ຫຼວງນໍ້າທາ ອອກໃບຕາດິນໄດ້ເກືອບ 3 ພັນຕອນ

6 ເດືອນຕົ້ນປີ 2019 ແຂວງ ຫຼວງນໍ້າທາ ສຳເລັດວັດແທກອອກໃບຕາດິນທົ່ວແຂວງໄດ້ທັງໝົດ 2.970 ຕອນ, ເນື້ອທີ່ 11 ລ້ານຕາແມັດ.

ໃນວັນທີ 5 ສິງຫາ 2019 ຜ່ານມາ ພະແນກຊັບພະຍາກອນທຳມະຊາດ ແລະ ສິ່ງແວດລ້ອມ ( ພຊສ ) ແຂວງ ຫຼວງນໍ້າທາ ໄດ້ຈັດກອງປະຊຸມສະຫຼຸບການຈັດຕັ້ງເຄື່ອນໄຫວວຽກງານ ປະຈຳ 6 ເດືອນ ແລະ ທິດທາງແຜນການ 6 ເດືອນທ້າຍປີ 2019 ຂຶ້ນທີ່ຫ້ອງປະຊຸມ ພຊສ ໂດຍການເປັນປະທານຂອງ ທ່ານ ສົມຫວັງ ນາບຸນແພງ ເລຂາຄະນະພັກຮາກຖານ, ຫົວໜ້າ ພຊສ, ມີຮອງຫົວໜ້າພະແນກ, ຫົວໜ້າຂະແໜງ, ຮອງຫົວໜ້າຂະແໜງ ຕະຫຼອດຮອດພະນັກງານພາຍໃນ ພຊສ ເຂົ້າຮ່ວມ.

ກອງປະຊຸມໄດ້ຜ່ານບົດສະຫຼຸບການຈັດຕັ້ງເຄື່ອນໄຫວວຽກງານໃນໄລຍະ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ, ຜ່ານບົດສະຫຼຸບວຽກງານບັນຊີການເງິນ ພ້ອມທັງໄດ້ປະກອບຄຳຄິດເຫັນໃສ່ເນື້ອໃນບົດສະຫຼຸບ ແລະ ທິດທາງແຜນການຍົກໃຫ້ເຫັນດ້ານດີ, ຂໍ້ຄົງຄ້າງ, ສາເຫດ ແລະ ວິທີແກ້ໄຂ. ຫຼັງຈາກນັ້ນ, ກອງປະຊຸມກໍໄດ້ຜ່ານຂໍ້ຕົກລົງຂອງທ່ານຫົວໜ້າ ພຊສ ວ່າດ້ວຍການແຕ່ງຕັ້ງຜູ້ຊ່ວຍຫົວໜ້າພະແນກ. ພ້ອມນັ້ນ, ກໍໄດ້ຜ່ານຂອງກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ວ່າດ້ວຍການຍ້ອງຍໍກົມກອງ ແລະ ຂໍ້ຕົກລົງຂອງທ່ານເຈົ້າແຂວງ ວ່າດ້ວຍການຍ້ອງຍໍຊົມເຊີຍບຸກຄົນດີເດັ່ນ ປະຈຳປີ 2018 ພ້ອມທັງມອບໃບຍ້ອງຍໍໃຫ້ກົມກອງ ແລະ ບຸກຄົນດີເດັ່ນປະຈຳປີ 2018.

ສຳລັບການປະຕິບັດວຽກງານໃນ 6 ເດືອນຕົ້ນປີ 2019 ພຊສ ໄດ້ສຳເລັດການຈັດຕັ້ງປະຕິບັດຄາດໝາຍສູ້ຊົນທີ່ພົ້ນເດັ່ນ ຄື:

1). ວຽກງານທີ່ດິນ: ສຳເລັດວັດແທກອອກໃບຕາດິນທົ່ວແຂວງໄດ້ທັງໝົດ 2.970 ຕອນ, ເນື້ອທີ່ 11 ລ້ານ ຕາແມັດ, ທຽບໃສ່ແຜນປີ ໄດ້ 49,95%, ສືບສວນສິດນໍາໃຊ້ທີ່ດິນທົ່ວແຂວງໄດ້ 2.087 ຕອນ ທຽບໃສ່ແຜນປີ ໄດ້ 38,64%; ຈັດປະເພດທີ່ດິນ ແລະ ປະກາດຫາຜູ້ຄັດຄ້ານໄດ້ 2.258 ຕອນ ທຽບໃສ່ແຜນປີ ໄດ້ 49,46%; ເຊັນໃບຕາດິນທົ່ວແຂວງໄດ້ 1.610 ຕອນ ທຽບໃສ່ແຜນປີ ໄດ້ 34,87%.

