GMT+7 24/10/2017 05:34

ສະກັດຈັບຜູ້ຖືກຫາພ້ອມຢາບ້າ 20.000 ເມັດ ກ່ອນສົ່ງຂາຍ

 

 

ເຈົ້າ​ໜ້າທີ່​ພະ​ແນກ​ຕຳຫຼວດສະກັດ​ກັ້ນ ແລະ ຕ້ານ​ຢາ​ເສບ​ຕິດ ​ປກສ ແຂວງ​ສະຫວັນ​ນະ​ເຂດ ສະກັດ​ຈັບ​ຜູ້​ຖືກ​ຫາ 2 ຄົນ ພ້ອມ​ຢາເສບ​ຕິດ (ປະເພດ​ຢາ​ບ້າ) ຈຳນວນ 10 ມັດ ເທົ່າ​ກັບ 20.000 ເມັດ ໄດ້​ກ່ອນ​ຈະ​ສົ່ງ​ຂາຍ.

 

ເຈົ້າ​ໜ້າທີ່​ເປີດເຜີຍ​ວ່າ: ໃນ​ວັນທີ 19 ກັນຍາ 2017 ຜ່ານ​ມາ ໄດ້ຕິດຕາມ​ກວດກາ​ການເຄື່ອນໄຫວຄ້າຂາຍ​ຢາ​ເສບ​ຕິດ​ຂອງ​ກຸ່ມ​ຄົນຈຳນວນ​ໜຶ່ງ ຢູ່​ເຂດ​ບ້ານ​ຄືມ​ສະຫວ່າງ ເມືອງ​ສອງ​ຄອນ ແຂວງສະຫວັນ​ນະ​ເຂດ ຮອດ​ເວລາ​ປະມານ 13:00 ໂມງຂອງ​ວັນ​ດຽວກັນ ພົບ​ເຫັນ​ເປົ້າ​ໝາຍ ຈຶ່ງ​ວາງແຜນ ແລະ ສະແດງ​ຕົວ​ຈັບ​ກຸມ​ຜູ້ຖືກ​ຫາ 2 ຄົນ ຊື່​ທ້າວ ແສງ ອາຍຸ 50 ປີ ຢູ່​ບ້ານ​ໜອງ​ວັດ ແລະ ທ້າວ ເລ​ດ້າ ອາຍຸ 23 ປີ ຢູ່​ບ້ານໜອງ​ແດງ ທັງ​ສອງ​ຢູ່​ເມືອງ​ສອງຄອນ ເຊິ່ງ​ຜູ້​ຖືກ​ຫາ​ແມ່ນ​ຢູ່​ໃນ​ເປົ້າໝາຍ​ຕິດຕາມ​ຂອງ​ເຈົ້າ​ໜ້າທີ່​ມາໄດ້​ໄລຍະ​ໜຶ່ງ.

 

ໃນ​ການ​ຈັບ​ກຸມ​ຄັ້ງ​ນີ້ ນອກຈາກຢາ​ບ້າ ຈຳນວນ 10 ມັດ ຍັງ​ມີລົດ​ໃຫຍ່ 2 ຄັນ ແລະ ໂທລະສັບ 2 ໜ່ວຍ ທີ່​ນຳ​ໃຊ້​ເຂົ້າ​ໃນ​ການເຄື່ອນ​ໄຫວ​ຄ້າຂາຍ​ຢາ​ເສບ​ຕິດ ຜ່ານ​ການ​ສອບ​ສວນຜູ້ກ່ຽວ​ສະລະ​ພາບ​ວ່າ: ຢາ​ບ້າ​ຈຳນວນ​ດັ່ງກ່າວ ແມ່ນ​ໄດ້​ຊື້​ມາ​ຈາກ​ຜູ້​ຮ່ວມຂະ​ບວນ​ການເພື່ອ​ມາ​ນຳ​ຈຳໜ່າຍ ປັດຈຸບັນ ຄະດີ​ດັ່ງກ່າວ​ຍັງຢູ່​ໃນ​ການ​ຮວບ​ຮວມ​ຂໍ້​ມູນ​ຫຼັກຖານ​ຂອງ​ເຈົ້າ​ໜ້າທີ່ ເພື່ອ​ສືບ​ຫາຂະ​ບວນ​ການ ແລະ ດຳເນີນ​ຄະດີຕາມ​ລະບຽບ​ກົດໝາຍ.

 

 

ຂໍ້ມູນຈາກ: ວຽງຈັນໃຫມ່

 

ຄວາມຄິດເຫັນຂອງຜູ້ອ່ານ (0)