ພ້ອມກັນເປັນເຈົ້າການ ປ້ອງກັນພະຍາດໄຂ້ຍຸງລາຍ

ທ່ານ ບຸນ​ກອງ ສີ​ຫາ​ວົງ ລັດ­ຖະ­ມົນ­ຕີ​ກະ­ຊວງ​ສາ­ທາ­ລະ­ນະ​ສຸກ ໃຫ້​ສຳ­ພາດ​ວັນ​ທີ 8 ກໍ­ລະ­ກົດ 2019 ວ່າ: ປີ 2019 ໄຂ້­ຍຸງ​ລາຍ​ໄດ້​ລະ­ບາດ​ຢູ່​ຫຼາຍ​ປະ­ເທດ​ອາ​ຊຽນ ຄື: ປະ­ເທດ​ຟີ​ລິບ​ປິນ ມີ​ກໍ­ລະ­ນີ​ຄົນ​ເຈັບ 83.570 ກໍ­ລະ­ນີ ເສຍ​ຊີ­ວິດ 354 ຄົນ ສສ ຫວຽດ­ນາມ 81.132 ກໍ­ລະ­ນີ ເສຍ​ຊີ­ວິດ 4 ຄົນ ກຳ­ປູ­ເຈຍ 13.000 ກໍ­ລະ­ນີ ເສຍ​ຊີ­ວິດ 24 ຄົນ ໄທ 40.402 ກໍ­ລະ­ນີ ເສຍ​ຊີ­ວິດ 58 ຄົນ ສະ­ເພາະ ສປປ ລາວ ປັດ­ຈຸ­ບັນ​ມີ 11.561 ກໍ­ລະ­ນີ ເສຍ​ຊີ­ວິດ 27 ຄົນ.

ກະ­ຊວງ​ສາ­ທາ­ລະ­ນະ​ສຸກ ໄດ້​ເອົາ­ໃຈ­ໃສ່​ຕິດ­ຕາມ​ເຝົ້າ​ລະ­ວັງ​ຢ່າງ​ໃກ້­ຊິດ​ແຕ່​ຫົວ­ທີ ແລະ ໄດ້​ຊີ້​ນຳ ອອກ​ມາດ​ຕະ­ການ​ເຖິງ​ບັນ­ດາ​ແຂວງ​ທົ່ວ​ປະ­ເທດ ເພື່ອ​ກັນ ແລະ ໂຕ້​ຕອບ​ການ​ລະ­ບາດ​ບໍ່​ໃຫ້​ມີ​ການ​ແຜ່​ລາມ​ເປັນ​ວົງ​ກວ້າງ ເຊິ່ງ​ມາດ​ຕະ­ການ​ທີ່​ພົ້ນ​ເດັ່ນ​ແມ່ນ​ໄດ້​ອອກ​ຄຳ​ສັ່ງ​ແນະ­ນຳ​ເຖິງ​ບັນ­ດາ​ເຈົ້າ­ແຂວງ​ທົ່ວ​ປະ­ເທດ ເອົາ­ໃຈ­ໃສ່​ທຳ­ລາຍ​ແຫຼ່ງ​ເພາະ​ພັນ​ໜອນ​ນ້ຳ​ຍຸງ​ລາຍ ແລະ ເອົາ­ໃຈ­ໃສ່​ຕິດ­ຕາມ​ປິ່ນ­ປົວ​ຄົນ​ເຈັບ​ຢ່າງ​ໃກ້­ຊິດ ເພື່ອ​ຫຼຸດ­ຜ່ອນ​ອັດ­ຕາ​ການ​ເຈັບ ແລະ ເສຍ​ຊີ­ວິດ ທັງ​ໄດ້​ຂໍ​ການ​ສະ­ໜັບ­ສະ­ໜູນ​ຈາກ​ບັນ­ດາ​ກະ­ຊວງ​ທີ່​ກ່ຽວ­ຂ້ອງ ແລະ 3 ອົງ​ການ­ຈັດ­ຕັ້ງ​ໃນ​ການ​ສະ­ໜັບ­ສະ­ໜູນ​ຕ້ານ​ການ​ລະ­ບາດ​ຂອງ​ພະ­ຍາດ​ໄຂ້­ຍຸງ​ລາຍ ແລະ ໄດ້​ສົ່ງ​ທີມ​ງານ​ຊ່ຽວ­ຊານ (ຄວບ​ຄຸມ​ພາ­ຫະ​ນຳ​ເຊື້ອ ແລະ ປິ່ນ­ປົວ) ລົງ​ຊ່ວຍ​ແຂວງ​ສະ­ຫວັນ​ນະ​ເຂດ ແລະ ແຂວງ​ຈຳ­ປາ​ສັກ ອອກ​ຄຳ​ສັ່ງ​ເອົາ​ພະ­ນັກ­ງານ​ສູນ​ກາງ​ໄປ​ປະ­ຈຳ​ຢູ່​ສຸກ­ສາ­ລາ ແລະ ເມືອງ ໃນ 5 ແຂວງ ຄື: ຈຳ­ປາ​ສັກ ສະ­ຫວັນ​ນະ​ເຂດ ສາ­ລະ​ວັນ ຄຳ​ມ່ວນ ນະ­ຄອນ­ຫຼວງ​ວຽງ​ຈັນ ເປີດ​ຫ້ອງ​ປະ­ຕິ­ບັດ​ງານ​ເຫດ­ການ​ສຸກ​ເສີນ​ດ້ານ​ສາ­ທາ­ລະ­ນະ​ສຸກ​ທຸກໆ​ວັນ ເພື່ອ​ຕິດ­ຕາມ​ສະ­ພາບ​ການ​ວາງ​ແຜນ ແລະ ປະ​ເມີນ​ບັນ­ດາ​ມາດ​ຕະ­ການ​ທີ່​ໄດ້​ຈັດ​ຕັ້ງ​ປະ­ຕິ­ບັດ ອອກ​ແຈ້ງ​ການ​ເຖິງ​ຫ້ອງ​ກວດ​ພະ­ຍາດ​ເອ­ກະ​ຊົນ ກ່ຽວ​ກັບ​ການ​ນຳ​ສົ່ງ​ຄົນ​ເຈັບ​ທີ່​ເປັນ­ໄຂ້​ຍຸງ​ລາຍ​ໄປ​ຫາ​ໂຮງ­ໝໍ​ທີ່​ມີ​ເງື່ອນ­ໄຂ ແລະ ບໍ່​ໃຫ້​ແກ່­ຍາວ​ໃນ​ການ​ປິ່ນ­ປົວ ອອກ​ແຈ້ງ​ການ​ເຖິງ​ຮ້ານ​ຂາຍ​ຢາ​ເອ­ກະ​ຊົນ​ທົ່ວ​ປະ­ເທດ ກ່ຽວ​ກັບ​ການ​ຮ່ວມ​ມື​ແນະ­ນຳ​ຄົນ​ເຈັບ​ບໍ່​ໃຫ້​ປິ່ນ­ປົວ​ດ້ວຍ​ຕົນ​ເອງ ແລະ ໃຫ້​ໄປ​ຫາ​ແພດ​ໝໍ​ທີ່​ໂຮງ­ໝໍ ພ້ອມ​ນີ້ ຍັງ​ໄດ້​ຕິດ­ຕາມ​ເຝົ້າ​ລະ­ວັງ​ຢ່າງ​ໃກ້­ຊິດ​ທ່າ​ອ່ຽງ​ການ​ລະ­ບາດ​ຂອງ​ພະ­ຍາດ​ໄຂ້­ຍຸງ​ລາຍ ທີມ​ງານ​ຂັ້ນ​ແຂວງ ເມືອງ ໄດ້​ລົງ​ໄປ​ສອບ​ສວນ ແລະ ນຳ­ພາ​ປະ­ຊາ­ຊົນ​ຮ່ວມ​ອຳ­ນາດ​ການ​ປົກ­ຄອງ​ທ້ອງ­ຖິ່ນ ໃນ​ການ​ຕ້ານ​ການ​ລະ­ບາດ ສົ່ງ​ນັກ​ສຶກ​ສາ​ລະ­ບາດ​ວິ­ທະ­ຍາ​ພາກ​ສະ­ໜາມ ລົງ​ຊ່ວຍ​ແຂວງ​ທີ່​ມີ​ລາຍ​ງານ​ການ​ລະ­ບາດ.

