GMT+7 14/12/2017 17:12

ຫັດຖະກຳເຜົ່າກະຕູ ສ້າງລາຍຮັບໄດ້ເຖິງປີລະ 30 ລ້ານກວ່າກີບ

 

 

ທ່ານ​ນາງ ຈັນ ຊາວ​ຊ່າງ​ຫັດຖະ​ກຳ​ເຜົ່າ​ກະ​ຕູ ບ້ານ​ຫ້ວຍ​ຮຸນ​ໃຕ້ ເມືອງ​ເລົ່າ​ງາມ ແຂວງ​ສາລະ​ວັນ ໄດ້​ໃຫ້​ສຳພາດ​ເນື່ອງ​ໃນ​ໂອກາດມາ​ເຂົ້າ​ຮ່ວມ​ວາງສະແດງ ແລະ ຈຳໜ່າຍ​ສິນຄ້າ​ໃນ​ງານ​ຫັດຖະກຳ​ລາວ ປະຈຳ​ປີ 2017 ວ່າ: ໄດ້ມີ​ໂອກາດ​ນຳ​ເອົາ​ເຄື່ອງ​ຫັດຖະກຳ​ຂອງ​ຊົນເຜົ່າ​ກະ​ຕູ​ມາ​ວາງ​ສະແດງ ແລະ ຈຳໜ່າຍ​ໃນ​ງານ​ດັ່ງກ່າວ​ມາ​ໄດ້ 9 ປີ ສຳລັບ​ປີ​ຜ່ານມາ​ ສາມາດ​ຈຳໜ່າຍ​ສິນຄ້າ​ໄດ້ 60 ລ້ານ​ກີບ ສ່ວນ​ປີ​ນີ້​ພາຍຫຼັງຈຳໜ່າຍ​ມາ​ໄດ້ 3 ວັນ ໄດ້ 27 ລ້ານ​ກວ່າ​ກີບ ແລະ ນອກຈາກມາ​ຈຳໜ່າຍ​ແລ້ວ ແມ່ນ​ໄດ້​ນຳເອົາ​ກີ່​ຕ່ຳຫູກ​ທີ່​ເປັນ​ເອກະລັກຂອງ​ຊົນເຜົ່າ​ກະ​ຕູ​ມາ​ສາທິດ​ໃຫ້ກັບ​ມວນ​ຊົນ​ໄດ້​ເຫັນ ເພາະ​ກີ່​ຕ່ຳຫູກ​ຂອງ​ຊົນເຜົ່າ​ກະ​ຕູ​ເປັນ​ກີ່​ນ້ອຍ ກະທັດ​ຮັດ​ ໂດຍ​ເວລາ​ຕ່ຳ​ຕ້ອງ​ໄດ້ນຳ​ມາ​ຜູກ​ໃສ່​ແອວ​ຜູ້​ຕ່ຳ ຫຼັງ​ຈາກນັ້ນ ຈຶ່ງ​ສາມາດ​ລົງມື​ຕ່ຳ ການຫັນ​ມາ​ເຮັດ​ຫັດຖະກຳ​ນີ້ ເລີ່ມ​ແຕ່ປີ 1989 ເປັນຕົ້ນ​ມາ ປັດຈຸບັນ​ໄດ້ເອື້ອຍ​ນ້ອງ​ແມ່ຍິງ​ພາຍ​ໃນ​ບ້ານຕ່ຳ ​ໂດຍ​ໄດ້​ສ້າງຕັ້ງ​ເປັນ​ກຸ່ມ​ຫັດຖະ​ກຳ​ເຜົ່າ​ກະ​ຕູ ລວມ​ທັງ​ໝົດ 38 ຄອບຄົວ.

 

ສຳລັບ​ວັດຖຸ​ດິບ​ທີ່​ນຳ​ມາ​ຕ່ຳ ແມ່ນ​ໄດ້​ມາ​ຈາກ​ພັນ​ໄມ້​ທຳ​ມະຊາດ ເປັນຕົ້ນ ໄມ້​ດູ່ແກ່ນ​ມະ​ໝີ້ ຄັງ​ກົກ​ຫອມ ແລະ ໝໍ​ນິນ​ນຳ​ມາ ປະສົມ​ເຂົ້າກັນ​ເອົາ​ມາ​ອົບ ແລ້ວນຳ​ມາ​ຕົ້ມ ຫຼັງ​ຈາກ​ນັ້ນ ຈຶ່ງ​ນຳມາ​ຍ້ອມ​ດ້ວຍ​ສີ​ທຳ​ມະ​ຊາດ​ດ້ວຍເປືອກ​ໄມ້ ເຊັ່ນ: ເຄືອ​ມັນຕົ້ນ ມັນດ້າງ ຫຼັງ​ຈາກ​ນັ້ນ ກໍ່​ເຂັນ​ອອກ​ມາເປັນ​ເສັ້ນ​ຝ້າຍ​ປະກອບ​ໃຊ້​ໃນ​ການຕ່ຳ ເມື່ອ​ຕ່ຳ​ສຳເລັດ​ກໍ່​ໄດ້​ນຳໝາກ​ປັດ​ມາ​ຮ້ອຍ​ດ້ວຍ​ມື ເພື່ອສ້າງ​ລາຍ​ທີ່​ເປັນ​ເອກະລັກ​ຂອງຊົນເຜົ່າ​ດັ່ງກ່າວ​ຄື: ເປັນ​ລາຍ​ມີດ ລາຍ​ພ້າ ລາຍ​ໄມ້ ສ່ວນ​ຜະລິດ​ຕະພັນ​ຫັດຖະກຳ​ທີ່​ຕ່ຳ​ສຳເລັດ​ແລ້ວ ໄດ້​ຈຳໜ່າຍ​ຢູ່​ພາຍ​ໃນ​ບ້ານ ນອກຈາກ​ນັ້ນ ກໍ່​ໄດ້​ມີ​ຊາວ​ຕ່າງປະເທດມາ​ຊື້​ກັບ​ທີ່ ​ທັງ​ໄດ້​ນຳໄປ​ຈຳໜ່າຍ​ຢູ່​ຕາດ​ເລາະຈຳໜ່າຍ​ໃນ​ນະຄອນຫຼວງ ມີ 3 ຮ້ານ ແລະ ຫຼວງ​ພະບາງ ມີ 2 ຮ້ານ ສະເລ່ຍ​ຈາກການ​ຕ່ຳ​ປີ​ໜຶ່ງ ໄດ້​ປະມານ 30 ກວ່າ​ລ້ານ​ກີບ ສ່ວນ​ລາຄາ​ຈຳໜ່າຍ​ແມ່ນ​ເລີ່ມ​ຈາກ​ລາຄາ 70 ພັນ​ກີບ​ຫາ 2 ລ້ານ​ກີບ.

 

 

ຂໍ້ມູນຈາກ: ວຽງຈັນໃຫມ່

 

ຄວາມຄິດເຫັນຂອງຜູ້ອ່ານ (0)