GMT+7 24/10/2017 05:32

“ຍູເອັນ”ຍ້າຍເຈົ້າຫນ້າທີ່ລະດັບສູງ ອອກຈາກມຽນມາ

 

 

ຜູ້ອຳນວຍການໂຄງການພັດທະນາແຫ່ງສະຫະປະຊາຊາດປະຈຳມຽນມາ ກຽມເດີນທາງກັບໄປປະຈຳທີ່ນະຄອນນິວຍອກສິ້ນເດືອນນີ້ ຂະນະທີ່ລັດຖະບານມຽນມາບໍ່ຍອມໃຫ້ຍູເອັນຕັ້ງຜູ້ອຳນວຍການສຳນັກງານປະຈຳທ້ອງຖິ່ນທີ່ມີອຳນາດ ທຽບເທົ່າຜູ້ຊ່ວຍເລຂາທິການສະຫະປະຊາຊາດ

 

ສຳນັກຂ່າວຕ່າງປະເທດລາຍງານຈາກເມືອງຍ່າງກຸ້ງປະເທດມຽນມາ ເມື່ອວັນທີ 12ຕຸລາວ່າ: ສະຫະປະຊາຊາດ (ຍູເອັນ) ອອກຖະແຫລງການເມື່ອວັນພຸດວ່າທ່ານນາງເຣນາຕາ ລ໊ອກເດສຊັລລຽນ ຜູ້ອຳນວຍການໂຄງການພັດທະນາແຫ່ງ ສະຫະປະຊາຊາດ (ຍູເອັນດີພີ) ປະຈຳມຽນມາຈະເດີນທາງກັບໄປປະຈຳທີ່ສຳນັກງານໃຫຍາຍູເອັນທີ່ນະຄອນນິວຍອກໃນຊ່ວງສິ້ນເດືອນນີ້ ເຊິ່ງເປັນສ່ວນຫນື່ງຂອງຂະບວນການຖ່າຍໂອນຄວາມຮັບຜິດຊອບ ຫລັງປະຕິບັດຫນ້າ ທີ່ຢູ່ໃນມຽນມາມາດົນເກືອບ 4ປີ

 

ຂະນະດຽວກັນຍູເອັນອອກລາຍງານເຊິ່ງເນື້ອຄວາມສ່ວນໃຫຍ່ອ້າງອີງຈາກການສຳພາດຜູ້ລີ້ໄພຊາວໂຣຮິນຈາໃນສູນພັກພິງທີ່ຄ້າຍໃນບັງກາລາເທດວ່າ: ປະຕິບັດການກວດລ້າງຍ່າງເປັນລະບົບຂອງກອງທັບມຽນມາໃນລັດຍະໄຂ່ຕະຫລອດ ເວລາທີ່ຜ່ານມາ ມີເປົ້າຫມາຍປະສົງເພື່ອຂັບໄລ່ຊາວໂຣຮິນຈາໃຫ້ອອກໄປຈາກມຽນມາເປັນການຖາວອນ ໂດຍການສູ້ຮົບຄັ້ງລ່າສຸດທີ່ຍືດເຍື້ອຕັ້ງແຕ່ວັນທີ 25 ສິງຫາທີ່ຜ່ານມາ ສົ່ງຜົນໃຫ້ເກີດຄື້ນຜູ້ລີ້ໄພຊາວໂຣຮິນຈາຫລາຍກວ່າ 500,000ຄົນ ຫລັ່ງໄຫລຂ້າມພົມແດນໄປຍັງບັງກາລາເທດ ເຊິ່ງເດີມແລ້ວຮັບດູແລຜູ້ລີ້ໄພຊາວໂຣຮິນຈາຢູ່ແລ້ວປະມານ 300,000-400,000ຄົນ

 

ດ້ານທ່ານໂທມັສ ຮູເນັກເຄີ ທີ່ປຶກສາອາວຸໂສດ້ານນະໂຍບາຍຂອງຍູເອັນກ່າວວ່າ: ຍູເອັນມີຫລັກຖານທີ່ເຊື່ອຖືໄດ້ວ່າກອງທັບມຽນມາຝັງທຸ່ນລະເບີດໄວ້ຫລາຍຈຸດຕາມແນວຊາຍແດນ ທາງຕາເວັນຕົກທີ່ຕິດກັບພາກຕາເວັນອອກຂອງ ບັງກາລາເທດ ເພື່ອປ້ອງກັນບໍ່ໃຫ້ຊາວໂຣຮິນຈາທີ່ຂ້າມພົມແດນໄປແລ້ວກັບເຂົ້າມາອີກ

 

ທັງນີ້ຄວາມເຄື່ອນໄຫວດັ່ງກ່າວຂອງຍູເອັນເກີດຂື້ນໃນຂະນະທີ່ລັດຖະບານມຽນມາຂອງທ່ານນາງອອງຊານ ຊູຈີ ຍັງຄົງປະຕິເສດຄຳຮ້ອງຂອງຍູເອັນ ເຊິ່ງຕ້ອງການແຕ່ງຕັ້ງຜູ້ອຳນວຍການສຳນັກງານຍູເອັນປະຈຳມຽນມາ ໃຫ້ມີອຳນາດ ທຽບເທົ່າກັບຜູ້ຊ່ວຍເລຂາທິການສະຫະປະຊາຊາດ (ເອເອັສຈີ) ເຊິ່ງທ່ານຕວ່ງ ຕຸນ ທີ່ປຶກສາດ້ານຄວາມຫມັ້ນຄົງຂອງລັດຖະບານມຽນມາກ່າວວ່າ: ບໍ່ມີບັນຫາຫາກຫົວຫນ້າຄະນະເຈົ້າຫນ້າທີ່ຂອງຍູເອັນທຸກປະເທດລ້ວນເປັນບຸກຄົນ ທີ່ມີອຳນາດທຽບເທົ່າເອເອັສຈີ ບໍ່ແມ່ນການເຈາະຈົງສະເພາະມຽນມາປະເທດດຽວ

 

 

 

 

 

ຂໍ້ມູນຈາກ:ເດລິນີວ

 

ຄວາມຄິດເຫັນຂອງຜູ້ອ່ານ (0)