GMT+7 24/10/2017 05:40

ພິທີ ສະເຫລີມສະຫລອງວັນສ້າງຕັ້ງໜັງສືພິມ ປກສ ຄົບຮອບ 20 ປີ

 

 

ໃນ​ວັນ​ທີ 12 ຕຸລາ 2017 ທີ່ ສະ​ໂມ​ສອນບັນນາທິການ-​ຂ່າວສານ ​ປກສ ໄດ້ມີພິທີສະ​ເຫລີ​ມສະຫລອງ ວັນສ້າງຕັ້ງ​ໜັງສືພີມ​ຄວາມ​ສະຫງົບ (12 ຕຸລາ 1997 ຫາ 12 ຕຸລາ 2017) ຄົບຮອບ 20 ປີ, ​ໂດຍ​ການ​ເປັນ​ກຽດ​ເຂົ້າ​ຮ່ວມ​ຂອງ​ ທ່ານ ພົຈວ ອາ​ລູ ວາລີ​ຊື ຫົວໜ້າ​ກົມ​ໃຫຍ່ການ​ເມືອງ ກະຊວງ ປກສ, ມີ​ບັນດາຄະນະ​ພັກ, ​ຄະນະ​ນໍາບັນນາທິການ-​ຂ່າວສານ ​ປກສ, ພະນັກງານ​ນັກຮົບ, ພ້ອມ​ດ້ວຍ​ແຂກ​ຖືກ​ເຊີນ​ ເຂົ້າ​ຮ່ວມ.

 

ທ່ານ ພັອ ສີ​ພັນ​ດອນ ຫວ່າງ​ປົວ​ຊົງ ຫົວໜ້າຄະນະ​ບັນນາທິການ-​ຂ່າວສານ ປກສ ກ່າວ​ວ່າ: ຕະຫລອດ​ໄລຍະ​ 20 ປີ ​ຜ່ານ​ມາ ພາຍ​ໃຕ້​ການ​ຊີ້​ນໍາ-​ນໍາພາ​ຂອງ​ຄະນະ​ພັກ​, ຄະນະ​ນໍາ​ກະຊວງ ປກສ ກໍ​ຄື​ ຄະນະ​ບັນນາທິການ-​ຂ່າວສານ ປກສ ພະນັກງານ​ນັກຮົບ​ທຸກ​ສະຫາຍ ​ໄດ້​ສຸມ​ໜົດທຸກ​ສະຕິ​ປັນຍາ ຮັບ​ໃຊ້​ພາລະ​ໜ້າ​ທີ່ ທີ່​ການຈັດ​ຕັ້ງ​ມອບ​ໜາຍ​ໃຫ້ດ້ວຍ​ຄວາມ​ຮັບຜິດຊອບ​ສູງ ​ແລະ ຕັ້ງໜ້າ​ພັດທະນາ​ດ້ວຍ​ຫລາຍ​ຮູບ​ຫລາຍ​ສີ ຮັບປະກັນ​ທາງດ້ານ​ຄຸນ​ນະພາບ ​ແລະ ​ເນື້ອ​​ໃນ, ສ້າງ​ຜົນງານ​ອັນ​ພົ້ນ​ເດັ່ນ​ໃນ​ຫລາຍ​ດ້ານ, ​ເຄື່ອນ​ໄຫວ​ເປັນ​ກະບອກ​ສຽງ​ທີ່​ແຫລມ​ຄົມ​ໃຫ້​ແກ່​ກໍາລັງ​ປ້ອງ​ກັນ​ຄວາມ​ສະຫງົບ, ​ໂຄສະນາ​ເຜີຍ​ແຜ່​ນະ​ໂຍບາຍ​ຂອງ​ພັກ, ລະບຽບ​ກົດ​ໜາຍ​ຂອງ​ລັດ, ​ແນວທາງ​ປ້ອງ​ກັນຊາ​ດປ້ອງ​ກັນ​ຄວາມ​ສະຫງົບ ​ເຮັດ​ໃຫ້​ມະຫາຊົນ, ຊັ້ນ​ຄົນ​ຕ່າງ​ໆ​ ເຫັນ​ໄດ້​ພັນທະ, ໜ້າ​ທີ່​ຄວາມ​ຮັບຜິດຊອບ​ຂອງ​ຕົນ ຕໍ່​ການ​ປົກ​ປັກ​ຮັກສາ​ຄວາມ​ສະຫງົບທາງ​ດ້ານ​ເມືອງ ​ແລະ ຄວາມ​ເປັນ​ລະບຽບ​ຮຽບຮ້ອຍ​ຂອງ​ສັງຄົມ.

 

ທ່ານ ພັອ ສີ​ພັນ​ດອນ ຫວ່າງ​ປົວ​ຊົງ ກ່າວ​ຕື່ມ​ວ່າ: ໜັງສືພິມ​ຄວາມ​ສະຫງົບ ປັດຈຸ​ບັນມີ​ຂະໜາດ 37X53 ຊມ, ມີ 16 ໜ້າ, ສອດ​ສີ 4 ໜ້າ, ມີ 12 ຄໍ​ລຳ, ມີຂ່າວ​ປະ​ຈໍາ​ວັນ, ສ້ຽນ​ສັງຄົມ, ​ເລື່ອງ​ສັ້ນ,ກາບກອນ, ວຽກ​ຈິງ​ຄົນ​ແທ້, ຮຽນ​ຮູ້​ກົດ​ໜາຍ, ຂ່າວ​ທ້ອງ​ຖິ່ນ, ຄະດີ​ຕ່າງ​ແດນ, ​ເຫດການ​ເດັ່ນ​ຮອບ​ໂລກ, ຮອບ​ໂລກ​ກິລາ, ຂອບ​ຖະໜົນ​ຮູ້​ໄວ້​ໄດ້​ປະ​ໂຫຍ​ດ, ຂ່າວ​ພາບ ​ແລະ ບໍລິການ​ຮັບ​ໃຊ້​ສັງຄົມ.

 

ການ​ພິມ​ຮັບ​ໃຊ້​ສັງຄົມ ​ແມ່ນ 2000-2500 ສະບັບ/ວັນ, ​ໂດຍ​ແຈ​ກຍາຍ​ພາຍ​ໃນ​ກໍາລັງ​ປ້ອງ​ກັນ​ຄວາມ​ສະຫງົບ ​ແລະ ຈໍາໜ່າຍ​​ທົ່ວ​ໄປ. ນອກຈາກ​ນັ້ນ​, ຍັງ​ມີ​ການບໍລິການ​ຮັບ​ກະຈາຍ​ຂ່າວ​ທາງ​ອອນ​ລາຍ ​​ເຟສບຸກ ​ແລະ ​ເວັບ​ໄຊຣ ຢ່າງ​ເປັນ​ປົກກະຕິ​ໃນ​ແຕ່​ລະ​ວັນ.

 

 

ຂໍ້ມູນຈາກ: ສຳນັກຂ່າວສານປະເທດລາວ

 

ຄວາມຄິດເຫັນຂອງຜູ້ອ່ານ (0)