິໄລ​ຄຳ ໂພ​ສາລາດ ຮອງ​ລັດຖະມົນຕີ​ກະຊວງໂຍທາ​ທິ​ການ ແລະ ຂົນສົ່ງ ປະທານ​ສະພາ​ບໍລິຫານ​ເຂດ​ເສດ​ຖະກິດ​ສະເພາະ​ທ່າ​ແຂກ ແລະ ພະນັກ​ງານ​ກ່ຽວຂ້ອງ​ເຂົ້າ​ຮ່ວມ.

 

ທ່ານ ສຸກ​ກະເສີມ ເຕໂຊ ທີ່​ປຶກສາ​ບໍລິສັດ ​ໂຈ້​ບຸນ​ມີ​ກຣຸບ ກ່າວວ່າ: ເລີ່ມ​ຕົ້ນ​ແຕ່​ປີ 2015 ບໍລິສັດໄດ້​ນຳ​ໃຊ້​ທຶນ​ສ່ວນ​ຕົວ 100% ພັດທະນາ​ສະຖານີ​ຂົນສົ່ງ​ສິນຄ້າສາກົນ​ແຫ່ງ​ນີ້ ເບື້ອງ​ຕົ້ນ​ຂໍ​ອະນຸຍາດ​ລົງທຶນ 25 ລ້ານ​ໂດ​ລາ ໃນເນື້ອທີ່ 14 ເຮັກຕາ ແຕ່​ດ້ວຍຄວາມ​ພ້ອມ​ທາງ​ດ້ານ​ການ​ເງິນ​ບໍລິສັດ ​ຈຶ່ງ​ຂໍ​ລົງທຶນ​ຕື່ມ​ເປັນ 100 ລ້ານ​ໂດ​ລາ ແລະ ຂໍ​ສຳ​ປະທານເນື້ອທີ່​ດິນ​ຕື່ມ​ອີກ​ເປັນ 45 ເຮັກຕາ ແລະ ກໍ່​ໄດ້​ຮັບ​ການ​ອະນຸຍາດຈາກ​ສະພາ​ບໍລິຫານ​ເຂດ​ເສດ​ຖະກິດ​ສະເພາະ​ທ່າ​ແຂກ ​ໃນ​ວັນ​ທີ 8 ສິງຫາ 2017.

 

ທ່ານ​ນາງ ບຸນ​ມີ ບັງອອນ​ແສງເດດ ປະທານ​ບໍລິສັດ ​ໂຈ້​ບຸນ​ມີກຣຸບ ກ່າວ​ວ່າ: ສະຖານີ​ຂົນສົ່ງສິນຄ້າ​ສາກົນ​ໄອ​ຊີ​ດີ​ມີ​ຄວາມພ້ອມ​ແລ້ວ​ ສຳລັບ​ການ​ໃຫ້​ບໍ​ລິການ​ລະບົບ​ສາງຄ່ຽນ​ຖ່າຍ​ສິນຄ້າ ບ່ອນ​ຈອດ​ລົດ ສະຖານທີ່​ເກັບຮັກສາ ການ​ຫຸ້ມ​ຫໍ່ ແລະ ສົ່ງ​ສິນຄ້າ​ທັງ​ພາຍ​ໃນ ແລະ ຕ່າງ​ປະເທດ ການ​ຍົກຍໍ​ສິນຄ້າ ແລະ ບໍ​ລິການ​ອື່ນໆ​ຄົບ​ວົງ​ຈອນ​ ຕາມ​ຮູບແບບ​ບໍລິການ​ຜ່ານ​ປະຕູ​ດຽວ ແລະ ມີ​ຄວາມ​ວ່ອງໄວ​ທີ່​ສຸດ ຂໍພຽງ​ເຈົ້າ​ໜ້າທີ່​ພາສີ ແລະ ເຈົ້າໜ້າທີ່​ກ່ຽວຂ້ອງ ​ໃຫ້ການ​ຮ່ວມ​ມື​​ທີ່ດີ ຜ່ານ​ມາ​ເຫັນ​ວ່າ​ມີ​ບັນດາ​ບໍ​ລິສັດ​ທັງ​ພາຍ​ໃນ ແລະ ຕ່າງ​ປະເທດ​ແມ່ນ​ໃຫ້​ຄວາມ​ສົນໃຈ​ຈະເຂົ້າ​ມາ​ໃຊ້​ບໍລິການ ແນວໃດ​ກໍ່ຕາມ​ ນີ້​ເປັນ​ການ​ລົງທຶນ​ເບື້ອງ​ຕົ້ນຂອງ​ແຜນການ ແລະ ຍັງ​ຈະ​ລົງທຶນ​ຕື່ມ​ອີກ​ຫຼາຍ 100 ລ້ານ​ໂດ​ລາ ສ້າງ​ທີ່​ພັກ​ໂຮງແຮມ ສິ່ງ​ອຳນວຍຄວາມ​ສະດວກ​ທີ່​ປິ່ນ​ອ້ອມ​ການ​ບໍລິ​ການ​ສະຖານີ​ສົນ​ສົ່ງ​ໄອ​ຊີ​ດີ​ສາກົນ​ທີ່​ທ່າ​ແຂກ ກາຍເປັນ​ບ່ອນສ້າງ​ລາຍ​ຮັບ​ທີ່​ດີ​ໃຫ້​ແກ່​ແຂວງ ແລະ ບໍລິສັດ​ຂອງ​ຕົນ.

