ຄຳ​ສັ່ງ​ປິດ​ລ້ອມ​ຂອງ ສ ອາ​ເມ​ຣິ​ກາ ເຮັດ​ໃຫ້​ປະຊາຊົນ​ອີ​ຣານ ຂາດແຄນ​ຢາ​ປົວ​ພະຍາດ

ແຫຼ່ງ​ຂ່າວ Sputniknews ລາຍ​ງານ​ວ່າ ທ່ານ ອີດ​ຣິ​​ສ ຈາ​ຊາ​ອີ ຜູ້​ລາຍ​ງານ​ພິເສດ ຂອງ​ສະຫະ​ປະຊາ​ຊາດ (​ສປຊ) ກ່ຽວ​ກັບ​ຜົນ​ກະທົບ​ໃນ​ດ້ານ​ລົບ ຂອງ​ມາດ​ຕະ​ການບີບ​ບັງຄັບ​ລຳພັງ​ພຽງ​ຝ່າຍ​ດຽວ​ທີ່​ມີ​ຕໍ່​ການ​ປະຕິບັດ​ສິດທິ​ມະນຸດ ເວົ້າ​ວ່າ  ​ສປຊ ໄດ້​ຢັ້ງຢືນ​ບັນດາ​ກໍລະນີ ການ​ເສຍ​ຊີວິດ​ຂອງ​ສາມັນ​ຊົນ​ຢູ່​ໃນ​ອີ​ຣານ ທີ່​ເກີດ​ຈາກ​ການ​ມີ​ຢາ​ປົວ​ພະຍາດ​ບໍ່​ພຽງພໍ ຊຶ່ງ​ມີ​ສາເຫດ​ມາ​ຈາກ​ຄຳ​ສັ່ງ​ປິດ​ລ້ອມ​ຂອງ ສ ອາ​ເມ​ຣິ​ກາ ຕໍ່​ອີ​ຣານ. ທ່ານ ຈາ​ຊາ​ອີ ເວົ້າ​ວ່າ ຄຳ​ສັ່ງ​ປິດ​ລ້ອມ​ຂອງ ສ ອາ​ເມ​ຣິ​ກາ ໄດ້​ເປັນ​ຜົນ​ກະທົບ​ໃນ​ທາງ​ລົບ ຕໍ່​ການ​ປະຕິບັດ​ສິກ​ທິ​ໃນ​ການ​ດູ​ແລ​ສຸຂະພາບ ຂອງ​ປະຊາຊົນ​ອີ​ຣານ.

ໃນ​ຂະນະ​ດຽວ​ກັນ ແຫຼ່ງ​ຂ່າວ Sputniknews ໃຫ້​ຮູ້​ວ່າ ໃນ​ການ​ເຈລະຈາ​ຜ່ານ​ທາງ​ໂທລະສັບ ກັບ​ກະສັດ ທາ​ມິມ ບິນ ຮາ​ມັດ ອາ​​ລ ທານີ ແຫ່ງ​ກາ​ຕາ ເມື່ອ​ວັນ​ທີ 11 ສິງຫາ​ນີ້ ປະທານາທິບໍດີ​ອີ​ຣານ ​ຮັສ​ຊານ ຣູ​ຮາ​ນີ ເວົ້າ​ວ່າ ສ ອາ​ເມ​ຣິ​ກາ ຄວນ​ປ່ຽນແປງ​ນະໂຍບາຍ​ຂອງ​ຕົນ ຢູ່​ໃນ​ຕາເວັນ​ອອກ​ກາງ ແລະ ຄວນ​ມີ​ການ​ກະທຳ​ເພື່ອ​ຫຼຸດຜ່ອນ​ຄວາມ​ເຄັ່ງ​ຕຶງ​ຢູ່​ໃນ​ພາກ​ພື້ນ​ນີ້.

ອົງການ​ສື່​ມວນ​ຊົນ ຂອງ​ປະທານາທິບໍດີ​ອີ​ຣານ ອ້າງ​ຕາມ​ຄຳ​ຖະແຫຼງ​ຂອງ​ປະທານາທິບໍດີ ຣູ​ຮາ​ນີ ຊີ້​ແຈງ​ວ່າ ອີ​ຣານ​ເຊື່ອ​ວ່າ ການ​ຫຼຸດຜ່ອນ​ຄວາມ​ເຄັ່ງ​ຕຶງ​ຢູ່​ໃນ​ພາກ​ພື້ນ ມີ​ຜົນ​ປະໂຫຍດ​ໃຫ້​ແກ່​ທຸກໆ​ຄົນ ແລະ ອີ​ຣານ​ຫວັງ​ວ່າ ສ ອາ​ເມ​ຣິ​ກາ ເຂົ້າໃຈ​ວ່າ ເສັ້ນທາງ​ທີ່​ເຂົາເຈົ້າ (ສ ອາ​ເມ​ຣິ​ກາ) ເລືອກ​ເອົາ​ນັ້ນ ແມ່ນ​ມີ​ຄວາມ​ຜິດພາດ ໂດຍ​ຜ່ານ​ນັ້ນ​ກໍ​ຈະ​ບໍ່​ມີ​ຜູ້​ຊະນະ.

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *