ຄວັນຈາກໂຮງງານ ສີມັງຈີນ ຍັງແກ້ບໍ່ໄດ້!

ຊາວເມືອງວັງວຽງແຂວງວຽງຈັນ ຫຼາຍຄົນຮູ້ສຶກເບື່ອໜ່າຍ ກັບບັນຫາການປ່ອຍຄວັນ ຂອງໂຮງງານຜະລິດ ສີມັງລາວວັງວຽງ ຂອງນັກລົງທຶນຈີນ, ເຊິ່ງເປັນບັນຫາຊຳເຮື້ອ ທີ່ເກີດຂຶ້ນມາຫຼາຍປີແລ້ວ, ແຕ່ກໍ່ບໍ່ໄດ້ຮັບການແກ້ໄຂຢ່າງເດັດຂາດ ແລະ ໂຮງງານ ກໍປ່ອຍຄວັນອອກມາຢູ່ເລື້ອຍໆ ເຮັດໃຫ້ປະຊາຊົນ ໃນເຂດບ້ານທີ່ຢູ່ໃກ້ຄຽງ ຕ້ອງໄດ້ຮັບຜົນກະທົບ ຈາກໂຮງງານຢູ່ຕໍ່ໄປ, ດັ່ງຊາວບ້ານໃນເຂດເມືອງວັງວຽງ ທ່ານໜື່ງ ໄດ້ກ່າວຕໍ່ຜູ້ສື່ຂ່າວວິທະຍຸເອເຊຍ ເສຣີ ໃນມື້ວັນທີ 12 ສິງຫາ ນີ້ວ່າ: “ຄວັນຂອງມັນເນາະ ມີແຕ່ເລາະໆລຽບທາງ ສ່ວນຫຼາຍແມ່ນບ້ານຂັນໝາກ, ບ້ານໂພນຊູ, ຫ້ວຍງາມ, ວັງໝ້ຽງ ເຂດນີ້ ແລະເລາະແຄມທາງ ຂອບເຂດແຄມທາງນີ້ແຫຼະ ຕິດກັບໂຮງງານສີມັງ. ຢູ່ໂພນສູງແທ້ກະບໍ່ຮອດ.”
ກ່ອນໜ້ານີ້, ຜູ້ສື່ຂ່າວວິທຍຸເອເຊຍ ເສຣີ ໄດ້ສອບຖາມໄປຍັງເຈົ້າໜ້າທີ່ ຂັ້ນທ້ອງຖິ່ນຄົນໜື່ງ ໃນເມືອງວັງວຽງ, ເຊິ່ງນາງກ່າວວ່າ ບັນຫາຄວັນຈາກໂຮງງານ ສີມັງ ແຫ່ງດັ່ງກ່າວ ຍັງເກີດຂື້ນແທ້ ຍ້ອນຍັງບໍ່ມີການແກ້ໄຂທີ່ເດັດຂາດ ແລະ ຂາດຄວາມເອົາໃຈໃສ່ຕໍ່ສິ່ງແວດລ້ອມ, ເຖິງແມ່ນວ່າທາງບ້ານ ຈະສະເໜີ ໃຫ້ທາງເມືອງ ໄປເວົ້າກັບທາງໂຮງງານ ໃຫ້ຢຸດປ່ອຍຄວັນກໍ່ຕາມ, ແຕ່ກໍ່ບໍ່ມີຫຍັງເກີດຂື້ນ. ດັ່ງນາງກ່າວວ່າ: “ໄປຫາເມືອງເພິ່ນກະວ່າ ເອີ່ໆ! ຈະໃຫ້ທາງບໍລິສັດ ກວດເບິ່ງຄືນ ລະກະເວລາໄປປະຊຸມ ກະສະເໜີຢູ່ໂຕນິ້ີ້ນ່າ ເພິ່ນກະວ່າໄດ້ໆ ຫາກຊິສະເໜີຕໍ່ ຫາກຊິບອກເພິ່ນເຮັດ ບໍລິສັດເພິ່ນກະຮັບ ຮັບລະບໍ່ປະຕິບັດ.”
ກ່ຽວກັບບັນຫານີ້ ຜູ້ສື່ຂ່າວ ໄດ້ຕິດຕໍ່ ໄປຍັງຫ້ອງການຊັບຍາກອນທຳມະຊາດ ແລະ ສິ່ງແວດລ້ອມ ເມືອງວັງວຽງ ເພື່ອສອບຖາມເຖິງມາດຕະການ ໃນການແກ້ໄຂບັນນີ້, ແຕ່ເຈົ້າໜ້າທີ່ກ່ຽວຂ້ອງ ຍັງບໍ່ສະດວກທີ່ຈະໃຫ້ຄວາມເຫັນ.
ຢ່າງໃດກໍ່ຕາມ, ເຈົ້າໜ້າທີ່ສາທາລະນະສຸກ ເມືອງວັງວຽງ ກໍເຄີຍຊີ້ແຈງຕໍ່ຜູ້ສື່ຂ່າວວ່າ: ຄວັນທີ່ປ່ອຍອອກຈາກໂຮງງານ ແລະ ຝຸ່ນຕາມແຄມທາງ ທີ່ເກີດຈາກ ລົດບັນທຸກຂອງບໍລິສັດນັ້ນ ມີໂອກາດເຮັດໃຫ້ປະຊາຊົນ ໃນເຂດບ້ານໃກ້ຄຽງ ໄດ້ຮັບຜົນກະທົບ ອັນບໍ່ດີຕໍ່ສຸຂພາບແທ້.
ນອກຈາກບັນຫາການປ່ອຍຄວັນແລ້ວ, ໂຮງງານ ສີມັງລາວວັງວຽງ ຍັງສ້າງບັນຫາການຖິ້ມຂີ້ເຫຍື້ອຊະຊາຍຢູ່ຕໍ່ມາ, ອັນໄດ້ສ້າງຄວາມເດືອດຮ້ອນ ຕໍ່ປະຊາຊົນທີ່ອາໃສຢູ່ໃກ້ກັບໂຮງງານ ແລະ ບໍ່ພຽງແຕ່ເທົ່ານັ້ນ ລົດບັນທຸກທີ່ແລ່ນເຂົ້າ-ອອກ ໂຮງງານດັ່ງກ່າວ ກໍ່ເປັນສ່ວນໜື່ງ ທີ່ເຮັດໃຫ້ທາງເລກທີ 13 ເໜືອ ມີສະພາບເປ່ເພ ຍ້ອນຮັບນ້ຳໜັກລົດບັນທຸກບໍ່ໄຫວ.

 

Leave a Reply

Your email address will not be published. Required fields are marked *