GMT+7 24/10/2017 05:33

ປ່ຽນອາຊີບ ຈາກອາຈານສອນກາຍເປັນເຈົ້າຂອງໂຮງຮຽນ

 

 

ປ່ຽນ​ຕົນ​ເອງ​ ຈາ​ການ​ເປັນ​ອາຈານ​ສອນ ຈົນ​ກາຍ​ເປັນ​ເຈົ້າ​ຂອງ​ ໂຮງຮຽນ​ພູນ​ສະຫວັດ ທີ່​ມີ​ຊື່​ສຽງ​​ ໃນ​ເຂດ​ເມືອງ​ໄຊ​ທານີ. ຂະນະທີ່ທ່ານ ນາງ ພູນ​ສະຫວັດ ພົງ​ສະຫວັດ ​ເຈົ້າ​ຂອງ​ໂຮງຮຽນດັ່ງກ່າວ​​​,ເປີດ​ເຜີຍ​ຕໍ່​ນັກ​ຂ່າວ​​ ​ເມື່ອອາທິດ​ຜ່ານ​ມາ​ນີ້ວ່າ ການ​​ເປີດ​ໂຮງຮຽນ​​​ໃນເບື້ອງ​ຕົ້ນ​ ປີ 2013 ​​ມື້​ທໍາ​ອິດມີ​ພຽງ​ແຕ່​ນັກຮຽນ 1 ຄົນ​ເຂົ້າ​ມາສະ​ໜັກ​ຮຽນ​, ​ແຕ່​ປັດຈຸບັນ ​ມີ​​​ເຖິງ 900 ຄົນ.

 

ທ່ານ ນາງ ພູນ​ສະຫວັດ ພົງ​ສະຫວັດ ​ເຈົ້າ​ຂອງ​ໂຮງຮຽນພູນ​ສະຫວັດ (ລ້ຽງ​ເດັກ-ອະນຸບານ-ປະຖົມ) ຜູ້​ທີ່​​ເຄີຍ​ເປັນ​ອາຈານ​ສອນ ​ຢູ່​ວິທະຍາ​ໄລ​ລັດຕະນະ​ ເລົ່າ​ສູ່​ນັກ​ຂ່າວ​ຟັງ ​ໃນ​ໂອກາດ​ວັນ​ຄູ​ແຫ່ງ​ຊາດ​ 7 ຕຸລາ ​ນີ້ວ່າ: ຄວາມ​ຈິງ​ຕົນ​ເອງ ມີ​ຕົ້ນ​ກໍາ​ເນີ​ດຈາກ​ຄອບຄົວ​ເຮັດ​ການ​ປະຕິວັດ (ທະຫານ) ​ເມື່ອ​ຈົບ​ການ​ມັດ​ທະ​ຍົມ​ຕອນ​ປາຍ ​ໄດ້​ເລືອກ​ເຂົ້າ​ຮຽນ​ສາຂາ​ເສດຖະສາດ ​ແລະ ການ​ຄຸ້ມຄອງ​ຢູ່ມະຫາວິທະຍາ​ໄລ​ແຫ່ງ​ຊາດ ​ເຊິ່ງບໍ່​ໄດ້​ເດີນ​ຕາມ​ຮອຍ​ພໍ່​ ທີ່​ເປັນ​ທະຫານ. ພາຍຫລັງ​ຈົບ​ຈາກ​ມະຫາວິທະຍາ​ແຫ່ງ​ດັ່ງກ່າວ, ​ກໍ​ຕັດສິນ​ໃຈ​ໄປ​ສຶກສາ​ຕໍ່​ທີ່ຣາຊະ​ອານາຈັກ​ໄທ​ ໃນ​ສາ​ຂາ​ເດີມ, ​ເມື່ອ​ຈົບ​ແລ້ວ​ກໍ​ໄດ້​ເປັນ​ອາຈານ​ສອນ​ຢູ່​ວິທະຍາ​ໄລ​ລັດຕະນະ ​ແລະ ໄດ້​ລາ​ອອກ​ເພື່ອ​ມາ​ສ້າງ​ທຸລະ​ກິດ​ຂອງ​ຕົນ​ເອງ.

