GMT+7 24/10/2017 05:36

ຜູ້ເສຍຫາຍຈາກ ການຮ່ວມທຶນນໍາ ພິເອັສ ເຂົ້າແຈ້ງ ຄວາມແລ້ວ 5000 ກວ່າຄົນ

 

 

ຄະນະ​ສະ​ເພາະ​ກິດ ​ແກ້​ໄຂ​ບັນຫາ​ບໍລິສັດ ພີ​ເອັສ ສົ່ງ​ເສີມ​ກະ​ສີ​ກໍາ ​ແລະ ອຸດ​ສະ​ກໍາ​ຄົບ​ວົງ​ຈອນ​ ຂາ​ເຂົ້າ-ຂາ​ອອກ ​ໄດ້ຮີບ​ຮ້ອນ​ສືບສວນ-ສອບ​ສວນ. ມາ​ຮອດ​ປັດຈຸ ບັນ​ມີ​ຜູ້​​ເສຍ​ຫາຍ​​ເຂົ້າແຈ້ງ​ຄວາມຕໍ່​ເຈົ້າ​ໜ້າ​ທີ່​ແລ້ວທັງໝົດ  5.000 ກວ່າຄົນ, ລວມມູນຄ່າເສຍຫາຍ 190 ກວ່າຕື້ກີບ. ຜູ້ເສຍຫາຍສ່ວນໃຫຍ່ແມ່ນ ໃນນະຄອນຫລວງວຽງຈັນ ແລະ ບັນດາ​ແຂວງ​ ໃນ​ທົ່ວ​ປະ​ເທດ. ສໍາລັບ​ຜູ້​ທີ່​ບໍ່​ທັນ​ແຈ້ງ​ ກໍ​ໃຫ້​ຮີບ​ຮ້ອນ​ຂຽນ​ຄໍາ​ຮ້ອງ​ຟ້ອງແຈ້ງ​ຄວາມ ຢູ່​ກົມ​ຕໍາຫລວດ​ເສດຖະກິດ ກະຊວງ​ປ້ອງ​ກັນ​ຄວາມ​ສະ​ຫງົບ ຫລື ຢູ່​ບໍ​ສັດ​ພິ​ເອັສ. ສ່ວນ​ຜູ້​​ເສຍ​ຫາຍ​ຢູ່​ຕ່າງ​ແຂວງ ​ແມ່ນ​ຂຽນ​ຄໍາ​ຮ້ອງ ຫລື ​ແຈ້ງ​ຄວາມ​ນໍາ​ເຈົ້າ​ໜ້າ​ທີ່​ຕໍາ​ຫລວ​ດ ຢູ່​ກອງ​ບັນຊາ​ການ ປກສ ​ເມືອງ ຫລື ຫ້ອງ​ຕໍາຫລວດ​ກອງ​ບັນຊາ​ການ ປກສ ​ແຂວງ, ນະຄອນຫລວງ​ວຽງຈັນ.

 

