ຂຸນເຫຼັກ ພິກສະຖານະການດັບຝັນ ກັບຕັນ ຄວ້າສາຍແອວຫົວໜ້າພະແນກສຶກສາທິການ ແລະ ກີລາ ນວ

ສົມກັບຄູ່ຊີງອີ່ຫຼີ ເມື່ອ ຂຸນເຫຼັກ ສະໂມສອນມວຍ ຄໍາເສັງ ຖືກສອກຄູ່ແຂ່ງຕັ້ງ ແຕ່ຍົກທໍາອິດຈົນດັງຫັກ ແຕ່ກັດແຂ້ວ ສູ້ພິກສະຖານະການເອົາຊະນະ ກັບຕັນ ຂວັນໃຈສີໂຄດ ໄປສຸດມັນ ຄວ້າສາຍແອວແຊັມການແຂ່ງຂັນມວຍຮອບ ຮຸ່ນນໍ້າໜັກ 55 ກິໂລ ກຣາມ ຊີງແຊັມສາຍແອວທ່ານຫົວໜ້າພະແນກສຶກສາທິການ ແລະ ກີລາ ນະຄອນຫຼວງວຽງຈັນ ( ນວ ) ຄັ້ງທໍາອິດ ໃນວັນທີ 10 ສິງຫາທີ່ຜ່ານມາ ທີ່ສະໂມສອນກີລາໃນຮົ່ມ ພະແນກສຶກສາທິການ ແລະ ກີລາ ນວ ບ້ານບຶງຂະຫຍອງ ເມືອງສີສັດຕະນາກ ນະຄອນຫຼວງວຽງຈັນ. ລາຍການດັ່ງກ່າວເປີດສາກມາແຕ່ຕົ້ນເດືອນມິຖຸນາຜ່ານມາ ໂດຍມີນັກຊົກສີມືດີ 8 ຄົນ ຈາກ 6 ຄ້າຍມວຍອ້ອມຂ້າງນະຄອນຫຼວງວຽງຈັນ ສົ່ງເຂົ້າຮ່ວມແຂ່ງຂັນ ຈັດແບ່ງອອກເປັນ 2 ກຸ່ມ ແຕ່ລະກຸ່ມແຂ່ງຂັນພົບກັນໝົດຄັດເອົາຜູ້ທີ່ສາມາດຊະນະຄະແນນໄດ້ຫຼາຍທີ່ສຸດຜ່ານເຂົ້າຮອບຕໍ່ໄປ ແລະ ການກັບມາແຂ່ງຂັນກັນໃນຮອບຄັ້ງນີ້ກໍເປັນການຮ່ວມມືກັນລະຫວ່າງ ສະຫະພັນມວຍລາວ ນະຄອນຫຼວງວຽງຈັນ ຮ່ວມກັບ ບໍລິສັດ ກໍກຽດບ໋ອກຊີງກຣຸບ ຈາກປະເທດໄທ ໂດຍຈະມີການຖ່າຍທອດສົດຜ່ານທາງໂທລະພາບລາວສະຕຣາ ອີກດ້ວຍ. ຄູ່ຊີງຊະນະເລີດຈັດຂຶ້ນໃນຄໍ່າຄືນຂອງວັນທີ 10 ສິງຫາ 2019 ເປັນການພົບກັນລະຫວ່າງ ຂຸນເຫຼັກ ສະໂມສອນ ຄໍາເສັງ ພົບກັບ ກັບຕັນ ຂວັນໃຈສີໂຄດ ຜ່ານການແຂ່ງຂັນປາກົດວ່າ: ກັບຕັນ ສັບສອກເຂົ້າໜ້າຂອງ ຂຸນເຫຼັກ ຈົນດັງຫັກ ຕັ້ງແຕ່ຍົກທໍາອິດ, ແຕ່ ຂຸນເຫຼັກ ເດີນໜ້າລຸຍຕໍ່ພິກສະຖານະການກັບມາໄດ້ປຽບໃນ 2 ຍົກສຸດທ້າຍ ເດີນໜ້າບຸກຕະຫຼອດການແຂ່ງຂັນ ແລະ ເຮັດໄດ້ ດີກວ່າຈົນຈົບການແຂ່ງຂັນເອົາຊະນະ ກັບຕັນ ຄວ້າສາຍແອວແຊັມໄປຄອງ, ສ່ວນຄູ່ຊີງອັນດັບ 3 ເກົ້າແສນ ຂວັນໃຈສີໂຄດ ເອົາຊະນະ ແມັກນ້ອຍ ສໍຈະເລີນຊິງ ຄວ້າອັດດັບ 3 ໄປຄອງ. ສໍາລັບການແຂ່ງຂັນລາຍການນີ້ ທັງສອງພາກສ່ວນດັ່ງກ່າວຍັງມີເປົ້າໝາຍຫຼັກກໍເພື່ອເປັນການສົ່ງເສີມນັກຊົກຮຸ່ນສືບທອດ ຈາກບັນດາຄ້າຍມວຍຕ່າງໆອ້ອມຂ້າງ 9 ຕົວເມືອງ ທົ່ວນະຄອນຫຼວງວຽງຈັນ ໄດ້ມີເວທີແຂ່ງຂັນເພື່ອພັດທະນາຕົນເອງກ້າວຂຶ້ນມາເປັນນັກຊົກມືອາຊີບ ແລະ ສາມາດຕາງໜ້າທັບນັກກີລາ ນະຄອນຫຼວງວຽງຈັນ ເຂົ້າຮ່ວມກີລາແຫ່ງຊາດ ຄັ້ງທີ Xl ຫຼື ຊຽງຂວາງ ເກມ ຈະຈັດຂຶ້ນ ໃນລະຫວ່າງວັນທີ 22 ມີນາ ຫາ 1 ເມສາ 2020.

 

 

ຂໍ້ມູນມາຈາກ : ເສດຖະກິດການຄ້າ

Leave a Reply

Your email address will not be published. Required fields are marked *