GMT+7 24/10/2017 05:39

ການສັກຢາກັນພະຍາດເດັກລຸ່ມ 5 ປີ ໄດ້ຂະຫຍາຍ ທົ່ວເຖິງຢູ່ແຂວງຈຳປາສັກ

 

 

ປັດຈຸບັນ ອັດຕາການໃຫ້ບໍລິການສັກຢາກັນພະຍາດ ໃຫ້ເດັກກຸ່ມເປົ້າໜາຍ ອາຍຸລຸ່ມ 5 ປີ ລວມເຖິງແມ່ຍິງຖືພາ ຢູ່ແຂວງຈຳປາສັກ ສາມາດຂະຫຍາຍ ທົ່ວເຖິງ ໃນເຂດຫ່າງໄກສອກຫລີກ ແລະ ມີປະສິດທິຜົນຫລາຍຂຶ້ນ. ພາຍຫລັງໄດ້ຮັບການຊ່ວຍເຫລືອ ແລະ ສະໜັບສະໜູນຈາກຄະນະ​ກຳມະ​ການ ​ແຫ່ງ​ປະ​ເທດ​ຍີ່ປຸ່ນ​ ​ເພື່ອ​ສະໜອງ​ວັກ​ແຊງ ​ໃຫ້​ເດັກ​ໃນ​ທົ່ວ​ໂລກ ຫລື ​ເຈ​ຊີ​ວີ ​ນັບ​ແຕ່​ປີ 2007 ​ເປັນ​ຕົ້ນ​ມາລວມມູນ​ຄ່າ 1,7 ລ້ານ​ກວ່າ​ໂດ​ລາສະຫະລັດ.

             
ທ່ານ ດຣ. ສົມ​ກຽດ ວໍລະ​ລາດ ຫົວໜ້າພະ​ແນ​ກສາທາລະນະສຸກ​ແຂວງຈຳປາສັກ ຢັ້ງຢືນວ່າ: ປັດຈຸບັນປະຊາຊົນ ໄດ້ຮັບການບໍລິການ ດ້ານສາທາລະນະສຸກ ຢ່າງທົ່ວເຖິງ  ເຮັດໃຫ້ອັດຕາການຕາຍຂອງແມ່ ແລະ ເດັກຫລຸດລົງຢ່າງຕໍ່ເນື່ອງ, ໂດຍສະເພາະບາງພະຍາດ ທີ່ສາມາດປ້ອງກັນໄດ້ດ້ວຍວັກແຊງ ເປັນຕົ້ນ​ພະຍາດ ໝາກແດງ, ໄອໄກ່, ຄໍຕີບ ແລະ ອື່ນໆ, ເຊິ່ງເປັນການປະກອບສ່ວນສຳຄັນ ເຮັດໃຫ້ ສປປ ລາວ ສາມາດລົບລ້າງພະຍາດຊຶມເຊື້ອ ແລະ ພະຍາດຕິດຕໍ່ໄດ້.

             ​​
ໃນ​ປັດຈຸບັນ, ວັກ​ແຊງ​ຊະນິດ​ໃໝ່ໆ ແມ່ນ​ໄດ້​ມີ​ການ​ພັດທະນາ ​ແລະ ມີ​ການ​ນຳ​ໃຊ້​ເພີ່ມ​ຂຶ້ນ ​ເພື່ອ​ປ້ອງ​ກັນ​ພະຍາດ​ອື່ນໆ ​ເຊັ່ນ: ພະຍາດ​ປອດ​ອັກ​ເສບ ​ແລະ ພະຍາດ​ຖອກທ້ອງ, ​ເຊິ່ງ​​ເດັກນ້ອຍ​ທີ່​ໄດ້​ຮັບ​ການ​ສັກ​ຢາ​ກັນ​ພະຍາດ ຈະ​ຖືກ​ປົກ​ປ້ອງ​ຈາ​ກການ​ຕິດ​ເຊື້ອ ຈາກ​ບັນດາ​ພະຍາດ​ທີ່​ມີ​ຄວາມ​ສ່ຽງ​ສູງ​​ເຫລົ່າ​ນີ້ ​ແລະ ອາດ​ຈະ​ເປັນ​ພະຍາດ​ທີ່​ກໍ່​ໃຫ້​ເກີດ​ການ​ພິການ ຫລື ​ເສຍ​ຊີວິ​ໃນ​ເດັກ. ສະ​ນັ້ນ, ​ເດັກ​ທຸກ​ຄົນ​ແມ່ນ​ມີ​ສິດ ​ທີ່​ຄວນ​ຈະ​ໄດ້​ຮັບ​ການ​ປົກ​ປ້ອງ, ​ແຕ່​ຖ້າ​ເດັກ​​ຜູ້​ທີ່​ບໍ່​ໄດ້​ຮັບ​ການ​ສັກ​ຢາ​ກັນ​ພະຍາດ ​ແມ່ນ​ມີ​ແນວ​ໂນ້ມສູງ​ທີ່​ຈະ​ເຈັບ​ປ່ວຍ, ພິການ​ຢ່າງ​ຖາວອນ, ຂາດ​ສານ​ອາຫານ ​ແລະ ​ເຖິງ​ຂັ້ນ​ເສຍຊີວິດ.

 

 

ຂໍ້ມູນຈາກ: ສຳນັກຂ່າວສານປະເທດລາວ

 

ຄວາມຄິດເຫັນຂອງຜູ້ອ່ານ (0)