ມອບ-ຮັບ ໜ້າທີ່ຮັກສາການອະທິການບໍດີ ມຂ

ພິທີມອບຮັບໜ້າທີ່ຮັກສາການອະທິການບໍດີມະຫາວິທະຍາໄລສະຫວັນນະເຂດ (ມຂ) ລະຫວ່າງທ່ານ ບຸນປົງ ແກ້ວໂຣດົມ ອະທິການບໍດີ ມຂ (ຄົນເກົ່າ) ແລະ ທ່ານ ສຸລິຍົງ ໄຊໂກສີ ຮັກສາການອະທິການບໍດີ ມຂ (ຄົນໃໝ່) ໄດ້ຈັດຂຶ້ນໃນວັນທີ 7 ສິງຫາ ຜ່ານມາ ທີ່ຫ້ອງປະຊຸມມະຫາ-ວິທະຍາໄລດັ່ງກ່າວ ໂດຍການເປັນກຽດເຂົ້າຮ່ວມຂອງທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະ ກິລາ, ທ່ານ ຄຳພູນ ຕຸໄພທູນ ຮອງເຈົ້າແຂວງສະຫວັນນະເຂດ, ມີ ການ ຈັດຕັ້ງຂັ້ນຕ່າງໆທີ່ກ່ຽວຂ້ອງເຂົ້າ ຮ່ວມຢ່າງພ້ອມພຽງ.

ໃນພິທີໄດ້ຜ່ານດຳລັດຂອງນາຍົກລັດຖະມົນຕີສະບັບ ເລກທີ 139/ນຍ ລົງວັນທີ 28/ 5/2019 ວ່າດ້ວຍການອະນຸມັດໃຫ້ພະນັກງານ ອອກພັກການຮັບອຸດໜູນບຳນານ ໂດຍໄດ້ອະນຸມັດໃຫ້ທ່ານ ບຸນປົງ ແກ້ວໂຣດົມ ອອກພັກການຮັບອຸດ ໜູນບຳນານ ນັບແຕ່ວັນທີ 1/ 7/2019 ເປັນຕົ້ນໄປ ແລະ ຂໍ້ຕົກລົງຂອງນາຍົກລັດຖະມົນຕີ ເລກທີ 44/ນຍ, ລົງວັນທີ 30/ 7/2019 ວ່າດ້ວຍການແຕ່ງຕັ້ງຜູ້ຮັກ-ສາການອະທິການບໍດີມະຫາວິທະຍາໄລສະຫວັນນະເຂດ ໂດຍໄດ້ຕົກລົງແຕ່ງຕັ້ງທ່ານ ສຸລິຍົງ ໄຊໂກສີ ເປັນຜູ້ຮັກສາການອະທິການບໍດີ ມຂ.

ໃນໂອກາດນີ້, ທ່ານລັດຖະມົນຕີກະຊວງສຶກສາທິການ ແລະ ກິລາ ໄດ້ມີຄຳເຫັນໂອ້ລົມບາງຕອນວ່າ: ກ່ອນອື່ນທ່ານ ໄດ້ສະແດງຄວາມຍ້ອງຍໍຊົມເຊີຍຜົນງານທີ່ທາງຄະນະນຳ ມຂ ຍາດມາໄດ້ໃນໄລຍະຜ່ານມາ ຈົນເຮັດໃຫ້ ມຂ ໄດ້ສືບຕໍ່ມີການພັດທະນາດີຂຶ້ນຢ່າງເປັນກ້າວໆ ຈາກເບື້ອງຕົ້ນມີພຽງແຕ່ 3 ຄະ ນະວິຊາ ຊຶ່ງມາຮອດປັດຈຸບັນ ໄດ້ຂະຫຍາຍມາເປັນ 8 ຄະນະ ພ້ອມດຽວກັນນີ້ກໍຮຽກຮ້ອງໃຫ້ຜູ້ທີ່ຮັບໜ້າທີ່ເປັນຜູ້ຮັກສາ ມຂ ຈົ່ງໄດ້ເອົາໃຈໃສ່ສືບຕໍ່ໃນການພັດທະນາ ມຂ ພວກເຮົາໃຫ້ເຕີບໃຫຍ່ຂະຫຍາຍຕົວດີຂຶ້ນໄປເລື້ອຍໆ.

(ຂ່າວ-ພາບ: ແຂວງສະຫວັນນະເຂດ)

Leave a Reply

Your email address will not be published. Required fields are marked *