ຈັບ ຜູ້ຖືກຫາ ຄະດີຄ້າຢາເສບຕິດ 4 ຄົນ ຂອງກາງ 492 ເມັດ

ທ້າວ ເບັງ ອາຍຸ 29 ປີ, ທ້າວ ໜູ ອາຍຸ 41 ປີ ແລະ ນາງ ບຸນຊູ ອາຍຸ 53 ປີ ທັງ 3 ຄົນ ຢູ່ບ້ານເວີນຂາວ ເມືອງໂຂງ ແຂວງຈຳປາສັກ ເປັນ ຜູ້ຖືກຫາ ຄະດີຄ້າຂາຍຢາເສບຕິດ ທີ່ທາງເຈົ້າໜ້າທີ່ ປກສ ເມືອງໂຂງ ແຂວງຈຳປາສັກ ກັກຕົວໄດ້ ໃນວັນທີ 9 ກໍລະກົດ 2019 ພ້ອມຂອງກາງ ຢາບ້າ 492 ເມັດ ໄປດຳເນີນຄະດີ. ຜູ້ຖືກຫາທັງ 3 ຄົນ ຍິງ 1 ຄົນ ນີ້ ແມ່ນຖືກພົນລະເມືອງດີແຈ້ງ ໃນວັນທີ 8 ກໍລະກົດ ວ່າ: ມີກຸ່ມຄົນບໍ່ດີຈຳນວນ ໜຶ່ງ ເຄື່ອນໄຫວລັກລອບຄ້າຂາຍຢາເສບຕິດ ຢູ່ເຂດບ້ານເວີນຂາວ ເມືອງໂຂງ ແຂວງຈຳປາສັກ, ເມື່ອເຈົ້າໜ້າທີ່ ລົງກວດກາ ແລະ ສືບຫາຂໍ້ມູນຄວາມຈິງ ຢູ່ສະຖານທີ່ດັ່ງກ່າວ ຈຶ່ງພົບເຫັນເປົ້າໝາຍຖືກສົງໄສ; ມາວັນທີ 9 ກໍລະກົດ, ກໍໄດ້ນຳ ກຳລັງວິຊາສະເພາະຈຳນວນໜຶ່ງ ລົງສົມທົບກັບ ອຳນາດການປົກຄອງບ້ານດັ່ງກ່າວ ລົງມ້າງ ແລະ ສາມາດກັກຕົວ ຜູ້ຖືກຫາ ທັງ 3 ຄົນ ມາສອບສວນ.

ຜ່ານການສອບສວນເບື້ອງຕົ້ນ, ເຈົ້າໜ້າທີ່ ປກສ ເມືອງໂຂງ ໃຫ້ຮູ້ວ່າ:

-ຢາບ້າຈຳນວນດັ່ງກ່າວ ເປັນຂອງ ພວກກ່ຽວ ແທ້, ໂດຍ ພວກກ່ຽວ ໄດ້ຮ່ວມກັນຄ້າຂາຍຢາເສບຕິດ ມາແລ້ວຫຼາຍຄັ້ງ, ຢາບ້າທີ່ເອົາມາຂາຍ ແມ່ນໄດ້ຊື້ນຳພັກພວກ ທີ່ເອົາມາຂາຍໃຫ້ ຄັ້ງລະ 2 – 3 ຖົງ ( ຖົງລະ 200 ເມັດ ) ແລ້ວນຳໄປຂາຍໃຫ້ກັບ ໄວລຸ້ນ ພາຍໃນບ້ານ ແລະ ໄວລຸ້ນ ທີ່ມາຊື້ຢາບ້າໄປມົ້ວສຸມ, ຫຼັງຈາກໄດ້ເງິນມາແລ້ວ ພວກກ່ຽວ ໄດ້ເອົາເງິນມາແບ່ງກັນ ແລະ ເອົາໄປໃຊ້ຈ່າຍ ຫຼິ້ນກິນຟຸມເຟືອຍຈົນໝົດ.

-ມາຮອດວັນທີ 9 ກໍລະກົດ, ຈຶ່ງຖືກກັກຕົວ, ເຊິ່ງປັດຈຸບັນ ຄະດີດັ່ງກ່າວ ຍັງຢູ່ໃນຂັ້ນຕອນການສອບສວນຫາທີ່ມາຂອງ ຢາເສບຕິດ ແລະ ຜູ້ຮ່ວມຂະບວນການ ເພື່ອດຳຕົວມານຳເນີນຄະດີ ຕາມກົດໝາຍ.

