GMT+7 24/10/2017 05:35

ບັນດາປະເທດ ລຸ່ມແມ່ນ້ຳຂອງ ຮ່ວມຫາລື ສົ່ງເສີມທຸລະກິດ ການທ່ອງທ່ຽວ

 

 

ຂປລ. ບັນດາ​ຕົວ​ແທນ ​ຈາກ​ສະມາຄົມ ທຸລະ​ກິດ​ການທ່ອງທ່ຽວ ​ແລະ ກຸ່ມ​ບໍລິສັດທ່ອງທ່ຽວ ຫລາຍ​ກວ່າ 20 ທ່ານ, ຈາກ 5 ປະ​ເທດ​ ຂົງ​ເຂດ​ລຸ່ມ​ແມ່​ນ້ຳຂອງ ມີ ກຳປູ​ເຈຍ, ສປປ ລາວ, ມຽນມາ, ​ ສສ ຫວຽດນາມ ແລະ  ຣາຊະ​ອານາຈັກ​ໄທ (CLMVT)​, ໄດ້​ເຂົ້າ​ຮ່ວມ​ກອງ​ປະຊຸມ​ ພົບ​ປະປຶກສາ​ຫາລື ​ແລະ ​ແລກປ່ຽນ​ຄວາມ​ຄິດ​ເຫັນ ​​ໃນ​ວັນ​ທີ 19 ກັນຍາ 2017 ​ທີ່​ບາງກອກ ປະ​ເທດ​ໄທ, ເພື່ອ​ແນ​ໃສ່​ສົ່ງ​ເສີມ ​ແລະ ພັດທະນາ​ ຕະຫລາດການທ່ອງທ່ຽວ ຢູ່​ 5 ປະ​ເທດ ​ໃຫ້​ດີ​ຂຶ້ນ​ກວ່າ​ເກົ່າ.

 

​ປະ​ເທດ​ໄທ ມີ​ຊາຍ​ແດນ​ຕິດ​ຈອດ​ກັບ 4 ປະ​ເທດ (CLMV). ດັ່ງ​ນັ້ນ, ລັດຖະບານ​ໄທ ຈຶ່ງ​ມີ​ນະ​ໂຍບາຍ​ສົ່ງ​ເສີມ ​ແລະ ​ໃຫ້​ຄວາມ​ສຳຄັນ ຕໍ່ການ​ພັດທະນາ​ເຊື່ອມ​​ໂຍງ​ ຕະຫລາດ​ທຸລະ​ກິດທ່ອງທ່ຽວ ພາຍ​ໃນ​ປະ​ເທດ​ຕົນ, ​​ໂດຍ​ສະ​ເພາະ ​ບັນດາ​ເມືອງ​ທີ່ໜ້າທ່ຽວເຊັ່ນ: ​ເມືອງ​ຊຽງ​ໃໝ່, ຊຽງ​ຣາຍ, ພູ​ເກັດ, ຫົວ​ຫີນ ​ແລະ ​ເມືອງ​ອື່ນໆ​ເພື່ອ​ເຊື່ອ​ມໂຍງກັບ​ ບັນດາ​ຕົວ​ເມືອງທ່ອງທ່ຽວ ຂອງ​ບັນດາ​ປະ​ເທດ CLMV ​ໃຫ້​ຫລາຍ​ຂຶ້ນ.

 

ທ່ານ ຣິພັນ ບຸນນາກ ຫົວໜ້າກົມ​ສົ່ງ​ເສີມ ການທ່ອງທ່ຽວ ພາຍ​ໃນ​ປະ​ເທດໄທ ກ່າວ​ວ່າ: ​ເປົ້າໝາຍຂອງການ​ພົບ​ປະ​ຫາລື ​ແມ່ນ​ເພື່ອ​​ເສີມຂະຫຍາຍ ການ​ພົວພັນ​ຮ່ວມ​ມື ຊອກ​​ວິທີ​ສະໜັບສະໜູນ ຊ່ວຍ​ເຫລືອ ເຊິ່ງກັນ ​ແລະ ກັນ ​ເພື່ອ​ຜົນ​ປະ​ໂຫຍ​ດຮ່ວມ​ກັນ. ທັງ​ນີ້, ​ເນື່ອງ​ຈາກ​ວ່າ​ທຸລະ​ກິດ​ຂອງ​ແຕ່ລະ​ປະ​ເທດ ບໍ່ສາມາດ​ຢູ່​ໂດດດ່ຽວ​ໄດ້.

 

​ການເຂົ້າ​ຮ່ວມ​​ພົບ​ປະ​​ຄັ້ງ​​ນີ້, ສປປ ລາວ ມີ ​ທ່ານ ບຸນ​ທອງ ນັນທະ​ວົງ ຮອງ​ປະທານສະມາຄົມ​ ທຸ ລະ​ກິດ​ທ່ອງ​ທ່ຽວລາວ ​ແລະ ທ່ານ ​ບົວ​ຂາວ ພົມ​ສຸວັນ ຄະນະ​ບໍລິຫານ​ງານ ສະພາ​ການ​ຄ້າ ​ແລະ ອຸດ ສາຫະກຳ​ແຫ່ງ​ຊາດ, ທັງ​ເປັນ​ທີ​ປຶກສາ ​ສະມາຄົມ​ທຸລະ​ກິດ​ ທ່ອງ​ທ່ຽວລາວ ​ເຊິ່ງຈະ​ໄດ້​ຮຽນ​ຮູ້​ ແລະ ​ແລກ ປ່ຽນ​ບົດຮຽນ​ກັບ ບັນດາ​ປະ​ເທດ​ລຸ່ມ​ແມ່​ນ້ຳຂອງ ​ເພື່ອ​ນຳ​ໄປ​ພັດທະນາ​ທຸລະ​ກິດ ການທ່ອງທ່ຽວຂອງ​ລາວ​ ໃຫ້​ມີ ໝາກຜົນ​ດີ​ຂຶ້ນກວ່າ​ເກົ່າ, ​ໂດຍ​ສະ​ເພາະ​ ການ​ເຊື່ອມ​ໂຍງ​ການທ່ອງທ່ຽວ ​ໃຫ້​ມີ​ປະສິດທິ​ພາບສູງ​ຂຶ້ນ.

 

 

ແຫຼ່ງຂ່າວ: ສຳນັກຂ່າວສານປະເທດລາວ

ຄວາມຄິດເຫັນຂອງຜູ້ອ່ານ (0)