 

ທ່ານ ນົງ​ສະຫວັນ ທຳ​ມະ​ວົງ ຮອງ​ປະທານ​ສະພາ​ບໍລິຫານ​ເຂດເສດຖະກິດ​ສະເພາະ ແຂວງ​ຄຳມ່ວນ ກ່າວ​ວ່າ: ບໍລິສັດ ​ໂຈ້​ບຸນ​ມີກຣຸບ ໄດ້​ເຂົ້າ​ມາ​ສຳ​ປະທານ​ເນື້ອທີ່​ດິນ​ລົງທຶນ​ພັດທະນາ​ສະຖານີຂົນສົ່ງ​ສິນຄ້າ​ສາກົນ​ໄອ​ຊີ​ດີ ແລະ ເປັນ​ໄປ​ຕາມ​ແນວທາງ​ຂອງ​ແຜນການ​ເຂດ​ເສດຖະກິດ​ສະເພາະທ່າ​ແຂກ ພັດທະນາ​ໃຫ້​ເປັນ​ສະຖານ​ທີ່​ບໍລິການຮັບ-ສົ່ງຜູ້​ໂດຍສານ ​ສິນຄ້າ ວັດຖຸ​ສິ່ງ​ຂອງ ຫຼື ສັດ ເພື່ອ​ຄຸ້ມ​ຄອງ​ຂະ​ບວນ​ການ​ເຄື່ອນຍ້າຍ​ສິນຄ້າ​ທີ່​ມີ​ການ​ວາງ​ແຜນ ມີ​ການ​ຄວບ​ຄຸມ ການ​ເກັບ​ຮັກສາ ການ​ຫຸ້ມ​ຫໍ່ ການ​ຄ່ຽນ​ຖ່າຍ ການ​ຂົນສົ່ງ ການ​ບໍລິການ ແລະ ການ​ສະໜອງ​ຂໍ້​ມູນ​ຂ່າວສານທີ່​ມີ​ປະ​ສິດທິ​ຜົນ ການ​ລົງທຶນ 100% ແລະ ມະຫາສານ​ຂອງບໍລິສັດ ​ຈະ​ສ້າງ​​ຜົນ​ປະໂຫຍດ​ໃຫ້ແກ່​ຜູ້​ລົງທຶນ ແລະ ລັດ ກໍ່​ຄືແຂວງ​ໃນ​ຮູບ​ແບບ​ລັດ 15% ແລະ ບໍລິສັດ 85% ມີ​ອາຍຸ​ການສຳ​ປະທານ 72 ປີ ແລະ ສາມາດຕໍ່​ໄດ້ 15 ປີ.

 

 

ຂໍ້ມູນຈາກ: ວຽງຈັນໃຫມ່

 

ຄວາມຄິດເຫັນຂອງຜູ້ອ່ານ (0)