ທັດສະນະຕໍ່ການເລືອກສາຍຮຽນຫຼັງຈົບ ມ.ປາຍ

ພາຍຫຼັງທີ່ເສັງຈົບ ມ 7 ເປົ້າໝາຍຕໍ່ໄປຂອງນ້ອງໆນັກຮຽນ ກໍຄືກ້າວເຂົ້າສູ່ການສຶກສາຮໍ່າຮຽນໃນສາຍວິຊາຕ່າງໆ ເຊິ່ງມະຫາວິທະຍາໄລແຫ່ງຊາດໄດ້ເປີດລົງທະບຽນສອບເສັງເຂົ້າແລ້ວຈົນຮອດວັນທີ 30 ກໍລະກົດນີ້.

 

ທີມຂ່າວໜັງສືພິມ ເສດຖະກິດ – ການຄ້າ ໄດ້ມີໂອກາດສຳພາດບັນດານ້ອງນັກຮຽນທີ່ຈົບຊັ້ນ ມ 7 ໄປໃໝ່ໆໝາດໆກ່ຽວກັບສາຍທີ່ຕົນເອງເລືອກຮຽນ.

ທ້າວ ຊົ່ງປໍລີ ນັກຮຽນມາຈາກໂຮງຮຽນ ມສ ນາຊຽງດີ ເມືອງຮຸນ ແຂວງອຸດົມໄຊ ໃຫ້ສຳພາດວ່າ: ນ້ອງເອງໄດ້ມີການກະກຽມເພື່ອເສັງເຂົ້າມະຫາວິທະຍາໄລມາຕັ້ງແຕ່ຕອນກຽມເສັງຈົບຊັ້ນ ມ 7 ແລ້ວ ເຊິ່ງປັດຈຸບັນນ້ອງກໍກຳລັງຮຽນເພີ່ມ ແລະ ກຽມພິເສດໃນສາຍ B ຢູ່ສູນບໍາລຸງກຽມເສັງ ມຊ ຢູ່ພາຍນອກ. ສຳລັບການສອບເສັງເຂົ້າ ມຊ ນ້ອງມີເປົ້າໝາຍທີ່ຈະຮຽນໃນສາຂາບໍລິຫານທຸລະກິດ ໃນຄະນະເສດຖະສາດ ແລະ ບໍລິຫານ ເພາະເປັນສາຂາວິຊາທີ່ນ້ອງມີຄວາມມັກຮັກມາຕັ້ງແຕ່ຕອນຍັງຮຽນຢູ່ ມ.ປາຍ ແລະ ນ້ອງເຫັນວ່າສາຂາດັ່ງກ່າວນີ້ແມ່ນມີຄວາມສຳຄັນ ແລະ ຈຳເປັນທີ່ສຸດໃນການພັດທະນາເສດຖະ   ກິດ – ສັງຄົມ ສປປ ລາວ ເປັນປະເທດທີ່ຍັງມີ ຄວາມຕ້ອງການນັກວິຊາການໃນດ້ານນີ້ຫຼາຍເພື່ອການພັດທະນາ.

ທ້າວ ຄຳພອນ ອິນທິລາດ ນັກຮຽນ ມສ ສາທິດ ໃຫ້ສຳພາດວ່າ: ນ້ອງເອງມີເປົ້າໝາຍທີ່ຈະຮຽນໃນສາຂາກົດໝາຍແພ່ງ ແລະ ກົດໝາຍອາຍາ ໃນຄະນະນິຕິສາດ – ລັດຖະສາດ ເພາະນ້ອງເອງເປັນຄົນທີ່ມັກໃນດ້ານນີ້ຫຼາຍ ແລະ ເປັນຄົນມັກຄວາມຍຸຕິທຳ. ສະນັ້ນ, ນ້ອງຈຶ່ງມາລົງທະບຽນເພື່ອສອບເສັງໃນສາຍນີ້ ແລະ ນ້ອງເອງແມ່ນໄດ້ມີການກະກຽມ ແລະ ຄົ້ນຄວ້າບົດຮຽນມາແຕ່ເລີ່ມຮຽນ ມ 7. ນອກນັ້ນ, ປັດຈຸບັນນ້ອງກຳລັງຮຽນບຳລຸງເພື່ອສອບເສັງເຂົ້າ ມຊ ໃນສາຍ B ທີ່ສູນບໍາລຸງກຽມເສັງເຂົ້າ ມຊ ໃນໂຮງຮຽນ ມສ ສາທິດ.