ຈົດທະບຽນໂອນສິດນໍາໃຊ້ທີ່ດິນໄດ້ 83 ຕອນ ທຽບໃສ່ແຜນປີ ໄດ້ 33,87%.

2). ວຽກງານຊັບພະຍາກອນນໍ້າ ແລະ ອຸຕຸນິຍົມ: ລົງເກັບຕົວຢ່າງຄຸນນະພາບນໍ້າຂອງ ແລະ ແຫຼ່ງນໍ້າຕ່າງໆທົ່ວແຂວງໄດ້ 12 ຄັ້ງ ທຽບໃສ່ແຜນປີ ໄດ້ 50%; ລາຍງານຂໍ້ມູນອຸຕຸນິຍົມໃຫ້ກົມອຸຕຸນິຍົມ ແລະ ອຸທົກກະສາດໄດ້ເປັນປົກກະຕິ ທຽບໃສ່ແຜນປີ ໄດ້ 50%.

3). ວຽກງານສິ່ງແວດລ້ອມ ແລະ ການປ່ຽນແປງດິນຟ້າອາກາດ: ເຂົ້າຮ່ວມລົງກວດກາ ແລະ ແກ້ໄຂການດຳເນີນກິດຈະການທີ່ມີຜົນກະທົບຕໍ່ສິ່ງແວດລ້ອມ ໄດ້ທັງໝົດ 10 ຄັ້ງ ທຽບໃສ່ແຜນປີ ໄດ້ 62,50%; ສຳເລັດໂຄງການຄຸ້ມຄອງຢາຂ້າຫຍ້າຢູ່ເມືອງສິງ ແລະ ເມືອງລອງ ໄດ້ 100%; ເກັບກຳຂໍ້ມູນ ແລະ ວັດແທກຄຸນນະພາບອາກາດຢູ່ເມືອງສິງ ແລະ ເມືອງຫຼວງນໍ້າທາ ໄດ້ 3 ຈຸດ.

4). ວຽກງານຕິດຕາມກວດກາຊັບພະຍາກອນທຳມະຊາດ ແລະ ສິ່ງແວດລ້ອມ: ຕິດຕາມກວດກາຜົນກະທົບທົ່ວໄປໄດ້ 11 ຄັ້ງ ທຽບໃສ່ແຜນປີ ໄດ້ 50%.

5). ວຽກງານເຊື່ອມໂຍງພາກພື້ນ ແລະ ສາກົນ: ວຽກງານຮ່ວມມື ລາວ – ຈີນ ດ້ານສິ່ງແວດລ້ອມ.

– ຕິດຕາມນໍາໃຊ້ ແລະ ຮັກສາອ່າງບໍາບັດນໍ້າເປື້ອນທີ່ໂຮງຮຽນເທສະບານແຂວງເປັນປົກກະຕິ.

– ຕິດຕາມການຈັດຕັ້ງປະຕິບັດການບໍລິການ – ຈັດການເຕົາເຜົາຂີ້  ເຫຍື້ອເປັນປົກກະຕິ.

6). ວຽກງານຊັບພະນາກອນນໍ້າ: ສົມທົບກັບຫ້ອງການກະສິກຳ ກິ່ງ ແຂວງສິບສອງພັນນາ ແຂວງຢູນນານ ສປ ຈີນ ຈັດກິດຈະກຳປ່ອຍປາຕ້ອນຮັບປີທ່ອງທ່ຽວຢູ່ເມືອງນາແລ ໄດ້ 1 ຄັ້ງ ແລະ ເຂົ້າຮ່ວມພິທີປ່ອຍປາ ແລະ ຮ່ວມກັນປະຕິບັດກົດໝາຍ ວ່າດ້ວຍການຄຸ້ມຄອງ ແລະ ອະນຸຮັກສັດນໍ້າແມ່ນໍ້າຂອງ – ແມ່ນໍ້າລ້ານຊ້າງ ຮ່ວມກັບຫ້ອງການກະສິກໍາ ກິ່ງແຂວງສິບສອງພັນນາຢູ່ທີ່ສິບສອງພັນນາ ແຂວງຢູນນານ ສປ ຈີນ ຈຳນວນ 1 ຄັ້ງ.

7). ວຽກງານຈັດຕັ້ງ ແລະ ພະນັກງານ: ວຽກງານກວດກາ, ວຽກງານແຜນການ, ສະຖິຕິ ແລະ ຂໍ້ມູນ – ຂ່າວສານ ແລະ ວຽກງານບໍລິຫານ – ການເງິນ ກໍໄດ້ຈັດຕັ້ງປະຕິບັດຕາມພາລະບົດບາດ ແລະ ສຳເລັດຕາມແຜນການເປັນສ່ວນໃຫຍ່.

[ ແຫຼ່ງຂ່າວ: ພຊສ ຫຼວງນໍ້າທາ ]

Leave a Reply

Your email address will not be published. Required fields are marked *