ໜ່ວຍພັກຫ້ອງຄຸ້ມຄອງ ນັກສຶກສາ ວສປ ຈະສຸມໃສ່ຕິດຕາມການຮຽນ-ການສອນ

ຄະນະໜ່ວຍພັກຮາກຖານ ຫ້ອງຄຸ້ມຄອງຫຼັກສູດການສຶກສາ ວິທະຍາຄານສັນຕິບານ ປະຊາຊົນ ກະຊວງ ປກສ ຈະເລັ່ງໃສ່ການຄຸ້ມຄອງ, ຕິດຕາມ, ກວດກາການຂຶ້ນຫ້ອງສິດສອນຂອງຄູ-ອາຈານ ແຕ່ລະພາກວິຊາໃຫ້ເຂັ້ມງວດ ເພື່ອຈະຫັນເຂົ້າສູ່ລະບົບ, ແລະ ມາດຖານຕາມຫຼັກສູດຂອງກະຊວງສຶກສາທິການ ແລະ ກິລາວາງອອກ.

ສະຫາຍ ພັທ ຄໍາສີ ໄຊຍະໂຊກ ເລຂາໜ່ວຍພັກຮາກຖານ, ຫົວໜ້າຫ້ອງຄຸ້ມຄອງຫຼັກສູດການສຶກສາ ກ່າວໃນກອງປະຊຸມໃຫຍ່ ຄັ້ງທີ III ຂອງໜ່ວຍພັກຫ້ອງຄຸ້ມຄອງຫຼັກສູດການສຶກສາທີ່ຈັດຂຶ້ນໃນວັນທີ 16 ກໍລະກົດ 2019 ໂດຍມີສະຫາຍ ພັອ ປອ ວັນສົມ ສີສົມບັດ ຮອງເລຂາຄະນະພັກ, ຮອງອໍານວຍການວິທະຍາຄານສັນຕິບານປະຊາຊົນ ດ້ວຍສະມາຊິກພັກ ເຂົ້າຮ່ວມວ່າ: ໃນປີ 2019-2024, ຄະນະໜ່ວຍພັກຮາກຖານ ຫ້ອງຄຸ້ມຄອງຫຼັກສູດນັກສຶກສາ ຈະເອົາໃຈໃສ່ຈັດຕັ້ງປະຕິບັດໜ້າທີ່ວຽກງານວິຊາສະເພາະຕາມພາລະບົດບາດ, ສິດ, ໜ້າທີ່ຂອງຕົນ ໂດຍສະເພາະແມ່ນວຽກງານຄຸ້ມ ຄອງ, ຕິດຕາມ, ກວດກາການຂຶ້ນຫ້ອງສິດສອນຂອງຄູ-ອາຈານ ແລະ ການຂຶ້ນຫ້ອງຮໍ່າຮຽນ ຂອງນັກຮຽນ-ນັກສຶກສາຢ່າງຕໍ່ເນື່ອງ, ເປັນປົກກະຕິ ເພື່ອແນ່ໃສ່ຕີລາຄາປະເມີນຜົນຄຸນນະພາບຂອງການສິດສອນໃນແຕ່ລະໄລຍະໃຫ້ເຂົ້າສູ່ ການປະເມີນການຮຽນ-ການສອນ ຕາມ 10 ມາດຖານ ແລະ 50 ຕົວ ຊີ້ວັດທີ່ກະຊວງສຶກສາທິການ ແລະ ກິລາວາງອອກກໍຄືການຈັດຕັ້ງປະຕິບັດຂໍ້ຕົກລົງວ່າດ້ວຍການໃຫ້ຄະແນນສ່ວນທີ່ໄດ້ປະກາດທົດລອງນໍາໃຊ້ໃນໄລຍະຜ່ານມາ, ໂດຍສະເພາະແມ່ນການທົດລອງນໍາໃຊ້ ເຄື່ອງເອເລັກໂທນິກສະແກນລາຍ ມືຊ່ວຍໃນການຄຸ້ມຄອງການຮຽນ -ການສອນ.

