GMT+7 24/10/2017 05:33

ເປີດງານເດີນແບບ-ເສື້ອຜ້າ ອາພອນ ລາວແຟຊັນວີກ ທີ່ວຽງຈັນ

 

 

ຂປລ. ງານເດີນແບບສະແດງ ເສື້ອຜ້າອາພອນ ລາວແຟຊັນວີກ ຮອບປະຖົມມະເລີກ ໄດ້ຈັດຂຶ້ນ ຢ່າງເປັນທາງການ ໃນວັນທີ 12 ກັນຍາ 2017 ທີ່ໂຮງແຮມ ຄຮາວ ພລາຊາ ນະຄອນຫລວງວຽງຈັນ, ໂດຍການເປັນປະທານ ຂອງທ່ານ ນາງ ປານີ ໄຊຍະວົງສ ອຳນວຍການລາວແຟຊັນວີກ ແລະ ໂຄງການພັດທະນາ ນັກອອແບບໜຸ່ມນ້ອຍຂອງລາວ, ມີ ທ່ານ ສົມສະໜຸກ ມີໄຊ ຮອງປະທານສະມາຄົມນັກຂ່າວແຫ່ງ ສປປ ລາວ, ທັງ​ເປັນປະທານ​ສະພາ​ບໍລິຫານ​ລາວ​ແຟຊັນ​ວີກ ແລະ ໂຄງການພັດທະນາ ນັກອອກແບບໜຸ່ມນ້ອຍຂອງລາວ ແລະ ທ່ານ ນາງ ໂກລດີນ ເລີດູ ເອກອັກຄະລັດຖະທູດຝຣັ່ງ ປະຈຳລາວ, ພ້ອມດ້ວຍແຂກຖືກເຊີນ ​ແລະ ນັກອອກແບບ ທີ່ມີຊື່ສຽງ ທັງພາຍໃນ ແລະ ຕ່າງປະເທດ ເຂົ້າຮ່ວມເຊັ່ນ: ຄັ່ງ (ລາວ), Ministry of Silk (ລາວ), Voravaj Bangkok (ໄທ), Armada Asia (ຟິລິປິນ-ກຳ ປູເຈຍ), EAGGAMON (ໄທ), JUIUS TAROG (ຟິລິປິນ), Quoc Binh (ຫວຽດນາມ) ແລະ Embran Nawawi  (ອິນໂດເນເຊຍ),  ເຊິ່ງຜົນງານການອອກແບບ ທີ່ມີຄວາມສວຍງາມ​ເປັນ​ພິ​ເສດ ​ແລະ ຈະສ້າງຄວາມຕື່ນຕາຕື່ນໃຈໃຫ້​ແກ່ແຂກ ທີ່ເຂົ້າຮັບຊົມ.

 

ຈຸດປະສົງ​ໃນການຈັດງານຄັ້ງນີ້, ເພື່ອສະແດງເຖິງທ່າແຮງຂອງວົງການແຟຊັນ ແລະ ການອອກແບບຂອງລາວ, ທັງສ້າງໂອກາດໃຫ້ນັກອອກແບບຂອງລາວ ມີໂອກາດພັດທະນາວິຊາຊີບ ການອອກແບບ,ສົ່ງເສີມ ອຸດສາຫະກຳດ້ານແຜ່ນແພລາວ ໃຫ້ເປັນທີ່ນິຍົມຢ່າງກວ້າງຂວາງ, ພ້ອມທັງສ້າງຄວາມເຂົ້າໃຈໃຫ້ສາກົນ ວ່າ ສປປ ລາວ ເປັນປະເທດໜຶ່ງ ທີ່ມີທ່າແຮງໃນການຕອບສະໜອງ ດ້ານວົງການອອກແບບ ແລະ ແຟຊັນຂອງໂລກ, ໂດຍມີເອກະລັກ ແລະ ວັດທະນະທຳທີ່ສວຍ​ສົດ​ງົດງົດງາມ.

 

ທ່ານ ນາງ ປານີ ໄຊຍະວົງສ ກ່າວວ່າ: ສັບປະດາແຫ່ງການສະແດງອາພອນ ຫລື ລາວແຟຊັນວີກ 2017  ໄດ້ເລີ່ມເປີດຢ່າງ​ເປັນ​ທາງ​ການ ໃນວັນ 11 ຫາ 15 ກັນຍານີ້, ຊຶ່ງມີບັນດານັກອອກແບບເກືອບ 50 ທ່ານ,ທັງພາຍໃນ ແລະ ຕ່າງປະເທດເຂົ້າຮ່ວມສະແດງຜົນງານ. ​ໃນແຕ່ລະມື້ນັກອອກແບບຈະມີການພັດປ່ຽນສະແດງຜົນງານ ທີ່ໂຮງ​ແຮມ​ດັ່ງກ່າວ.

 

 

ແຫຼ່ງຂ່າວ: ສຳນັກຂ່າວສານປະເທດລາວ

ຄວາມຄິດເຫັນຂອງຜູ້ອ່ານ (0)