ໃນ​ວັນ​ທີ 5 ຕຸລາ 2017 ນີ້ ​ທີ່​ກົມ​ໃຫຍ່​ຕໍາຫລວດ, ກະຊວງ​ປ້ອງ​ກັນ​ຄວາມ​ສະຫງົບ ​ໄດ້​ມີພິທີ​ຖະ​​ແຫລ​ງຂ່າວ​ ເຖິງ​ຄວາມ​ຄືບ​ໜ້າ​ ໃນ​ການ​ແກ້​ໄຂ​ບັນຫາ​ດັ່ງກ່າວ, ໂດຍທ່ານ ອາຄົມ ປຣະ​ເສີດ ຫົວໜ້າ​ກອງ​ເລຂາ​ ຄະນະ​ສະ​ເພາະ​ກິດ​ ແກ້​ໄຂ​ບັນຫາ​ບໍລິສັດ​ພິ​ເອັສ, ຫົວໜ້າ​ກົມ​ຄຸ້ມ​ຄອງ​ສະຖາ​ບັນ​ການ​ເງິນ​ທະນາຄານ​ ແຫ່ງ ສປປ ລາວ ​​ໄດ້ໃຫ້​ຮູ້​ວ່າ: ປັດຈຸບັນ ລັດຖະບານ​ໄດ້​ແຕ່ງ​ຕັ້ງ​ຄະນະ​ສະ​ເພາະ​ກິດ​ ຄື: ອະນຸ​ກໍາມະການ​ ດ້ານ​ການ​ສືບສວນ-ສອບ​ສ່ວນ ​ດໍາ​ເນີນ​ຄະດີ​ຕາມ​ກົດໝາຍ​ອາຍາ ​ແລະ ຮັກສາ​ຄວາມ​ສະຫງົບ, ອະນຸ​ກໍາມະການ ​ດ້ານ​ການ​ຕິດຕາມ​ການ​ເຄື່ອນ​ໄຫ​ວຂອງ​ບໍລິສັດ, ການ​ປະ​ເມີນ​ຊັບ​ສິນ​ກວດ ກາ​ບັນຊີ ​ແລະ ກອງ​ເລຂາ​ຄະນະ ​ເພື່ອ​ເຮັດ​ວຽກ​ເປັນ​ເສນາ​ທິການ ໃນ​ການ​ປະສານ​ວຽກ​ງານ ​ໃນ​ການ​ເກັບ​ກໍາ​ລວບ​ລວມຂໍ້​ມູນຜ່າ​ນ ການ​ສືບສວນ-ສອບ​ສວນ ຂອງ​ເຈົ້າ​ໜ້າ​ທີ່​ກ່ຽວ​ຂ້ອງ ສາມາດ​ເກັບ​ກໍາ​ຂໍ້​ມູນ​ຫລັກ​ຖານ ​ແລະ ຄໍາ​ໃຫ້ການຜູ້​​ເສຍ​ຫາຍຈໍານວນ​ໜຶ່ງ​ເຫັນ​ວ່າ ບໍລິສັດ​ພິ​ເອັສ ​ແມ່ນ​ໃຊ້​ເລ່ຫລ່ຽມ ​ຕົວະ​ຍົວະ​ຫລອກ​ຫລວງ ດ້ວຍ​ວິທີ​ການ​ໂຄສະນາ​ຕ່າງໆ​ ວ່າ​ຈະ​ໃຫ້​ຜົນ​ຕອບ​ແທນ​ສູງ ​ເພື່ອ​ໃຫ້​ບຸກຄົນ​ອື່ນ​ຫລົງ​ເຊື່ອ ​ແລ້ວ​ເອົາ​ເງິນ​ມາ​ໃຫ້​ບໍລິສັດ ດ້ວຍ​ຮູບ​ການ​ເຮັດ​ສັນຍາ​ຮ່ວມ​ທຶນ ​ນໍາ​ສະມາຊິກ ​ແລ້ວ​ຈະ​ໃຫ້​ດອກ​ເບ້ຍ​ສູງ​ ເພື່ອ​ສ້າງ​ເປັນ​ແຮງ​ຈູງ​ໃຈ, ​ແຕ່ພາຍ ຫລັງ​ບໍລິສັດພີ​ເອັສ​ ໄດ້​ເງິນ​ຈາກ​ສະມາຊິກ​ແລ້ວ ​ພັດ​ບໍ່​ຈ່າຍ​ເງິນ​ຄືນ​ຕາມ​ສັນຍາ. ປັດຈຸບັນເຈົ້າ​ໜ້າ​ທີ່​ຕໍາຫລວດ​ ກໍ​ໄດ້​ເປີດ​ການ​ສືບສວນ-ສອບ​ສວນ ຕໍ່​ກັບ​ບຸກຄົນ​ ທີ່​ມີ​ສ່ວນ​ກ່ຽວຂ້ອງ​ໃນ​ສະຖານ ​ສໍ້​ໂກງຊັບ​ພົນລະ​ເມືອງ ​ແລະ ອົງການ​ໄອ​ຍະ​ການ​ ໄດ້​ອອກ​ຄໍາ​ສັ່ງ​ກັກ​ຂັງ​ພາງ​ ປະທານ​ບໍລິສັດ ພິ​ເອັສ ນາງ​ ສຸກ​ນາລີ ​ເທບ​ສີ​ເມືອງ ​ແລະ ທ້າວ ປໍ​ເຮີ, ພ້ອມ​ດ້ວຍ​ຜູ້​ຖືກ​ຫາ​ຈໍານວນ​ໜຶ່ງ ​ເພື່ອ​ສືບສວນ-ສອບ​ສວນ​ຂະຫຍາຍ​ຜົນ ຫາ​ຜູ້​ຮ່ວມ​ກະທໍາ​ຜິດ​ມາ​ລົງ​​ໂທດ ​ຕາມ​ກົດໝາຍ​ບ້ານ​ເມືອງ. ນອກ​ນັ້ນ, ​ຄະ​ນະ​ສະ​ເພາະ​ກິດ​ ຍັງ​​ໄດ້​ທໍາ​ການ​ກວດ​ຄົ້ນ​ເຄຫາ​ສະຖານ, ພ້ອມ​ຢຶດ, ອາ​ຍັດ​ຊັບ​ສິນ​ຈໍານວນ​ໜຶ່ງ ​ທີ່​ມີ​ສ່ວນ​ພົວພັນ​ກັບ​ຄະດີ. ສໍາລັບ​ກິດຈະການ​ຂອງ​ບໍລິສັດ ໃນ​ໄລຍະ​ດໍາ​ເນີນ​ຄະດີ​ ແມ່ນ​ໃຫ້​ຢຸດ​ເຊົາ​ການ​ເຄື່ອນ​​ໄຫວ​ທຸລະ​ກິດ​ທັງ​ໝົດ.

