GMT+7 14/12/2017 17:11

ຄົນບັນເທີງ ຈູງມືເຂົ້າຮ່ວມເທດສະການຮູບເງົາດີເດັ່ນຂອງຈີນທົ່ວປະເທດລາວ

 

 

ບັນດາຄົນບັນເທີງລາວ ທັງ ອາເລັກຊຣາດາ , ຕ້າ ເອແພັກ ລວມເຖິງຫນຸ່ມອາລົມດີ ຢ່າງເຈ້ຍ ປາຊິຟິກ ແລະບຸກຄົນອື່ນໆ ໄດ້ຮ່ວມພິທີສາຍຮູບເງົາຮອບປະຖົມມະເລີກ “ເທດສະການຮູບເງົາດີເດັ່ນຂອງຈີນທົ່ວປະເທດລາວ” ເມື່ອວັນທີ5 ພະຈິກຜ່ານມາ.

 

ພິທີສາຍຮູບເງົາຮອບປະຖົມມະເລີກ “ເທດສະການຮູບເງົາດີເດັ່ນຂອງຈີນທົ່ວປະເທດລາວ”ທີ່ສະຖານທູດຈີນ,ກະຊວງຖະແຫລງຂ່າວ,ວັດທະນະທໍາແລະ ທ່ອງທ່ຽວລາວຮ່ວມກັນເປັນເຈົ້າພາບ, ແລະຮ່ວມຈັດໂດຍວິທະຍຸສາກົນແຫ່ງ ປະເທດຈີນ CRI ປະຈໍາລາວ ແລະ ກົມຮູບເງົາກະຊວງຖະແຫລງຂ່າວ,ວັດທະນະທໍາແລະ ທ່ອງທ່ຽວລາວ ໄດ້ຈັດຂຶ້ນຢູ່ນະຄອນຫຼວງວຽງຈັນໃນວັນທີ 5 ພະຈິກ 2017 ນີ້, ໂດຍມີທ່ານ ອຸ່ນທວງ ຂາວພັນ ຮອງລັດຖະມົນຕີ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວລາວ, ທ່ານ ຫວາງເວີນທຽນ ເອກອັກຄະລັດຖະທູດ ສປ ຈີນ ປະຈຳ ສປປລາວ, ບັນດາຫົວໜ້າກົມກະຊວງຖະແຫລງຂ່າວ,ວັດທະນະທໍາແລະ ທ່ອງທ່ຽວ, ນັກຮ້ອງນັກສະແດງທີ່ມີຊື່ສຽງຂອງປະເທດລາວ,ຜູ້ຕາງໜ້າມາຈາກພາກສ່ວນທີ່ກ່ຽວຂ້ອງເຂົ້າຮ່ວມ.

 

ທ່ານ ຫວາງເວີນທຽນເອກອັກຄະລັດຖະທູດ ສປ ຈີນ ປະຈຳ ສປປ ລາວ ກ່າວວ່າ, ການພົວພັນລະຫວ່າງສອງປະເທດສໍາຄັນຢູ່ນຳປະຊາຊົນທີ່ມີຄວາມສະໜິດສະໜົມກັນ ແລະເຂົ້າອົກເຂົ້າໃຈເຊິ່ງກັນແລະກັນ. “ເທດສະການຮູບເງົາດີເດັ່ນຂອງຈີນທົ່ວປະເທດລາວ” ໃນຄັ້ງນີ້ເປັນກິດຈະກໍາແລກປ່ຽນວັດທະນະທໍາລະຫວ່າງສອງປະເທດທີ່ມີຄວາມໝາຍສໍາຄັນແລະ ເຊື່ອໝັ້ນວ່າ, ເທດສະການຄັ້ງນີ້ສາມາດເຮັດໃຫ້ການແລກປ່ຽນດ້ານວັດທະນະທໍາ ລະຫວ່າງຈີນແລະລາວມີເນື້ອໃນອຸດົມສົມບູນຂຶ້ນຕື່ມ.

 

ພາຍໃນງານ ໄດ້ສາຍຮູບເງົາດີເດັ່ນຈີນ2 ເລື່ອງຄື: ໝາປ່າພະຈົນໄພ ແລະ ມະເຮັງ...ຂອງຂວັນວັນເກີດຄົບຮອບ29 ປີ. 

 

ນອກຈາກນີ້,ຍັງໄດ້ມີການມອບລາງວັນໃຫ້ຜູ້ຊະນະເລີດຂອງງານປະກວດນັກພາກຮູບເງົາ,ຜູ້ທີ່ໄດ້ຮ່ວມພາກສຽງກັບຜູ້ຊ່ຽວຊານແລະ ສິລະປິນຊື່ດັງຂອງປະເທດລາວ ໃຫ້ຮູບເງົາ 2 ເລື່ອງດັ່ງກ່າວ. ຫລັງຈາກສາຍຮອບປະຖົມມະເລີກແລ້ວ, ຮູບເງົາທັງ 2ເລື່ອງນີ້ຈະສືບຕໍ່ສາຍຢູ່ໂຮງຮູບເງົາ ຊັ້ນ 4 ສູນການຄ້າວຽງຈັນເຊັນເຕີເປັນເວລາ 4 ມື້ ແຕ່່ວັນທີ 8-11 ພະຈິກນີ້, ເວລາ 19:00-21:00 ໂດຍບໍ່ເສຍຄ່າ.

 

“ເທດສະການຮູບເງົາດີເດັ່ນຂອງຈີນທົ່ວປະເທດລາວ”ໃນຄັ້ງນີ້ຈະນໍາເອົາຮູບເງົາດີເດັ່ນຈີນ 2 ເລື່ອງຄື: ໝາປ່າພະຈົນໄພ ແລະ ມະເຮັງ...ຂອງຂວັນວັນເກີດຄົບຮອບ 29 ປີ ສາຍຢູ່ນະຄອນຫລວງວຽງຈັນ ແລະ ອີກ 7 ແຂວງຄື: ແຂວງຊ່ຽງຂວາງ, ຫລວງພະບາງ, ອຸດົມໄຊ, ຫລວງນ້ຳທາ, ຄຳມ່ວນ, ສະຫວັນນະເຂດ ແລະ ແຂວງຈຳປາສັກ ໃນເດືອນພະຈິກຫາເດືອນທັນວາ2017 ນີ້, ເພື່ອໃຫ້ປະຊາຊົນທົ່ວປະເທດລາວໄດ້ຮັບຊົມຮູບເງົາທັງ2 ເລື່ອງນີ້ເຊັ່ນກັນ.

 

 

 

 

ຂໍ້ມູນຈາກ: ລາວອັບເດດ

 

ຄວາມຄິດເຫັນຂອງຜູ້ອ່ານ (0)