 

ທ່ານ ນາງ ພູນ​ສະຫວັດ ພົງ​ສະຫວັດ ​ໄດ້​ອະທິບາຍ​ວ່າ: ກ່ອນ​ຕັດສິນ​ໃຈ​ສ້າງ​ຕັ້ງ​ໂຮງຮຽນ​ກໍ​ໄດ້​ປຶກສາ​ຫາລື​ກັບ ​ພໍ່-​ແມ່ ​ແລະ ຍາດ​ຕິ​ພີ່ນ້ອງ​, ​ເຊິ່ງ​ເພີ່ນ​​ເຫັນ​ດີ​ ພ້ອມ​​ໃຫ້ການສະໜັບສະໜູນ ​ໃນ​ປີ 2013 ​ໄດ້​ເປີດ​​ໂຮງຮຽນ​ຢ່າງ​ເປັນ​ທາງ​ການ ​ແຕ່​ເປັນ​ສິ່ງ​ທໍ້​ໃຈ​ຫລາຍ​ທີ່​ສຸດ​ ເພາະ​ມື້​ທໍາ​ອິດ​ມີ​ຜູ້​ປົກຄອງ​ເດັກ​ນັກຮຽນ​ພາ​ລູກ​ມາສະ​ເໜີ​ເຂົ້າ​ຮຽນ​ພຽງ​ແຕ່ 1 ຄົນ. ​​

 

ໃນ​ປັດຈຸບັນ ​ໄດ້​ມີ​ນັກຮຽນ​ເພີ່ມ​ຂຶ້ນທັງ​ໝົດ​ ນັ້ນ​ແມ່ນ​ຍ້ອນ​ຄວາມ​ເອົາ​ໃຈ ​ແລະ ອົດທົນ ​ຄື: ລະ​ເວັ້ນ​ໃຫ້​ມີ​ໄລຍະຫ່າງບໍ່ຂຶ້ນ​ຄ່າ​ຮຽນ, ການ​ສິດສອນ​ເນັ້ນ​ຄຸນ​ນະພາ​ບ​ເປັນ​ຫລັກ, ​ມີ​ຄູ​ຕ່າງປະ​ເທດ​ຈໍານວນ​ໜຶ່ງ​ເຂົ້າ​ມາ​ສອນ​ພາສາ​ອັງກິດ, ​ໃຫ້​ເງິນ​ໂບນັດ​ຄູ​ອາຈານ ​ແລະ ມີ​ລາງວັນ​ໃຫ້​ນັກຮຽນ​ເກັ່ງ, ຢຶດຖື​ລະບຽບ​ພາຍ​ໃນ​ໂຮງຮຽນ​ຢ່າງ​ເຄັ່ງ​ຂັດ​ເພື່ອ​ຄວາມ​ປອດ​ໄພ​ເດັກ, ການ​ເຄື່ອນ​ໄຫວ​ກິດຈະ​ກໍາ​ນອກ​ຫລັກສູດ, ​ເພີ່ມ​ທັກ​ສະ​ນະ​ໃຫ້​ເດັກນ້ອຍ​ກ້າ​ສະ​ແດງ​ອອກ, ອະນຸຍາດ​ໃຫ້​ພໍ່​ແມ່​ປະຊາຊົນ​ອ້ອມ​ຂ້າງມາ​ຂາຍ​ເຄື່ອງ​ຢູ່ໂຮງຮຽນ​ໄດ້​ ໂດຍ​ບໍ່​ຕ້​ອງ​ເກັບ​ຄ່າສະຖານ​ທີ່ ​ແຕ່​ຕ້ອງ​ຮັກສາ​ຄວາມ​ເປັນ​ລະບຽບ ​ແລະ ສະອາດ. ສໍາ​ລັບ​ແຜ່ນ​ໃນ​ຕໍ່ໜ້າ​ພວມ​ຂະຫຍາຍ ​ແລະ ປຸກ​ສ້າງ​ອາຄານ​ຮຽນ​ຫລັງ​ໃໝ່ ສໍາລັບ​ຊັ້ນ​ມັດທະ​​ຍົມຕົ້ນ ​ຄາດ​ວ່າ​ປີ 2018 ຈະ​ສໍາ​ເລັດ.

 

ປັດຈຸບັນ​ນີ້ ໂຮງຮຽນພູນ​ສະຫວັດ ມີ​ຄູ​ສອນ​ທັງ​ໝົດ 43 ຄົນ ​ແລະ ມີ 35 ຫ້ອງ​ຮຽນ, ​ໂຮງຮຽນ​ດັ່ງກ່າວ​ຕັ້ງ​ຢູ່​ເຂດ​ບ້ານ​ນາ​ທົ່ມ ​ເມືອງ​ໄຊ​ທານີ.

 

 

ຂໍ້ມູນຈາກ: ສຳນັກຂ່າວສານປະເທດລາວ

 

ຄວາມຄິດເຫັນຂອງຜູ້ອ່ານ (0)