GMT+7 14/12/2017 17:08

ໜັງສືພິມເສດຖະກິດການຄ້າ ເຊັນສັນຍາຮ່ວມມື ແລກປ່ຽນຂໍ້ມູນຂ່າວສານຮ່ວມກັນ

 

 

ໜັງສືພິມເສດຖະກິດການຄ້າ ຮ່ວມກັບສໍານັກຂ່າວສານປະເທດລາວ ແລະ ວິທະຍຸກະຈາຍ ສຽງແຫ່ງຊາດ ເພື່ອຍົກຖານະບົດບາດ ແລະ ດ້ານຂໍ້ມູນຂ່າວສານ-ວິຊາການ ໃນຍຸກໂລກາພິວັດ. 3 ຝ່າຍໃຫ້ຄໍາໝັ້ນສັນຍາ ພ້ອມສະໜອງຂໍ້ມູນ ຂ່າວສານ ແລະ ນໍາສະເໜີເນື້ອໃນສາລະໜ້າຮູ້ ທີ່ເປັນປະໂຫຍດຕໍ່ສັງຄົມ.


ພີທີເຊັນສັນຍາຮ່ວມມື 3 ຝ່າຍ ຢ່າງເປັນທາງການ ໄດ້ມີຂຶ້ນໃນວັນທີ 19 ຕຸລາ 2017 ທີ່ສໍານັກງານໜັງສືພີມເສດຖະກິດການຄ້າ ນະຄອນຫລວງວຽງຈັນ, ຮ່ວມເຊັນໂດຍມີ ທ່ານ ຄໍາຂັນ ນະພາວົງ ຫົວໜ້າຄະນະບັນນາທິການໜັງສືພີມ ເສດຖະກິດການຄ້າ, ທ່ານ ສູນທອນ ຄັນທະວົງ ອໍານວຍການໃຫຍ່ສໍານັກຂ່າວສານປະເທດລາວ ແລະ ທ່ານ ໂພສີ ແກ້ວມະນີວົງ ອໍານວຍໃຫຍ່ວິທະຍຸ ກະຈາຍສຽງແຫ່ງຊາດ. ເຂົ້າຮ່ວມເປັນສັກຂີພິຍານມີ ທ່ານ ສິລິສໍາພັນ ວໍລະຈິດ ຫົວໜ້າກົມແຜນການ ແລະ ການຮ່ວມມື ກະຊວງອຸດສາຫະກໍາ ແລະ ການຄ້າ, ທ່ານ ປິ່ນປາດຖະໜາ ພັນທະມາລີ ຫົວໜ້າກົມສື່ມວນຊົນ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ.


ຈຸດປະສົງການຮ່ວມມືກັນໃນຄັ້ງນີ້, ໂດຍເລັ່ງໃສ່ 3 ວຽກໃຫຍ່ ຄື: ການສະໜອງຂໍ້ມູນຂ່າວສານ, ພັດທະນາດ້ານບຸກຄະລາກອນ ແລະ ການແລກປ່ຽນບົດຮຽນດ້ານວິຊາການ. ທັງນີ້, ກໍເພື່ອຮັບປະກັນ ຄວາມພ້ອມ ໃນການຈັດຕັ້ງປະຕິບັດ ໃຫ້ເປັນຮູບປະທໍາຫລາຍຂຶ້ນ. ນັບແຕ່ປີ 2016 ເປັນຕົ້ນມາ, ໜັງສືພີມເສດຖະກິດການຄ້າ ໄດ້ພົວພັນ ແລະ ຮ່ວມມືກັບຫລາຍພາກສ່ວນ ໃນຂະແໜງການ ສື່ມວນຊົນທັງພາຍໃນ ແລະ ຕ່າງປະເທດ ໂດຍສະເພາະ ສສ ຫວຽດນາມ ແລະ ຄາດວ່າຈະສືບຕໍ່ຂະຫຍາຍການຮ່ວມມື ກັບພາກສ່ວນຕ່າງໆ ໃຫ້ກວ້າງຂວາງຍິ່ງຂຶ້ນ ເພື່ອຮອງຮັບການເຊື່ອມໂຍງ ໃນພາກພື້ນ ແລະ ສາກົນ.

 
ໜັງສືພີມເສດຖະກິດການຄ້າ ພາຍໃຕ້ການສະໜັບສະໜູນ ຂອງກຸ່ມບໍລິສັດໂຄລາວ ປັດຈຸບັນສາ ມາດຈໍາໜ່າຍ ແລະ ແຈກຢາຍທົ່ວທຸກແຂວງ, ພ້ອມວາງແຜນຈະຂະຫຍາຍ ການແຈກຢາຍເຂົ້າເຖິງທຸກ ເມືອງ ທົ່ວປະເທດ ໃນປີ 2018.

 

 

ຂໍ້ມູນຈາກ: ສຳນັກຂ່າວສານປະເທດລາວ

 

ຄວາມຄິດເຫັນຂອງຜູ້ອ່ານ (0)