GMT+7 14/12/2017 17:13

ເປີດ ບໍລິສັດລິ້ງເຄບປີຕໍລາວ ຈຳກັດ ເພື່ອການສົ່ງອອກສູ່ ຕະຫລາດໂລກ

 

 

ໃນວັນທີ 27 ຕຸລາ ນີ້ ຢູ່ບ້ານ ດົງສ້າງຫິນ ເມືອງໄຊທານີ ນະຄອນຫລວງວຽງຈັນ, ໄດ້ຈັດພິທີເປີດ ບໍລິສັດ ລິ້ງ ເຄບປີຕໍລາວ (Link Capital laos) ຈຳກັດ, ໃຫ້ກຽດເຂົ້າຮ່ວມຂອງ ທ່ານ ລຽນ ທິແກ້ວ ລັດຖະມົນຕີ ກະຊວງກະສິກຳ ແລະ ປ່າໄມ້, ມີທ່ານ ໂດມີນິກ ໂກ ເອກອັກຄະລັດຖະທູດ ສິງກະໂປ ປະຈຳລາວ, ທ່ານ ເດນນີ້ ຊົງ ຜູ້ອຳນວຍການ ບໍລິສັດ ລິ້ງ ເຄປີຕໍລາວ ຈຳກັດ ແລະ ຄູຮ່ວມທຸລະກິດ ທີ່ມາຈາກປະເທດສິງກະໂປ, ຈີນ, ອົດສະຕາລີ, ຍີ່ປຸ່ນ, ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ເດນນີ້ ຊົງ ຜູ້ອຳນວຍການ ບໍລິສັດ ກ່າວວ່າ: ບໍລິສັດ ລິ້ງ ເຄປີຕໍລາວ ໄດ້ຮັບການເຫັນດີ ຈາກລັດຖະບານ 2 ປະເທດ ລາວ ແລະ ສິງກະໂປ ໃຫ້ເປີດໂຮງງານ ທີ່ຜະລິດສິນຄ້າແປຮູບ ຈາກໄມ້ເກດສະໜາທີ່ມີຢູ່ລາວ ເພື່ອສົ່ງອອກສູ່ຕະຫລາດໂລກ, ເປັນຜະລິດຕະພັນຈາກ ສປປ ລາວ, ຊິ່ງການສ້າງໂຮງງານດັ່ງກ່າວ, ຖືວ່າເປັນສິ່ງທ້າທາຍ ແລະ ໜ້າສົນໃຈໃນໄລຍະເວລາ 18 ເດືອນ ສຳລັບການສ້າງຕັ້ງ ແລະ ກຽມຄວາມພ້ອມ ໃນການດຳເນີນທຸລະກິດໃນ ສປປ ລາວ ທີ່ແນ່ໃສ່ໂຄງການໄມ້ເກດສະໜາ ເພື່ອເພີ່ມພູນ ແລະ ເຕີມເຕັມສ່ວນຫລັກ ຂອງທຸລະກິດຂອງພວກເຮົາ ເພື່ອນຳໄປສູ່ ການເພີ່ມຂຶ້ນຂອງ GDP ຂອງສປປ ລາວ ແລະ ເປັນການເສີມສ້າງຄວາມຮ່ວມມື ທາງດ້ານການຄ້າ ລະຫວ່າງ ລັດຖະບານລາວ ແລະ ລັດຖະບານສິງກະໂປ ກໍຄືໃນກຸ່ມປະເທດສະມາຊິກອາຊຽນ. ນອກນີ້, ຍັງເປັນການສ້າງອາຊີບ ແລະ ສ້າງລາຍໄດ້ທີ່ດີຂຶ້ນ ເພື່ອຍົກລະດັບມາດຕະຖານ ແລະ ຄຸນນະພາບການດຳລົງຊີວິດ ຂອງປະຊາຊົນລາວ.

ທ່ານ ລຽນ ທິແກ້ວ ກ່າວວ່າ: ຂ້າພະເຈົ້າ ຕ່າງໜ້າໃຫ້ກະຊວງກະສິກຳ ແລະ ປ່າໄມ້ ກໍຄືໃນນາມລັດຖະບານລາວ ແລະ ຂະແໜງການທີ່ກ່ຽວຂ້ອງ ຂໍສະແດງຄວາມຊົມເຊີຍ ຕໍ່ຄວາມພະຍາຍາມ ໃນການເປີດໂຕ ບໍລິສັດ ລິ້ງ ເຄປີຕໍລາວ ຈຳກັດ. ຂ້າພະເຈົ້າໃນນາມສ່ວນຕົວ ແລະ ໃນນາມກະຊວງ ກະສິກຳ ແລະ ປ່າໄມ້ ຈະອຳນວຍຄວາມສະດວກ ໃຫ້ແກ່ການເຄື່ອນໄຫວ ຂອງບໍລິສັດດັ່ງກ່າວ, ເພື່ອໃຫ້ບັນລຸຕາມເປົ້າໝາຍ ທີ່ບໍລິສັດວາງໄວ້.

 

 

ຂໍ້ມູນຈາກ: ສຳນັກຂ່າວສານປະເທດລາວ

 

ຄວາມຄິດເຫັນຂອງຜູ້ອ່ານ (0)