ສູນພັດທະນາສີມືແຮງງານແຂວງສະຫວັນນະເຂດ ຍົກລະດັບສີມືແຮງງານ ສາຂາຊ່າງຕິດຕັ້ງໄຟຟ້າໃນອາຄານ

ໃນຕອນເຊົ້າຂອງວັນທີ 12 ສິງຫາ 2019 ທີ່ຜ່ານມາ ຢູ່ທີ່ສູນພັດທະນາສີມືແຮງງານແຂວງສະຫວັນນະເຂດ ໄດ້ຈັດໃຫ້ມີພິທີເປີດການທົດສອບສິມືແຮງງານ ສາຂາຊ່າງຕິດຕັ້ງໄຟຟ້າໃນອາຄານ ລະດັບ 2 (ວິຊາຊີບເຄິ່ງຊໍານານງານ) ໂດຍພາຍໃຕ້ການເຂົ້າຮ່ວມຂອງທ່ານ ຄຳພູນ ຕຸໄພທູນ ຮອງເຈົ້າແຂວງສະຫວັນນະເຂດ, ທ່ານ ບຸນລົບ ໂຄດຫຼັກຄຳ ຫົວໜ້າພະແນກແຮງງານ-ສະຫວັດດີການສັງຄົມແຂວງ, ທ່ານ ໄທ ແສງອາລຸນ ຮອງຫົວໜ້າກົມພັດທະນາສີມືແຮງງານ-ຈັດຫາງານ.

ມີບັນດາຜູ້ຕາງໜ້າພະແນກການຂອງແຂວງ, ສະຖາບັນຂອງແຂວງ ແລະ ບັນດາເມືອງໃກ້ຄຽງເຂົ້າຮ່ວມ.

ທ່ານ ພູຂົງ ຈັນທະວີໄລ ຮອງຫົວໜ້າສູນພັດທະນາສີມືແຮງງານແຂວງ ໄດ້ລາຍງານໃຫ້ຮູ້ວ່າ:. ເພື່ອຕອບສະໜອງໄດ້ຕາມແຜນພັດທະນາເສດຖະກິດ-ສັງຄົມຂອງແຂວງ ແລະ ຄວາມຕ້ອງການຂອງສັງຄົມ, ກະຊວງແຮງງານ ແລະ ສະຫວັດດີການສັງຄົມ ຈຶ່ງໄດ້ອະນຸມັດງົບປະມານ ຈໍານວໜຶ່ງເພື່ອທໍາການທົດສອບມາດຕະຖານສີມືແຮງງານ ທີ່ສູນພັດທະນາສີມືແຮງງານແຂວງສະຫວັນະເຂດ ໃນສາຂາຊ່າງຕິດຕັ້ງໄຟຟ້າໃນອາຄານ ສີມືແຮງງານລະດັບ 2 (ວິຊາຊີບເຄິ່ງຊໍານານງານ).

ສໍາລັບການຈັດທົດສອບ ອອກໃບຢັ້ງຢືນສີມືແຮງງານ ແມ່ນເປັນບາດກ້າວ ມີຄວາມຫມາຍ ແລະ ຄວາມສໍາຄັນເປັນຢ່າງຍິ່ງ ເຊິ່ງເປົ້າໝາຍຜູ້ເຂົ້າທົດສອບທັງໝົດມາຈາກສະຖາບັນການສຶກສາ, ຫົວໜ່ວຍແຮງງານ ແລະ ຜູ້ປະກອບການອິດສະຫຼະທີ່ສົນໃຈຕ້ອງການເຂົ້າທົດສອບ.

ໃນການຈັດຕັ້ງປະຕິບັດ ມີຄະນະກໍາມະການຊີ້ນໍາລວມ ແລະ ຄະນະຊີ້ນໍາດ້ານວິຊາການທີມາຈາກກົມພັດທະນາສີມືແຮງງານ ແລະ ຈັດຫາງານ, ຄະນະກໍາມະການທົດສອບຮັບເຊີນຈາກວິທະຍາໄລເຕັກນິກວິຊາຊີບທັງພາກລັດ ແລະ ເອກກະຊົນ, ລັດວິສາຫະກິດໄຟຟ້າແຂວງສະຫວັນນະເຂດ, ສູນພັດທະນາສີມືແຮງງານ ແຂວງຈໍາປາສັກ ເຊິ່ງການຄົ້ນຄວ້າ ແລະ ກໍານົດຫົວບົດທົດສອບແມ່ນອີງໃສ່ ມາດຕະຖານສີມືແຮງງານແຫ່ງຊາດ.

ໃນການທົດສອບຄັ້ງນີ້ ແມ່ນຈະໄດ້ດຳເນີນໄປເປັນເວລາ 5 ວັນ ນັບແຕ່ວັນທີ 12-16 ສິງຫາ 2019 ໂດຍມີຜູ້ເຂົ້າຮັບການທົດສອບທັງໝົດ 40 ຄົນ. ໃນນີ້ມາຈາກ ບໍລິສັດນໍ້າຕານ ມິດລາວ ຈໍານວນ 21 ຄົນ, ບໍລິສັດພູນທະວີຊັບ ຈໍານວນ 5 ຄົນ, ນັກສຶກສາວິທະຍາໄລໄຊສົມບັດເຕັກໂນໂລຊີ ຈໍານວນ 11 ຄົນ ແລະ ຜູ້ປະກອບການອິດສະຫຼະ ຈໍານວນ 03 ຄົນ.

ຈາກນັ້ນ ທ່ານ ຄຳພູນ ຕຸໄພທູນ ຮອງເຈົ້າແຂວງສະຫວັນນະເຂດ ພ້ອມດ້ວຍແຂກທີ່ຖືກເຊີນ ກໍ່ໄດ້ຮ່ວມກັນເລາະຊົມສະຖານທີ່, ອຸປະກອນ ແລະ ເຄື່ອງມືໃນການທົດສອບ.

 

ແຫຼ່ງຂ່າວ: ວິທະຍຸກະຈາຍສຽງ ສະຫວັນນະເຂດ

Leave a Reply

Your email address will not be published. Required fields are marked *