GMT+7 24/10/2017 05:38

ປກສ ເມືອງປາກທາຈັບກຸມຜູ້ຄ້າຢາເສບຕິດລາຍໃຫຍ່

 

 

 ເຈົ້າໜ້າທີ່ສະເພາະກິດ ກອງບັັັນຊາການ ປກສ ເມືອງປາກທາ ແຂວງບໍ່ແກ້ວ ຈັບກຸມຜູ້ຖືກຫາພ້ອມຂອງກາງຢາບ້າ 6 ເປົາ ຂະນະ​ທີ່​ພວມ​ເຄື່ອນ​ຍ້າຍ​ຢາ​ບ້າ.


ທ່ານ ພັທ ແສງຄຳ ອິນທະນິນ ກຳມະການພັກເມືອງ ຫົວໜ້າກອງບັນຊາການ ປກສ ເມືອງປາກທາແຂວງບໍ່ແກ້ວຖະແຫລງການຕໍ່ການ ຈັບກຸມຢາເສບຕິດໃນຄັ້ງນີ້ວ່າ: ໃນວັນທີ 23 ກັນຍາ 2017 ໄດ້ມີແຫລ່ງຂ່າວ ຈາກພົນລະເມືອງດີ ແຈ້ງວ່າ ຈະມີການຂົນສົ່ງຢາເສບຕິດ ຜ່ານຈາກເມືອງປາກທາ ສູ່ເມືອງຫ້ວຍຊາຍ ສະນັ້ນ ກອງບັນຊາການຂອງພວກເຮົາ ຈຶ່ງໄດ້ແຕ່ງຕັ້ງ ເຈົ້າໜ້າທີ່ສະເພາະກິດ ອອກຕິດ ຕາມຫາເປົ້າໝາຍ ມາຮອດເວລາປະມານ 17 ໂມງ 30 ນາທີ ໄດ້ພົບເຫັນລົດກະບະວີໂກ້ແຊັມສີຂາວ ໝາຍເລກທະບຽນ ກຳແພງນະຄອນ ມດ 9992 ແລ່ນມຸ່ງໜ້າເຂົ້າ ສູ່ເມືອງຫ້ວຍຊາຍ, ຂ້ອນຂ້າງ ມີພິລຸດຜິດ ປົກກະຕິເຈົ້າໜ້າທີ່ຈຶ່ງໄດ້ສະແດງຕົວ ເຂົ້າກວດຄົ້ນລົດຄັນດັ່ງກ່າວ ເຊິ່ງຂັບຂີ່ໂດຍທ້າວ ເຢະປໍວ່າ ອາຍຸ 42 ປີ ອາຊີບຄ້າຂາຍ ແລະ ນາງ ໄມວາງວື ອາຍຸ 20 ປີ ທັງສອງອາໃສຢູ່ ບ້ານ ຈອມຈຸກ ເມືອງຫ້ວຍຊາຍ ແຂວງບໍ່ແກ້ວ ຜ່ານການກວດຄົ້ນໄດ້ພົບເຫັນ ຢາເສບຕິດປະເພດຢາບ້າ ຈຳນວນ 6 ເປົາ, ຫຼື 96 ແພ໋ກ ເທົ່າກັບ 480 ມັດ ຊຸກຢູ່ໃນລົດ ເຈົ້າໜ້າທີ່ຈຶ່ງໄດ້ກັກຕົວທັງສອງ ພ້ອມດ້ວຍຂອງກາງ ເພື່ອສືບສວນສອບສວນ ຂະຫຍາຍຜົນ ຫາຄູ່ຮ່ວມຂະບວນການລາຍນີ້ ມາດຳເນີນຄະດີ ຕາມລະບຽບກົດໝາຍ.

 

 

ຂໍ້ມູນຈາກ: ສຳນັກຂາ່ວສານປະເທດລາວ

 

ຄວາມຄິດເຫັນຂອງຜູ້ອ່ານ (0)