ການສະໜອງນໍ້າຜະລິດເຂົ້ານາປີ ຢູ່ແຂວງຫລວງນໍ້າທາ ຍັງພົບຄວາມຫຍຸ້ງຍາກ

ຕາມ​ການ​ລາຍ​ງານ​ຈາກ ທ່ານ ສອນໄຊ ອຸດົມ ຫົວໜ້າຂະແໜງຊົນລະປະທານ, ພະແນກກະຊິກຳ ແລະ ປ່າໄມ້ແຂວງຫລວງນໍ້າທາ ​ໃຫ້​ຮູ້​ວ່າ: ​ໃນ​ລະດູ​ການ​ຜະລິດ​ ເຂົ້ານາ​ປີ ​ໃນ​ປີ 2019 ນີ້ ​ເຫັນ​ວ່າສະພາບການ​ສະໜອງ​ນ້ຳ​ ເຂົ້າ​ໃສ່​ການ​ຜະລິດ​ ຢູ່​ແຂວງ​ຫລວງ​ນ້ຳ​ທາ ​ຍັງ​ພົບ​ບັນຫາ​ຫຍຸ້ງຍາກ ​ເນື່ອງ​ຈາກຝົນຕົກໜ້ອຍ, ແມ່ນໍ້າສາຍຕ່າງໆບົກແຫ້ງ, ຂະນະ​ດຽວ​ກັນ ພະແນກກະສິກຳ ແລະ ປ່າໄມ້ແຂວງກໍໄດ້ ແຕ່ງຕັ້ງພະນັກງານ ລົງຊ່ວຍ ເມືອງຫລວງນໍ້າທາ ເພື່ອປະສານສົບທົບກັບ ພະແນກ ພະລັງງານ-ບໍ່ແຮ່ແຂວງ ​ແລະ ພາກສ່ວນທີ່ຄຸ້ມຄອງເຂື່ອນໄຟຟ້ານໍ້າທາ ໃຫ້ປ່ອຍນໍ້າເຂົ້ານາ ເປັນບູລິດມະສິດທີ່ໜຶ່ງ ​ເພື່ອ​ແກ້​ໄຂ​ບັນຫາ​ເບື້ອງ​ຕົ້ນ.

ປັດຈະ​ບັນ,  ທົ່ວແຂວງຫລວງນໍ້າທາ ມີລະບົບຊົນລະປະທານທັງໜົດ 1.111 ແຫ່ງ, ໃນນີ້ມີລະບົບຊົນລະ ປະທານຂະໜາດນ້ອຍທີ່ປະຊາຊົນສ້າງເອງມີ 742 ແຫ່ງ, ໄດ້ສ້ອມແປງຊົນລະປະທານທີ່ເປເພຈາກໄພພິບັດປີ 2018 ຈໍານວນ 9 ໂຄງການ, ສ່ວນການກໍ່ສ້າງຊົນລະປະທານໃໝ່ສ້າງສໍາເລັດ 2 ໂຄງການຄື: ໂຄງການນໍ້າມະອຸ່ນ ແລະ ນໍ້າຫຍ້າເມືອງສິງ. ຖ້າຝົນຕົກປົກກະຕິຈະສາມາດສະໜອງນໍ້າຜະລິດເຂົ້ານາປີ ກວມເອົາ 95% ຂອງເນື້ອທີ່ນາທົ່ວແຂວງ 10.295 ເຮັດຕາ ​ແລະ ​ໃນປີນີ້ແຫ້ງແລ້ງຫລາຍຈະສາມາດສະໜອງນໍ້າໄດ້ພຽງ 60% ຂອງເນື້ອທີ່ນາທົ່ວ​ແຂວງ.

ໂອກາດນີ້, ທ່ານ ສອນໄຊ ອຸດົມ ຍັງໄດ້ຮຽກຮອງມາຍັງກະຊິກອນ, ປະຊາຊົນ, ພະນັກງານ, ທະຫານ, ຕໍາຫລວດຈົ່ງຊ່ວຍກັນອານຸລັກທຳມະຊາດ ແລະ ເອົາໃຈໃສ່ບົວລະບັດຮັກສາຊົນລະປະທານ ໃຫ້ມີອາຍຸການນໍາໃຊ້ຍາວນານ ແລະ ຮຽກຮອງໃຫ້ກຸ່ມນໍາໃຊ້ນໍ້າ ໃຫ້ມີຄວາມຍຸຕິທຳໃນການແບ່ງປັນນໍ້າພາຍໃນກຸ່ມ, ໃຫ້ມີຄວາມເຫັນອົກເຫັນ ໃຈເຊິ່ງກັນ ແລະ ກັນ.

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *