ເມືອງ​ສີ​ສັດຕະ​ນາກ ນະຄອນຫຼວງ​ວຽງ​ຈັນ ຜ່ານ​ມາ​ໄດ້​ຈັດ​ພິທີ​ເປີດ​ປ້າຍ ແລະ ມອບ​ໃບ​ອະນຸຍາດ​ນຳ​ໃຊ້​ກາ​ໝາຍ​ສິນຄ້າ ​ໜຶ່ງເມືອງ​ໜຶ່ງ​ຜະລິດ​ຕະ​ພັນ​ແຫ່ງຊາດ ຫຼື ໂອ​ດ໋ອບ (ODOP) ຄັ້ງທຳ​ອິດ​ວິ​ສາ​ຫະ​ກິດ​ສ່ວນ​ບຸກຄົນ ຜະລິດ​ຕະ​ພັນ​ປາແດກ​ຮຸ່ງເຮືອງສິນຂອງ​ທ່ານ​ນາງ ວິໄລ​ສິນ ບ້ານ​ຈອມ​ເພັດ​ເໜືອ ໃນ​ຄັ້ງ​ວັນ​ທີ 18 ມິຖຸນາ 2013 ຈາກ​ນັ້ນ ກໍ່​ມີການ​ສືບຕໍ່​ຊຸກຍູ້​ຂະ​ບວນ​ການ​ຈົນມາ​ເຖິງ​ວັນ​ທີ 21 ກັນຍາ 2017 ໄດ້​ຈັດ​ພິທີ​ປະກາດ​ຕິດ​ກາ​ໝາຍໂອ​ດ໋ອບ ເປັນ​ຫົວໜ່ວຍ​ທີ 6 ຂອງເມືອງ ແລະ ຫົວໜ່ວຍ 40 ຂອງ ນວ ຄື: ວິ​ສາ​ຫະ​ກິດ​ສ່ວນ​ບຸກຄົນ ຮ້ານ​ແຕ໋ງ​ໄໝ-ຝ້າຍ​ຄູ​ວຽງຂອງທ່ານ ບົວ​ລຳ​ເພັດ ອິນ​ທະ​ສານ ບ້ານ​ພະ​ໄຊ ປະກອບ​ມີ 2 ຜະລິດຕະ​ພັນຊຸດ​ຜ້າ​ຝ້າຍ ແລະ ຊຸດ​ຜ້າໄໝ​ຍິງ-ຊາຍ.

ທ່ານ ບົວ​ລຳ​ເພັດ ອິນ​ທະ​ສານ ເຈົ້າ​ຂອງ​ວິ​ສາ​ຫະ​ກິດ​ສ່ວນ​ບຸກຄົນຮ້ານ​ແຕ໋ງ​ໄໝ-ຝ້າຍ​ຄູ​ວຽງ ກ່າວວ່າ: ເລີ່ມ​ສ້າງຕັ້ງ​ມາ​ແຕ່​ປີ 2000 ດ້ວຍ​ທຶນ 99 ລ້ານ​ກີບ ແຕ່​ກ່ອນແມ່ນ​ຢູ່​ແຂວງ​ສະຫວັນ​ນະ​ເຂດ ໂດຍ​ເລີ່ມ​ຈາກ​ກີ່​ຕ່ຳຫູກ 10 ກີ່ ຕ່ຳສິ້ນໄໝ ແລະ ແຜ່ນແພ ມີ​ກຸ່ມ​ຕັດຫຍິບ 15 ຄົນ ໄດ້​ອອກ​ແບບ​ເສື້ອເຄື່ອງນຸ່ງ​ທັງ​ຍິງ-ຊາຍ ຍ້ອນ​ການພັດທະນາ​ເສດຖະກິດ-ສັງຄົມ ຮ້ານ​ຂອງ​ພວກ​ເຮົາ​ກໍ່​ສືບຕໍ່​ພັດ​ທະນາ​ຮູບ​ແບບ​ທີ່​ທັນ​ສະໄໝ ປະສົມປະສານ​ກັບ​ສີໄມ້ລາຍມື​ມໍລະດົກອັນ​ລ້ຳ​ຄ່າ ປັດຈຸບັນ ມີ​ກີ່​ຕ່ຳຫູກ 20 ກີ່ ພ້ອມ​ກັບ​ຂະຫຍາຍ​ສາຂາພາຍ​ໃນ​ນະຄອນຫຼວງ ແລະ ແຂວງ​ໃກ້​ຄຽງ.

ເຂົ້າ​ຮ່ວມ​ພິທີ​ເປີດ​ກາ​ໝາຍ​ໂອດ໋ອບ​ມີ​ທ່ານ ໂພ​ຄຳ ໄຊ​ຍະ​ສອນ ເຈົ້າເມືອງ​ສີ​ສັດຕະ​ນາກ ທ່ານ ເບີ​ລິນ ເພັດ​ຈັນທະ​ຣາດ ຫົວໜ້າພະ​ແນກ​ອຸດສາຫະກຳ ແລະ ການ​ຄ້າ ນວ ທ່ານ ສົມ​ຫວັງ ນິນທະ​ວົງ ຫົວໜ້າ​ກົມ​ສົ່ງເສີມ ແລະ ພັດທະນາ​ສິນຄ້າ ກະຊວງ​ອຸດ​ສາຫະ​ກຳ ແລະ ການ​ຄ້າ ແລະ ພາກສ່ວນ​ກ່ຽວຂ້ອງ.