GMT+7 24/10/2017 05:40

ຫັດຖະກຳເຄື່ອງເງິນ-ທອງ ໄດ້ຮັບຄວາມນິຍົມ ຈາກ ສັງຄົມຫລາຍຂຶ້ນ

 

 

ຫັດຖະກຳເຄື່ອງເງິນ ແລະ ທອງ ໄດ້ຮັບຄວາມນິຍົມສູງຈາກສັງຄົມ​ຫລາຍ​ຂຶ້ນ ໃນປັດຈຸບັນ ມີ ໂອເງິນ, ໂອທອງ, ຂັນເງິນ, ຂັນທອງ ທີ່ປະຊາຊົນລາວ ໃຊ້ເຂົ້າໃນພິທີໃສ່ບາດ ແລະ ງານບຸນຕ່າງໆ ໂອ ແລະ ຂັນ ເປັນພາຊະນະໜຶ່ງ ທີ່ໃສ່ສິ່ງຂອງຕ່າງໆ ເພື່ອປະກອບພິທີກຳ ​ແລະ ງານ​ບຸນ​ຕ່າງໆ.

 

ທ່ານ ນາງ ບົວຮຽງ ກຸມພົນພັກດີ ເຈົ້າຂອງທຸລະກິດຫັດຖະກຳເຄື່ອງເງິນ ແລະ ທອງ ບ້ານວຽງສະຫວັນ, ເມືອງສີໂຄດຕະບອງ ນະຄອງຫລວງວຽງຈັນ, ໄດ້ໃຫ້ສຳພາດ ຕໍ່ນັກຂ່າວສຳນັກຂ່າວສານ ​ເມື່ອໃນທ້າຍອາທິດຜ່ານມານີ້ວ່າ: ຫັດຖະກຳເຄື່ອງເງິນ ແລະ ທອງ ທີ່ໄດ້ຮັບຄວາມນິຍົມສູງ ໃນປັດຈຸບັນມີ ໂອເງິນ ແລະ ທອງແດງ ທີ່ມີຫູຫິ້ວ. ຂັນເງິນ, ທອງແດງ, ທອງເຫລືອງ ແລະ ຂັນສາມກະສັດ ເປັນຂັນທີ່ມີເງິນ, ທອງປະກອບຢູ່ໃນຂັນດຽວ. ສຳລັບລວດລາຍ ທີ່ໄດ້ຮັບຄວາມນິຍົມສູງ ມີຮູບພະທາດຫລວງ, ລາຍສິບສອງລາສີ, ລາຍດອກໄມ້, ລາຍພະຍານາກ ແລະ ລວດລາຍວັດທະນະທຳຕ່າງໆ ຂອງລາວ.

 

ນອກນີ້, ຖ້າລູກຄ້າທ່ານໃດ ທີ່ມີລວດລາຍ ຫລື ມັກລວດລາດຮູບແບບໃດ ພວກເຮົາກໍສາມາດເຮັດໃຫ້ໄດ້ຕາມຄວາມຕ້ອງການຂອງລູກຄ້າ, ເຊິ່ງລາຄາເຄື່ອງເງິນ ແລະ ທອງ ແມ່ນຄິດໄລ່ລາຄາຕາມນ້ຳໜັກຂອງວັດຖຸແຕ່ລະຢ່າງ ເປັນຕົ້ນ ຂັນເງິນສົດ 1 ກິໂລ ລາຄາ 8.500.000 ກີບ, ຂັນທອງ ແດງສົດ 1 ກິໂລ 220.000 ກີບ ແລະ ຂັນທອງແດງເຄືອບເງິນ ລາຄາ 250.000 ກີບ, ຂັນທອງເຫລືອງ 1 ກິໂລ 450.000 ກີບ ແລະ ຂັນທອງສາມກະສັດ 1 ກິໂລ ລາຄາ 1.000.000 ກີບ.

