ອີ​ຣານ ​ສືບຕໍ່​ຕັດ​ປັບປຸງ​ສັນຍາ ​ຢູ່​ໃນ​ຂໍ້​ຕົກລົງ​ນີວ​ເຄລຍ

ເຈົ້າ​ໜ້າທີ່​ລະດັບ​ສູງ​ຂອງ​ອີ​ຣານ ຖະແຫຼງ​ຢູ່​ໃນ​ກອງ​ປະຊຸມ​ຖະແຫຼງ​ຂ່າວ ເມື່ອ​ວັນ​ທີ 7 ກໍລະກົດ​ນີ້​ວ່າ ອີ​ຣານ​ຈະ​ສືບຕໍ່​ຕັດ​ຫຼຸດ​ຄຳ​ສັນຍາ ທີ່​ມີ​ຢູ່​ໃນ​ຂໍ້​ຕົກລົງ​ນີວ​ເຄລຍ​ຄັ້ງ​ປະຫວັດສາດ ທີ່​ໄດ້​ລົງ​ນາມ​ເມື່ອ​ປີ 2015 ລະຫວ່າງ​ອີ​ຣານ ກັບ​ບັນດາ​ປະເທດ​ມະຫາ​ອຳນາດ​ໃນ​ໂລກ ຈາກ​ນັ້ນ​ກໍ​ເພີ່ມ​ລະດັບ​ການ​ເສີມ​ສະມັດ​ຕະ​ພາບ​ຢູ​ເຣ​ນຽມ ຂຶ້ນ 5% ເພື່ອ​ຈຸດປະສົງ​ການ​ຜະລິດ​ເຊື້ອ​ໄຟ ໃຫ້​ແກ່​ໂຮງງານ​ໄຟຟ້າ.

ເຈົ້າ​ໜ້າທີ່​ຂອງ​ອີ​ຣານ ຍັງ​ໄດ້​ກ່າວ​ເນັ້ນ​ວ່າ ອີ​ຣານ​ຈະ​ຮັກສາ​ການ​ຕັດ​ຫຼຸດ​ຄຳ​ສັນຍາ ພາຍ​ໃນ 60 ວັນ ໃນ​ແຕ່​ລະ​ເທື່ອ ໂດຍ​ຍົກເວັ້ນ​ເສຍ​ແຕ່​ວ່າ ຝ່າຍ​ຕ່າງໆ​ທີ່​ເຂົ້າ​ຮ່ວມ​ໃນ​ຂໍ້​ຕົກລົງ​ນັ້ນ ນຳ​ເອົາ​ມາດ​ຕະການ​ອອກ​ມາ ໃນ​ການ​ປ້ອງ​ກັນ​ອີ​ຣານ ຈາກ​ຄຳ​ສັ່ງ​ປິດ​ລ້ອມ​ຂອງ ສ ອາ​ເມ​ຣິ​ກາ.

ທ່ານ ອາລີ ຣາ​ບີ​ເອ ໂຄສົກ​ຂອງ​ລັດຖະບານ​ອີ​ຣານ ກໍ​ໄດ້​ກ່າວ​ຕໍ່​ກອງ​ປະຊຸມ​ຖະແຫຼງ​ຂ່າວ​ດັ່ງກ່າວ ໂດຍ​ໃຫ້​ຮູ້​ວ່າ ເລີ່ມ​ແຕ່​ວັນ​ທີ 8 ກໍລະກົດ​ນີ້​ເປັນຕົ້ນ​ໄປ ອີ​ຣານ​ຈະ​ເພີ່ມ​ລະດັບ​ການ​ເສີມ​ສະມັດ​ຕະ​ພາບ​ຢູ​ເຣ​ນຽມ ເກີນ​ແດນ 3,67% ຊຶ່ງ​ເປັນ​ລະດັບ​ກຳນົດ​ອະນຸຍາດ ຂອງ​ຂໍ້​ຕົກລົງ​ນີວ​ເຄລຍ​ນັ້ນ.

Leave a Reply

Your email address will not be published. Required fields are marked *