GMT+7 24/10/2017 05:35

ປາແດກອົບແຫ້ງສຳເລັດຮູບ ຮຸ່ງເຮືອງສິນໄດ້ຮັບຄວາມນິຍົມສູງ ຢູ່ນະຄອນຫລວງວຽງຈັນ

 

 

ຜະລິດຈະພັນສຳເລັດຮູບປາແດກ ຮຸ່ງເຮືອງສິນ ສາມາດສົ່ງຂາຍ​ໃນຕະຫລາດນະຄອນ ຫລວງວຽງຈັນ ​ແລະ ໄດ້ຮັບ​ຄວາມ​ນິຍົມ​ສູງເຖິງ 80%, ສ່ວນຕ່າງແຂວງມີພຽງ 20%. ນອກຈາກນີ້, ໃນປີ 2016 ທີ່ຜ່ານມາ ຜະລິດຕະພັນດັ່ງກ່າວ, ກໍໄດ້ຮັບລາງວັນອັນດັບ 3 ຈາກງານສິນຄ້າໂອດ໋ອບ ປະຈຳປີ ໜຶ່ງເມືອງ ໜຶ່ງຜະລິດຈະພັນ ຢູ່ ລາວ-ໄອເຕັກ ນະຄອນຫລວງວຽງຈັນ.

 

ທ່ານ ນາງ ວິໄລສິນ ເຕີນຕານ ​ໄດ້​​​ໃຫ້​ສຳ​ພາດຕໍ່ນັກຂ່າວ ສຳນັກຂ່າວສານປະເທດລາວວ່າ: ຖ້າທຽບໃສ່ 2 ປີ ຜ່ານມາຂອງໄລຍະດຽວກັນ ເຫັນວ່າການຕອບຮັບຂອງລູກຄ້າ ບວກກັບລົດຊາດອັນເປັນເອກະລັກ ແລະ ຄວາມນິຍົມຂອງສັງຄົມ ທີ່ໃຫ້ການຕອບຮັບສູງກ່ວາປີຜ່ານມາເຖິງ 40%. ດັ່ງ ນັ້ນ, ທາງໂຮງງານຈຶ່ງໄດ້ມີການປັບປຸງຮູບແບບ ຂອງພາສະນະທີ່ນຳມາປັນຈຸຜະລິດຕະພັນດັ່ງກ່າວ, ອອກມາໃນຮູບແບບໃໝ່ ທີ່ທັນສະໄໝກວ່າ ຮູບແບບເກົ່າ ທີ່ໄດ້ນຳໃຊ້ມາ 10 ກ່ວາປີ. ນອກຈາກນັ້ນ, ຍັງມີການເພີ່ມຜະລິດໃໝ່ຂຶ້ນມາອີກ 2 ຊະນິດ ທີ່ນຳໄປວາງຂາຍພຽງສອງເດືອນຜ່ານມາ ມີປາແດກດຳຕົ້ມ ແລະແຈ່ວຈິ້ງຫລີດ, ພິ​ເສດ ​ໃນ​ໄລຍະເດືອນກັນຍາ ຫາ ທ້າຍເດືອນຕຸລາ ເພື່ອ​ເປັນ​ການຕອບແທນ ລູກຄ້າ ທາງໂຮງງານໄດ້ມີໂປໂມຊັນພິເສດ ສະເພາະປາແດກດຳຕົ້ມຄື: ຈາກປົກກະຕິລາຄາ 2 ​ແສນກີບ/ໂຫລ ຫລຸດເຫລືອພຽງ 160 ພັນກີບ/ໂຫລ, ສ່ວນປາແດກທົ່ວໄປ ແມ່ນຂາຍປົກກະຕິ.

 

ທ່ານ ນາງ ວິໄລສິນ ຍັງໃຫ້ຮູ້ຕື່ມວ່າ: ນັບແຕ່ສ້າງຕັ້ງໂຮງງານ ຮຸ່ງເຮືອງສິນ ມາບໍ່ວ່າຈະພົບກັບວິກິດການແນວໃດກໍ​ຕາມ ຫລື ລາຄາປາບໍ່​ປົກກະຕິ ແຕ່ໂຮງງານພວກ​ເຮົາ ແມ່ນບໍ່ມີການປ່ຽນແປງ ຫລື ປັບຂຶ້ນດ້ານລາຄາ​ແຕ່ໃດ. ນອກຈາກປາແດກສຳເລັດຮູບແລ້ວ ໂຮງງານຮຸ່ງເຮືອງສິນ ຫຍັງມີ ແຈ່ວພັນປາ, ແຈ່ວຊີ້ນດາດ ແລະ ແຈ່ວລູກຊີ້ນ ທີ່ມີລົດຊາດແຊບບໍ່ຄືໃຜ. ພ້ອມ​ນີ້, ​ຂໍ​ເຊີນຊວນພີ່ນ້ອງຊາວລາວ ຊ່ວຍອຸດໜູນສິນຄ້າຜະລິດ​ຕະພັນຂອງຄົນລາວ​ເຮົາ, ທັງ​ເປັນ​ການສົ່ງ​ເສີມຜະລິດ​ຕະພັນຂອງຄົນລາວ​ ເຮົາ​​ໃຫ້ໄດ້​ມີ​ການ​ພັດທະນາ ​​ແລະ ຈະເລີນກ້າວໜ້າ​​ໄປ​ເລື້ອຍໆ ທີ່​ສຳຄັນ​ແມ່ນຫລຸດພົ້ນຈາກຄວາມທຸກຍາກ. ສຳລັບລາຄາຂວດນ້ອຍແມ່ນ ລາຄາ 6.000 ກີບ/ຂວດ (60.000 ກີບ/ໂຫລ) ແລະ ຂວດໃຫຍ່ 15.000 ກີບ/ຂວດ (160.000/ໂຫລ).

 

 

ຂໍ້ມູນຈາກ: ສຳນັກຂ່າວສານປະເທດລາວ

 

ຄວາມຄິດເຫັນຂອງຜູ້ອ່ານ (0)