 

ທ່ານ ນາງ ບົວຮຽງ ໃຫ້ຮູ້ຕື່ມວ່າ: ພໍມາຮອດປີ 2015 ຄອບຄົວຂອງຕົນ ໄດ້ຮັບການຈົດທະບຽນຈາກກະຊວງອຸດສາຫະກຳ ແລະ ການຄ້າ ໃຫ້ເປັນສິນຄ້າຫັດຖະກຳເຄື່ອງເງິນ ແລະ ທອງ ໜຶ່ງເມືອງ ໜຶ່ງຜະລິດຕະພັນ (ODTO) ເມື່ອເຂົ້າເປັນສິນຄ້າໂອດັອບແລ້ວ ແມ່ນມີຄວາມສະດວກສະບາຍຫລາຍຂຶ້ນ ໂດຍສະເພາະ ການຈຳໜ່າຍສິນຄ້າຕາມທອງຕະຫລາດ ແລະ ເປັນທີ່ຮູ້ຈັກຂອງສັງຄົມ, ໄດ້ຮັບການຊ່ວຍ ເຫລືອທາງດ້ານການໂຄສະນາ, ນະໂຍບາຍໃນການເຂົ້າຮ່ວມງານ ວາງສະແດງ ທີ່ສຳຄັນຕ່າງໆ ທີ່ກະຊວງ ອຸດສາຫະກຳ ແລະ ການຄ້າ ໄດ້ຈັດຂຶ້ນ, ນອກນີ້, ສິນຄ້າທີ່ຕົນຜະລິດ ບໍ່ວ່າຈະເປັນໂອ ແລະ ຂັນ ກໍໄດ້ສົ່ງໄປຂາຍຢູ່ປະເທດ ສະຫະລັດອາເມລິກາ ເປັນຄັ້ງທຳອິດ ໃນທ້າຍເດືອນກັນຍາ ທີ່ຜ່ານມາ.

 

ພ້ອມ​ນີ້, ຂໍຝາກເຖິງປະຊາຊົນລາວ ທີ່ຢູ່ພາຍໃນ ແລະ ຕ່າງປະເທດ ທີ່ຊົມໃຊ້ຜະລິດຕະພັນຂອງຄົນລາວ ກໍຢາກໃຫ້ຫັນມາອະນຸລັກຮັກສາ, ລວດ​ລາຍ, ສີໄມ້ລາຍມື ແລະ ວັດທະນະທຳອັນດີງາມຂອງລາວ ໜຶ່ງໃນນັ້ນແມ່ນໂອ ແລະ ຂັນ ທີ່ໄດ້ມີການຊົມໃຊ້ມາແຕ່ດົນນານ ຖືວ່າເປັນວັດຖຸທີ່​ມີ​ເອກະ​ລັກ ອີກຢ່າງໜຶ່ງຂອງຊາວລາວ ທີ່ໄດ້ສືບທອດຕໍ່ກັນມາຫລາຍຍຸກ ຫລາຍສະໄໝ. ສະນັ້ນ, ຈຶ່ງຢາກໃຫ້ຊ່ວຍກັນປົກປັກຮັກສາສິ່ງທີ່ເປັນເອກະລັກ ແລະ ວັດທະນະທຳຂອງຄົນລາວ ໃຫ້ຢູ່​ກັບ​ສັງຄົມ​ລາວ​ຕະຫລອດ​ໄປ ແລະ ເປັນທີ່ຮູ້ຈັກຂອງຄົນທັງໂລກ. ໃຜສົນ​ໃຈຢາກໄດ້ໂອ້ ແລະ ຂັນ ທີ່ມີລວາດລາຍງາມໆ ສາມາດ​ຕິດ​ຕໍ່​ໄດ້ທີ່​ເບີໂທ​ 020 5565 2405

 

 

ຂໍ້ມູນຈາກ: ສຳນັກຂ່າວສານປະເທດລາວ

 

ຄວາມຄິດເຫັນຂອງຜູ້ອ່ານ (0)