ບໍ່​ແກ້ວ ​ເປີດຮຽນທີດສະດີການເມືອງ-ການປົກຄອງຊັ້ນຕົ້ນ ຮຸ່ນ​ທີ V

ໃນວັນທີ 8 ກໍລະກົດ 2019 ນີ້ ຢູ່ໂຮງຮຽນ ທິດສະດີ ການເມືອງ-ການປົກຄອງແຂວງບໍ່ແກ້ວ ໄດ້ຈັດພິທີ ເປີດຮຽນທິດສະດີ ການເມືອງ-ການປົກຄອງ ລະບົບ ຊັ້ນຕົ້ນ ຮຸ່ນທີ V ປະຈຳປີ 2019 ໂດຍມີ ທ່ານ ສົມລິດ ສີຜາວັນ ຮອງເລຂາພັກແຂວງ ປະທານ ສະພາ ປະຊາຊົນ ແຂວງບໍ່ແກ້ວ, ມີບັນດາຄູ-ອາຈານ ພະນັກງານສະມາຊິກພັກ ຈາກພະແນກ ຂະແໜງການ ອ້ອມຂ້າງແຂວງ, ເມືອງ,  ​ແລະ ພາກສ່ວນ​ກ່ຽວຂ້ອງ ເຂົ້າຮ່ວມ. ທັງ​ນີ້ ກໍເພື່ອເປັນການ ຍົກລະດັບ ຄວາມຮູ້, ຄວາມສາມາດ ທາງດ້ານ ທີສະດີ ການເມືອງ-ການປົກຄອງ ໃຫ້ແກ່ສະມາຊິກ ພັກ-ພະນັກງານ ໃຫ້ຮັບຮູ້ ແລະ ເຂົ້າໃຈຕໍ່ແນວທາງຂອງພັກ.

ທ່ານ ນາງ ສີອຳໄພ ໂສລະຖີ ຮອງອຳນວຍການ ໂຮງຮຽນທິດສະດີ ການເມືອງ-ການປົກຄອງ ແຂວງບໍ່ແກ້ວ ໃຫ້ຮູ້ວ່າ: ການເປີດຊຸດ​ຮຽນ​ດັ່ງ​ກ່າວ ​ແມ່ນເພື່ອກໍ່ສ້າງ ຖັນແຖວ ພະນັກງານ ໃຫ້ມີລະດັບ ຄວາມຮູ້ທາງດ້ານ ທິດສະດີ ການເມືອງ-ການປົກຄອງ ຕໍ່ແນວທາງ ຂອງພັກ, ການຄຸ້ມຄອງຂອງລັດ ແລະ ມີແນວຄິດເຊື້ອໝັ້ນ ຕໍ່ການນຳພາຂອງພັກ, ກົດໝາຍລະບຽບຂອງລັດ, ສຳລັບການຮຽນ-ການ​ສອນ ໃນຊຸດນີ້ ມີນັກສຶກສາເຂົ້າຮຽນ ຕົວຈິງ 54 ຄົນ, ຍິງ 13  ຄົນ ໃຊ້ເວລາຮຽນ 3 ເດືອນແມ່ນຈົບຫລັກສູດ ​ໂດຍ​ມີ 5 ວິຊາຄື: ວິຊາປັດສະຍາ, ເສດຖະສາດ ການເມືອງ-ຄຸ້ມຄອງ ເສດຖະກິດ, ລັດທິສັງຄົມ ນິຍົມ ວິທະຍາເສດ, ບໍລິຫານສາດ, ວິຊາກໍ່ສ້າງພັກ ແລະ ປະຫວັດສາດ ຂອງພັກ ​ໂດຍ​ໄດ້​ມີ​ການ ຈັດແບ່ງຂັ້ນຕອນ ແລະ ຊົ່ວໂມງຮຽນ ຢ່າງ​ລະອຽດ ລວມທັງໝົດມີ 292 ຊົ່ວໂມງ ​ໂດຍ​ເລີ່​ມຮຽນ​ແຕ່​ວັນຈັນ-ສຸກ ເວລາ 16:30 ​ໂມງຫາ 18:20 ​ໂມງ.

ໂອກາດ​ນີ້, ​ທ່ານ ສົມລິດ ສີພາວັນ ກໍ​ໄດ້​ເນັ້ນ​ໜັກໃຫ້ນັກຮຽນນັກສຶກສາ, ຄູ-ອາຈານ ຈົ່ງເພີ່ມທະວີຄວາມເອົາໃຈໃສ່ປະຕິບັດຕາມໂມງເວລາ, ກົດລະບຽບ ແລະ ໜ້າທີ່ຂອງຕົນຮັບຜິດຊອບ ເປັນຕົ້ນ ແມ່ນ​ໃຫ້​ດຳ​ເນິນການຮຽນ-ການສອນ, ການຂຶ້ນຫ້ອງ ແລະ ລົງຫ້ອງ ຢ່າງ​ເປັນ​ປົກກະຕິ ບໍ່​ໃຫ້​ຂາດ​ຮຽນຖ້າບໍ່ມີເຫດຜົນ, ນອກຈາກນີ້ ຍັງຕ້ອງມີການຖອດຖອນບົດຮຽນເຊິ່ງກັນ ແລະ ກັນ ຕື່ມ​ອີກ.

 

ແຫຼ່ງຂ່າວ: ຂປລ

 

Leave a Reply

Your email address will not be published. Required fields are marked *