ນອກນີ້, ເຈົ້າໜ້າທີ່ ປກສ ແຂວງຈຳປາສັກ ຍັງໃຫ້ຮູ້ອີກ ວ່າ: ໃນວັນທີ 1 ກໍລະກົດ 2019 ເວລາປະມານ 12:30 ໂມງ, ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງຈຳປາສັກ ໄດ້ຈັບກຸມ ຜູ້ຖືກຫາ ຄະດີຄ້າຂາຍຢາເສບຕິດ ປະເພດຢາບ້າ ໄດ້ຈຳນວນ 1 ຄົນ ຊື່ ທ້າວ ສຸກປະເສີດ ອາຍຸ 24 ປີ ຢູ່ບ້ານສະໜາມໄຊ ນະຄອນປາກເຊ ແຂວງຈຳປາສັກ ພ້ອມຂອງກາງຢາບ້າ ຈຳນວນ 196 ເມັດ, ເງິນ ຈຳນວນ 1.380.000 ກີບ, ໂທລະສັບມືຖື 1 ໜ່ວຍ ແລະ ລົດຈັກ 1 ຄັນ ມາສອບສວນ.

ທ້າວ ສຸກປະເສີດ ຖືກເຈົ້າໜ້າທີ່ ກັກຕົວ ຢູ່ເຂດບ້ານໂພນສະຫວັນ ນະຄອນປາກເຊ ພາຍຫຼັງສືບຮູ້ວ່າ: ຜູ້ກ່ຽວ ມີພຶດຕິກຳລັກລອບຊື້ – ຂາຍຢາເສບຕິດ ເພາະວ່າ ມີກຸ່ມໄວລຸ້ນຈຳນວນໜຶ່ງ ມັກມາຫາຜູ້ກ່ຽວຢູ່ເຮືອນ ແລະ ຜູ້ກ່ຽວເອງ ກໍມັກອອກທ່ຽວກາງຄືນ ຮຸ່ງເຊົ້າຈຶ່ງມາເຮືອນ; ເມື່ອສືບຮູ້ແນວນັ້ນ, ກໍໄດ້ວາງກຳລັງຕິດຕາມ ຢ່າງໃກ້ຊິດ. ຈົນມາຮອດວັນທີ 1 ກໍລະກົດ, ໄດ້ສຶບຮູ້ອີກ ວ່າ: ຜູ້ກ່ຽວ ກຳລັງນຳຢາບ້າໄປຂາຍໃຫ້ກັບ ຜູ້ຮັບຊື້ ຢູ່ເຂດບ້ານໂພນສະຫວັນ ຈຶ່ງນຳກຳລັງເຂົ້າຈັບຕົວ ພ້ອມຂອງກາງ ຈຳນວນ 196 ເມັດ ມາສອບສວນ.

ຜູ້ກ່ຽວ ສາລະພາບ ວ່າ: ໄດ້ພົວພັນເສບຢາເສບຕິດ ມາແຕ່ປີ 2017 ເສບຄັ້ງລະ 1 – 2 ເມັດ, ຕົກມາຮອດຕົ້ນປີ 2019 ຄວາມຕ້ອງການເສບ ເພີ່ມຂຶ້ນ ແລະ ເງິນທີ່ຫາມາໄດ້ຈາກ ການເປັນກຳມະກອນ ກໍບໍ່ພໍຊື້ຢາບ້າມາເສບ ຈຶ່ງເກີດມີແນວຄິດຢາກຄ້າຂາຍຢາບ້າ. ຈາກນັ້ນ, ກໍເລີ່ມເຄື່ອນໄຫວຊື້ຢາບ້າ ນຳພັກພວກ ຄັ້ງລະ 1 ຖົງ ເທົ່າກັບ 200 ເມັດ ແລ້ວນຳມາເສບ ແລະ ແບ່ງຂາຍຈຳນວນໜຶ່ງ ແລະ ຜ່ານມາ, ເຄີຍຊື້ຢາບ້າມາຂາຍແລ້ວຫຼາຍຄັ້ງ ບໍ່ສາມາດຈື່ໄດ້.

ສ່ວນເງິນທີ່ໄດ້ຈາກ ການຂາຍຢາເສບຕິດ ແມ່ນໃຊ້ຈ່າຍໝົດ; ມາວັນທີ 1 ກໍລະກົດ, ຜູ້ກ່ຽວ ໄດ້ໄປຊື້ຢາບ້າ ນຳພັກພວກ 1 ຖົງ ແລ້ວນຳມາເສບ 4 ເມັດ; ຈາກນັ້ນ, ມີໄວລຸ້ນໂທລະສັບມາຫາ ບອກໃຫ້ເອົາຢາບ້າໄປຂາຍໃຫ້ ຢູ່ເຂດເສັ້ນທາງ ບ້ານໂພນສະຫວັນ ຕົນຈຶ່ງຂັບລົດຈັກອອກໄປ ແລະ ເມື່ອໄປຮອດ ກໍຖືກ ເຈົ້າໜ້າທີ່ ກັກຕົວ.

 

 

Leave a Reply

Your email address will not be published. Required fields are marked *