ພະນັກງານ-ລັດຖະກອນ ທີ່ເຮັດຜິດລະບຽບ ຕ້ອງຖືກລົງໂທດຢ່າງເຂັ້ມງວດ

ພະນັກງານ-ລັດຖະກອນ ຕ້ອງປະຕິບັດຕາມແນວທາງຂອງພັກ, ກົດໝາຍຂອງລັດແຕ່ລະໄລຍະ ໃຫ້ມີຄວາມເປັນເອກະພາບ, ໂປ່ງໃສ, ຍຸຕິທຳ, ເປີດເຜີຍ, ສາມາດກວດສອບໄດ້ ແລະ ຕ້ອງຫຼີກຫຼ້ຽງການເຮັດຜິດຕາມ 8 ຂໍ້ຫ້າມ, ທ່ານ ປອ ກອງແກ້ວ ໄຊສົງຄາມ ເນັ້ນໃນກອງປະຊຸມເຊື່ອມຊຶມມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 8 ສະໄໝທີ X ທີ່ຈັດຂຶ້ນໃນວັນທີ 8 ສິງຫາ 2019 ຢູ່ສະໂມສອນແຂວງ.

ໃນກອງປະຊຸມ ນອກຈາກໄດ້ຮັບຟັງການເຊື່ອມຊືມເນື້ອໃນຂອງມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 8 ສະໄໝທີ X ແລ້ວ ຍັງໄດ້ຮັບຟັງການເຜີຍແຜ່ຫຼາຍເອກະສານທີ່ສຳຄັນ ໜຶ່ງໃນນັ້ນ ກໍ່ແມ່ນດຳລັດ 184/ລບ ວ່າດ້ວຍຈັນຍາບັນຂອງພະນັກງານ-ລັດຖະກອນ ທີ່ທ່ານເຈົ້າແຂວງໄດ້ເນັ້ນໜັກໃຫ້ພະນັກງານ-ລັດຖະກອນ ຕ້ອງໄດ້ປະຕິບັດຕາມ 4 ຈັນຍາບັນຢ່າງເຄັ່ງຄັດ ຄື: ຈັນຍາບັນຕໍ່ຕົນເອງ, ຈັນຍາບັນຕໍ່ວິຊາອາຊີບ, ຈັນຍາບັນຕໍ່ການຈັດຕັ້ງ ແລະ ຈັນຍາບັນຕໍ່ປະຊາຊົນ ແລະ ສັງຄົມ.

ພ້ອມດຽວກັນນັ້ນ ຕ້ອງຫຼີກຫຼ້ຽງການກະທຳຜິດຕາມ 8 ຂໍ້ຫາມທີ່ສຳຄັນຂອງພະນັກງານ-ລັດຖະກອນ ເຊິ່ງປະກອບດ້ວຍ: ຫ້າມພະນັກງານ – ລັດຖະກອນ ໂຄສະນາຕ້ານແນວທາງຂອງພັກ, ນະໂຍບາຍ, ກົດໝາຍຂອງລັດ ຫຼື ສ້າງຜົນສະທ້ອນຕໍ່ຮີດຄອງປະເພນີ ແລະ ວັດທະນະທຳອັນດີງາມຂອງຊາດ, ແນວຄິດຈິດໃຈຂອງປະຊາຊົນ ແລະ ສັງຄົມ, ຫ້າມຂໍເອົາ, ທວງເອົາ, ຮັບ ຫຼື ໃຫ້ສິນບົນ, ສວຍໃຊ້ອຳນາດ, ໜ້າທີ່ ແລະ ຕຳແໜ່ງຂອງຕົນ, ກົດໜ່ວງຖ່ວງດຶງ ແກ້ໄຂວຽກງານ ຊຶ່ງກໍ່ໃຫ້ເກີດຜົນເສຍຫາຍແກ່ບຸກຄົນ, ນິຕິບຸກຄົນ ແລະ ການຈັດຕັ້ງ, ຫ້າມເມີນເສີຍ, ປະລະໜ້າທີ່ຕາມລຳພັງ ຫຼື ຢຸດເຊົາວຽກງານ ໂດຍບໍ່ໄດ້ຮັບອະນຸຍາດຈາກການຈັດຕັ້ງ, ຫ້າມດຳເນີນທຸລະກິດໂດຍການເປັນເຈົ້າຂອງ, ເປັນຄະນະອຳນວຍການ, ເປັນຂາຫຸ້ນ, ເປັນຜູ້ຈັດການຂອງຫົວໜ່ວຍທຸລະກິດໃດໜຶ່ງ ເວັ້ນເສຍແຕ່ໄດ້ຮັບອະນຸຍາດ, ຫ້າມນຳໃຊ້ຊັບສິນຂອງລັດ ເພື່ອຈຸດປະສົງສ່ວນຕົວ ໂດຍບໍ່ຖືກຕ້ອງຕາມກົດໝາຍ ແລະ ລະບຽບການ, ຫ້າມບັນຈຸ ແລະ ສັບຊ້ອນ, ແຕ່ງຕັ້ງພໍ່, ແມ່, ຜົວ, ເມຍ, ອ້າຍ, ເອື້ອຍ, ນ້ອງ, ລູກ ແລະ ຍາດໃກ້ສິດຂອງຕົນ ໃຫ້ຮັບຜິດຊອບວຽກງານຈັດຕັ້ງ – ພະນັກງານ, ວຽກງານກວດກາ, ເລຂາ, ບັນຊີ, ການເງິນ, ນາຍຄັງ, ນາຍສາງ, ຫຼື ເປັນຜູ້ຈັດຊື້ ແລະ ຈັດຈ້າງ ຢູ່ພາຍໃນການຈັດຕັ້ງຂອງຕົນ, ຫ້າມສ້າງກຸ່ມກ້ອນພັກພວກ ແລະ ກະທຳສິ່ງທີ່ກໍ່ເກີດຜົນກະທົບອັນບໍ່ດີ ເຖິງການປະຕິບັດໜ້າທີ່ວຽກງານ ແລະ ຄວາມສາມັກຄີພາຍໃນການຈັກຕັ້ງ, ຫ້າມມີພຶດຕິກຳອື່ນ ທີ່ເປັນການລະເມີດກົດໝາຍ ແລະ ລະບຽບການ.

ທ່ານເຈົ້າແຂວງຍັງເນັ້ນຕື່ມອີກວ່າ ຖ້າພະນັກງານ-ລັດຖະກອນ ລະເມີດຕ້ອງຖືກສຶກສາອົບຮົມ, ກ່າວເຕືອນ ແລະ ລົງວິໄນ ຢ່າງຈິງຈັງຕາມກົດໝາຍວ່າດ້ວຍ ພະນັກງານ-ລັດຖະກອນ ສະບັບເລກທີ 74/ສພຊ, ລົງວັນທີ 18 ທັນວາ 2015 ແລະ ປັບໃໝ, ໃຊ້ແທນຄ່າເສຍຫາຍທາງແພ່ງ ຫຼື ລົງໂທດທາງອາຍາ ຕາມກໍລະນີເບົາ ຫຼື ໜັກ.

 

 

Leave a Reply

Your email address will not be published. Required fields are marked *