8 ແຂວງພາກເໜືອ ສຳເລັດການຝຶກອົບຮົມ ການຜະລິດຂ່າວແບບໃໝ່ ໄລ້ສົດຜ່ານເຟດບຸກ

ຊຸດຝຶກອົບຮົມ ເພື່ອຍົກລະດັບຄວາມຮູ້ ໃຫ້ແກ່ຄູຝຶກ ແລະ ນັກຈັດລາຍການວິທະຍຸໄວໜຸ່ມ 8 ແຂວງພາກເໜືອ. ກ່ຽວກັບການໂຄສະນາສົນທິສັນຍາ ວ່າດ້ວຍສິດທິເດັກ ແລະ ສື່ສັງຄົມອອນລາຍ ແມ່ນໄດ້ຈັດຂຶ້ນ;ໃນທ້າຍ ເດືອນ ກໍລະກົດ 2019 ນິ້; ທີ່ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງອຸດົມໄຊ. ເຂົ້າຮ່ວມມີ ທ່ານ ພອນສະຫວັນ ພັນທະຈິດ ຫົວໜ້າະພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງອຸດົມໄຊ. ທ່ານ ສັງຂານ ຈຸມຄຳພັນ ຮອງອຳນວຍການວິທະຍຸກະຈາຍສຽງແຫ່ງຊາດລາວ, ມີຜູ້ຊຽວຊານສື່ມວນຊົນ ອົງການຢຸນິເຊັບປະຈໍາລາວ, ມີບັນດາພາກສວນທີກ່ຽວຂ້ອງ, ຄູຝຶກ ແລະ ສໍາມະນາກອນເຂົ້າຮ່ວມ.
ຊຸດຝຶກອົບຮົມຄັ້ງນີ້ ສໍາມະນາກອນແມ່ນໄດ້ຮຽນຮູ້ ກ່ຽວກັບຄວາມເປັນມາ ຂອງສົນທິສັນຍາ ວ່າດ້ວຍສິດທິເດັກ. ສິດທິພື້ນຖານຂອງເດັກນ້ອຍທີ່ຄວນຮັບຮູ້ ແລະ ໄດ້ຊົມວິດີໂອ ເລື່ອງສິດທິເດັກ, ເຫັນໄດ້ຄວາມຄືບໜ້າ ແລະ ຄວາມທ້າທາຍຂອງການປະຕິບັດສົນທິສັນຍາ ວ່າດ້ວຍສິດທິເດັກ ຄົບຮອບ 30 ປີ ໄດ້ຮຽນຮູ້ເຕັກນິກການໄລ້ສົດໃຫ້ໄດ້ທັງພາບ ແລະ ສຽງ ທີ່ດີມີຄຸນນະພາບ ໃນການລົງຂ່າວຜ່ານເຟດບຸກ ໃຫ້ສັງຄົມໄດ້ຮັບຮູ້. ການຮຽນແມ່ນໄດ້ຮຽນຮູ້ທາງດ້ານພາກທິດສະດີ ແລະ ລົງເລິກພາກປະຕິບັດຕົວຈິ່ງໄປພ້ອມໆກັນ. ໃນການລົງເກັບກໍາຂໍ້ມູນຂ່າວ,ຖ່າຍທໍາວິດີໂອ ແລະ ສໍາພາດ,ຂຽນຂ່າວ, ຕັດຕໍ່ ເປັນຂ່າວສໍາເລັດຮູບ. ເພື່ອກຽມອອກອາກາດວິທະຍຸໄວໜຸ່ມ ແລະ ໄລ້ສົດຜ່ານເຟດບຸກ. ບັນດາຜູ້ເຂົ້າຮ່ວມຍັງໄດ້ປະກອບຄໍາຄິດຄໍາເຫັນ ຖອດຖອນ ແລກປ່ຽນບົດຮຽນ ແລະ ປະສົບການນໍາກັນ ໂດຍສະເພາະແມ່ນບັນຫາພື້ນຖານສື່ໄວໜຸ່ມໃນອະດີດ ປະຈຸບັນ ແລະ ອະນາຄົດ ຈະມີການດໍາເນີນໄປທາງທິດໃດ ແລະ ເປັນໜ້າທີ່ຂອງຄູຝຶກຄວນຮູ້ ໃນການຜະລິດລາຍການວິທະຍຸເຊັ່ນ: ການວາງແຜນ, ກໍານົດເນື້ອໃນການຂຽນສະກິບ ການຖ່າຍທໍາວິດີໂອ. ວິທີການສໍາພາດທີ່ຖືກຕ້ອງ ໄດ້ປະເດັນ ແລະ ການຈັດລາຍການວິທະຍຸໄວໜຸ່ມຂອງແຂວງ ໃນຮູບແບບໃໝ່ ເພື່ອກຽມທົດລອງຂຶ້ນສອນ ແລະ ອຸປະກອນອື່ນໆທີ່ຈໍາເປັນສໍາລັບຄູຝຶກ ເຮັດໃຫ້ການຈັດລາຍການ ມີຄຸນນະພາບດີ ສ້າງຄວາມສົນໃຈໃຫ້ແກ່ໄວໜຸ່ມ ຫັນມາຟັງວິທະຍຸແຂວງ ນັບມື້ຫຼາຍ ໃນການໂຄສະນາປະສາສໍາພັນ ສຶກສາອົມຮົມໄວໜຸ່ມ ໃນສັງຄົມ ໄດ້ຮັບຮູ້ ແລະ ເຂົ້າໃຈມີການປ່ຽນພຶດຕິກຳຂອງຕົນ ກາຍເປັນຄົນດີ, ມີລະບຽບວິໄນ ເປັນຄົນດີຂອງພໍ່ແມ່ ແລະ ສັງຄົມ.

Leave a Reply

Your email address will not be published. Required fields are marked *