 

ທ່ານ​ ອາຄົມ ປຣະ​ເສີດ ກ່າວ​ຕື່ມ​ວ່າ: ​ເພື່ອ​ປົກປ້ອງສິດຜົນປະ​ໂຫຍ​ດ ຂອງ​ຜູ້​ເສຍ​ຫາຍ ​ແລະ ດໍາ​ເນີນ​ຄະດີ​ໃຫ້ຖືກຕ້ອງ​ຕາມ​ກົດໝາຍ​ ໃນ​ນາມ​ຕາງ​ໜ້າ​ຄະນະ​ສະ​ເພາະ​ກິດ ​ຈຶ່ງ​ແຈ້ງ​ມາ​ຍັງ​ຜູ້​​ເສ​ຍຫາຍ​ທີ່​ຍັງ​ບໍ່​ທັນ​ຂຽນ​ຄໍາ​ຮ້ອງ​ຟ້ອງ ຫລື ​ແຈ້ງ​ຄວາມ​ຕໍ່​ກັບ​ບໍລິສັດ​ດັ່ງກ່າວ, ​ໃຫ້​ຮີບ​ຮ້ອນ​ຂຽນ​ຄໍາ​ຮ້ອງ​ຟ້ອງ ຫລື​ ແຈ້ງ​ຄວາມຢູ່​ກົມ​ຕໍາຫລວດ​ເສດຖະກິດ ກະຊວງ​ປ້ອງ​ກັນ​ຄວາມ​ສະ​ຫງົບ ຫລື ຢູ່​ບໍ​ສັດ​ພິ​ເອັສ. ນອກຈາກ​ນັ້ນ​, ຍັງ​ຮຽກຮ້ອງ​ໃຫ້ພໍ່​, ແມ່​​ປະຊາຊົນ ທີ່ເປັນສະມາຊິກ​ຂອງ​ບໍລິສັດ​ພິ​ເອັສ ທີ່​ໄດ້​ຮັບ​ຄວາມ​ເສຍ​ຫາຍ​ໃຫ້​ມີ​ຄວາມ​ອົດທົນ ​ແລະ ​ໃຫ້ການ​ຮ່ວມ​ມື​ກັບ​ພາກ​ລັດ ​ໃນ​ການ​ແກ້​ໄຂ​ບັນຫາ​ດັ່ງກ່າວ.

 

 

ຂໍ້ມູນຈາກ: ສຳນັກຂ່າວສານປະເທດລາວ

 

ຄວາມຄິດເຫັນຂອງຜູ້ອ່ານ (0)