ນາງ ຄຸນມີ ແສງຂັນຄຳ ນັກຮຽນ ມສ ມິດຕະພາບ ລາວ – ຫວຽດນາມ ໃຫ້ສຳພາດວ່າ: ນ້ອງເອງໄດ້ເລີ່ມຄົ້ນຄວ້າບົດຮຽນເພື່ອກຽມສອບເສັງເຂົ້າ ມຊ ມາແຕ່ຕອນຮຽນ ມ 5 ແລ້ວ ໂດຍໄດ້ສຶກສາຄົ້ນຄວ້າບົດຮຽນໃນຕຳລາຕ່າງໆ ແລະ ຄົ້ນຄວ້າບັນດາຫົວຂໍ້ສອບເສັງເຂົ້າ ມຊ ມາໄດ້ 3 ປີແລ້ວ. ນອກນັ້ນ, ປັດຈຸບັນນ້ອງກຳລັງຮຽນບໍາລຸງຢູ່ສູນບໍາລຸງກຽມເສັງ ມຊ ທາງນອກອີກ. ສໍາລັບເປົ້າໝາຍທີ່ຈະເລືອກຮຽນໃນ ມຊ ແມ່ນນ້ອງໄດ້ມາລົງທະບຽນຮຽນໃນສາຍຄູຄະນິດສາດ ເພາະນ້ອງເປັນຄົນທີ່ມັກສິດສອນ ແລະ ມັກຖ່າຍທອດຄວາມຮູ້ ແລະ ອີກປະການໜຶ່ງແມ່ນນ້ອງເອງເປັນຄົນທີ່ມັກໃນສາຍຄິດໄລ່ ແລະ ຄະນິດສາດ. ນອກນັ້ນ, ເມື່ອຮຽນຈົບໄປກໍສາມາດໄປເປັນຄູສອນໃນບັນດາໂຮງຮຽນຕ່າງໆທາງພາກລັດ ແລະ ເອກະຊົນອີກ.

ນາງ ນັດດາພອນ ໂສພາ ນັກຮຽນ ມສ ວຽງຈັນ ໃຫ້ສຳພາດວ່າ: ນ້ອງເອງໄດ້ມີການກະກຽມເພື່ອເສັງ ມຊ ມາຕັ້ງແຕ່ຕອນຄົ້ນຄວ້າບົດຮຽນເສັງຈົບຊັ້ນ ມ 7 ແລ້ວ ສຳລັບຮຽນບຳລຸງເສັງ ມຊ ໃນໄລຍະນີ້ແມ່ນນ້ອງໄດ້ຄົ້ນຄວ້າດ້ວຍຕົນເອງເທົ່ານັ້ນ. ສຳລັບເປົ້າໝາຍທີ່ເລືອກຮຽນໃນລະດັບອາຊີບແມ່ນນ້ອງໄດ້ມີເປົ້າໝາຍ 2 ວິຊາ ຄື: ພາສາອັງກິດ ແລະ ບໍລິຫານທຸລະກິດ ເພາະນ້ອງເອງເປັນຄົນທີ່ມັກຮຽນພາສາອັງກິດມາຕັ້ງແຕ່ຕອນຍັງນ້ອຍ ແລະ ມີຄວາມຝັນຢາກເຮັດທຸລະກິດເປັນຂອງຕົນເອງ.

 

ແຫຼ່ງຂ່າວ: ເສດຖະກິດ-ການຄ້າ

Leave a Reply

Your email address will not be published. Required fields are marked *