GMT+7 24/10/2017 05:38

ຕ່ຳຫູກເປັນອາຊີບເສີມໃນຄອບຄົວ ກ້າວເປັນກຸ່ມຫັດຖະກຳ

 

 

ປະຊາຊົນ​ສ່ວນ​ໃຫຍ່​ທີ່​ອາໄສຢູ່​ບ້ານ​ອ່າງ​ນ້ຳ​ຫຸມ ເມືອງ​ນາ​ຊາຍທອງ ນະຄອນຫຼວງ​ວຽງ​ຈັນ ໄດ້ປະກອບ​ອາຊີບ​ຕ່ຳຫູກ ແລະ ທໍ່ໄໝເປັນ​ອາຊີບ​ເສີມ ເພື່ອ​ສ້າງລາຍ​ຮັບ​ໃຫ້​ກັບ​ຄອບຄົວ ເຊິ່ງ​ປະກອບມີ 350 ຫຼັງຄາ​ເຮືອນ ໃນນັ້ນ ໄດ້​ຕ່ຳຫູກມີ 205 ຄອບຄົວ ໃນ​ທົ່ວ​ບ້ານ ເພື່ອ​ໃຫ້​ທັນ​ກັບ​ການສັ່ງ​ຈອງ​ຂອງ​ລູກ​ຄ້າ​ໄດ້​ສ້າງຕັ້ງເປັນ​ກຸ່ມ​ຫັດຖະກຳ ປັດຈຸບັນ ກຳລັງ​ສະເໜີ​ເຂົ້າ​ເປັນ​ສິນຄ້າ​ໂອດ໋ອບ​ຂອງ​ເມືອງ​ດັ່ງກ່າວ.

 

ທ່ານ​ນາງ ຄຳ​ພາ ແກ້ວ​ສະຫວາດ ຫົວໜ້າ​ກຸ່ມ​ຫັດຖະກຳ​ຕ່ຳຫູກບ້ານ​ອ່າງ​ນ້ຳ​ຫຸມ ໃຫ້​ຮູ້​ວ່າ: ຕົນ​ໄດ້​ເລີ່ມ​ຮຽນ​ຕ່ຳຫູກ​ມາ​ແຕ່​ຍັງນ້ອຍ ຈົນ​ມາ​ຮອດ​ປັດຈຸບັນ ໄດ້ເປັນ​ພະນັກງານ ຕົນ​ຍັງ​ໄດ້​ຕ່ຳຫູກເປັນ​ອາຊີບ​ເສີມ ສາມາດ​ເວົ້າ​ໄດ້ວ່າ ມີ​ຄວາມ​ຊຳນິ​ຊຳນານ​ດ້ານການ​ຕ່ຳຫູກ ເພື່ອ​ຕອບ​ສະໜອງຕາມ​ຄວາມ​ຕ້ອງການ​ຂອງ​ຜູ້​ຊົມໃຊ້ ກໍ່​ຄືຕະຫຼາດ ແລະ ຄວາມຕ້ອງການ​ຂອງ​ລູກ​ຄ້າ​ໃຫ້​ທັນ​ກັບເວລາ ຕົນ​ຈິ່ງ​ໄດ້​ເຕົ້າໂຮມ​ເອື້ອຍນ້ອງ​ແມ່ຍິງ​ພາຍ​ໃນ​ບ້ານ​ອ່າງ​ນ້ຳ​ຫຸມ​ສ້າງຕັ້ງ​ເປັນ​ກຸ່ມ​ຫັດຖະກຳ ໃນ​ປີ 2016 ມີ​ສະມາຊິກ​ເຂົ້າຮ່ວມ ຈຳນວນ 90 ຄົນ ປະກອບມີ 90 ກີ່ ໃນ​ນີ້ໄດ້​ແບ່ງ​ອອກເປັນ​ຈຸເປັນ​ໜ່ວຍ ແລະ ມີ​ຕົວແທນ ກໍ່​ຄືຄະນະ​ຊີ້​ນຳ ຈຳນວນ 5 ຄົນ ທີ່​ແບ່ງ​ຄວາມ​ຮັບຜິດຊອບຕໍ່​ສະມາຊິກ ແນໃສ່​ອຳນວຍຄວາມ​ສະດວກ​ສະບາຍ​ໃນ​ການຄຸ້ມ​ຄອງ ແລະ ການ​ຈັດ​ແບ່ງ​ຜົນໄດ້​ຮັບ ເຊິ່ງ​ປະກອບ​ມີຜະລິດ​ຕະພັນ​ຕີນ​ສິ້ນ​ນັກຮຽນ ນັກ​ສຶກ​ສາ ແລະ ຕີ້ນ​ສິນ​ທົ່ວ​ໄປ ນອກຈາກ​ນີ້ ຍັງ​ມີ​ຜືນ​ສິ້ນໄໝ ແພ​ບ່ຽງທຸກ​ຮູບແບບ ​ທີ່​ມີ​ລວດລາຍ ແລະ ສີສັນແຕກ​ຕ່າງ​ກັນ​ໄປ ພ້ອມ​ນັ້ນ ຍັງສາມາດ​ຮັບ​ຕ່ຳ​ຕາມ​ລວດລາຍ​ທີ່ລູກ​ຄ້າ​ຕ້ອງການ​ຕື່ມ​ອີກ ມີ​ລາຄາຂາຍ​ເລີ່ມ​ຕົ້ນ​ແຕ່ 22 ພັນ​ກີບ ຫາສູງ​ສຸດ 1 ລ້ານ​ກວ່າ​ກີບ ສະເລ່ຍລາຍ​ຮັບ​ເດືອນ​ໜຶ່ງ ປະມານ 10-15 ລ້ານ​ກີບຕໍ່​ຈຸ ຫຼື ຕໍ່​ໜ່ວຍ ສຳລັບ​ຕະຫຼາດ​ຈຳໜ່າຍ​ຫຼັກ​ແມ່ນສົ່ງ​ຕາມ​ຮ້ານ​ຂາຍ​ສິ້ນ​ຢູ່​ຕະຫຼາດຂົວ​ດິນ ແລະ ຕະຫຼາດ​ເຊົ້າ ນອກນັ້ນ ມີ​ລູກ​ຄ້າ​ຢູ່​ແຂວງ​ຕ່າງໆ​ໃນທົ່ວ​ປະເທດ​ຈຳນວນ​ໜຶ່ງ.

 

 

ຂໍ້ມູນຈາກ: ວຽງຈັນໃຫມ່

 

ຄວາມຄິດເຫັນຂອງຜູ້ອ່ານ (0)