ນອກນັ້ນ, ຍັງຈະໄດ້ຄຸ້ມຄອງ, ຕິດຕາມ, ກວດກາແຜນການເຄື່ອນໄຫວນອກໂຮງຮຽນ ເພື່ອໃຫ້ນັກສຶກສາໄດ້ໄປທັດສະນະສຶກສາເບິ່ງການປະຕິບັດໜ້າທີ່ວຽກງານຕົວ ຈິງຢູ່ແຕ່ລະກົມກອງທ້ອງຖິ່ນ, ເປັນຕົ້ນແມ່ນແຜນການໄປທັດສະນະສຶກສາຢູ່ກົມໃຫຍ່ສັນຕິບານ ແລະ ຕ່າງແຂວງ ຕາມຂະແໜງການຮຽນລົງເລິກວິຊາສະເພາະ ເພື່ອເຮັດໃຫ້ຮູ້ໝູນໃຊ້ທິດສະດີທີ່ຮຽນມາສົມທຽບກັບພຶດຕິກໍາຕົວຈິງສືບຕໍ່ສ້າງ ແຜນລົງຝືກຫັດຕົວຈິງ.

ຕະຫຼອດ 4 ປີຜ່ານມາ 2016 -2019, ຄະນະໜ່ວຍພັກຮາກຖານຫ້ອງຄຸ້ມຄອງຫຼັກສູດການສຶກສາ ໄດ້ຊີ້ນໍາ-ນໍາພາພະນັກງານວິຊາການເຮັດວຽກງານຕາມພາລະບົດບາດຕາມການມອບໝາຍ ແລະ ເນັ້ນໃສ່ຜົນສໍາເລັດຢ່າງມີຄຸນນະພາບ, ຮັບປະກັນໃຫ້ການຈັດຕັ້ງດໍາເນີນການຮຽນ-ການສອນ ຢ່າງປົກກະຕິ ແລະ ຕໍ່ເນື່ອງ ເຊັ່ນ: ຕິດຕາມ ແລະ ກວດກາການຂຶ້ນຫ້ອງຂອງຄູ-ອາຈານ ແລະ ນັກສຶກສາແຕ່ລະຮຸ່ນ ໄດ້ 1.200 ຄັ້ງ, ຈັດຕັ້ງສອບເສັງຈົບພາກວິຊາ ແລະ ເປັນກໍາມະການສອບເສັງ ໄດ້ 2.910 ຄັ້ງ, ສ້າງແຜນການເຄື່ອນໄຫວທ້າຍຊຸດຮຽນໃຫ້ນັກສຶກສາປະລິນຍາຕີຕໍ່ເນື່ອງ ແລະ ກໍ່ສ້າງ 8 ຄັ້ງ, ເຂົ້າເລກຈົບບົດສອບເສັງຈົບລາຍວິຊາໄດ້ 3.086 ບົດ ແລະ ປັບປຸງຂໍ້ກໍານົດວ່າດ້ວຍການຄຸ້ມຄອງການຮຽນ-ການສອນ ໄດ້ 1 ຄັ້ງ.

ກອງປະຊຸມ ຍັງໄດ້ປ່ອນບັດຄັດເລືອກເອົາຄະນະໜ່ວຍພັກຮາກຖານຊຸດໃໝ່ ເຊິ່ງມີຜູ້ລົງສະ ໝັກ ທັງໝົດ 5 ສະຫາຍ, ເລືອກ ເອົາ 3 ສະຫາຍ, ກອງປະຊຸມໄດ້ເປັນເອກະສັນເລືອກເອົາ ສະຫາຍ ພັທ ຄໍາສີ ໄຊຍະໂຊກ ເປັນເລຂາ ໜ່ວຍພັກ, ພັທ ນາງ ທອງສີ ທະແອ່ງພົງສັກ ເປັນຮອງເລຂາ ແລະ ສະຫາຍ ພັທ ບຸນຮຽນ ວົງສົມພູ ເປັນຄະນະ.

 

ແຫຼ່ງຂ່າວ: ຄວາມສະຫງົບລາຍວັນ

Leave a Reply

Your email address will not be published. Required fields are marked *