ສ່ວນ​ການ​ຄວບ​ຄຸມ​ພາ­ຫະ​ນຳ​ເຊື້ອ​ແຕ່​ລະ​ແຂວງ ແລະ ເມືອງ ໄດ້​ນຳ­ພາ​ປະ­ຊາ­ຊົນ​ສ້າງ​ຂະ​ບວນ​ການ​ທຳ­ລາຍ​ແຫຼ່ງ​ເພາະ​ພັນ​ໜອນ​ນ້ຳ​ຍຸງ​ທຸກໆ​ອາ­ທິດ ແຕ່​ລະ​ແຂວງ​ມີ​ເຄື່ອງ​ຈັກ​ພົ່ນ​ນ້ຳ​ຢາ​ຂ້າ​ຍຸງ​ແກ່ ແລະ ຢາ​ໜອນ​ນ້ຳ​ຢ່າງ​ພຽງ­ພໍ ໄດ້​ແຈກ​ຢາຍ​ປື້ມ​ຄູ່​ມື​ແນະ­ນຳ​ວຽກ​ງານ​ຄວບ​ຄຸມ­ພະ​ຍາດ​ໄຂ້­ຍຸງ​ລາຍ ສົ່ງ​ວິ­ຊາ​ການ​ຄວບ​ຄຸມ​ພາ­ຫະ​ນຳ​ເຊື້ອ​ລົງ​ປະ­ຈຳ​ຊ່ວຍ​ຂັ້ນ​ແຂວງ ເມືອງ ແລະ ບ້ານ ພ້ອມ​ນີ້ ຍັງ​ໃຫ້​ຄວາມ​ສຳ­ຄັນ​ໃນ​ການ​ປິ່ນ­ປົວ ແລະ ຄຸ້ມ​ຄອງ​ກໍ­ລະ­ນີ ໂດຍ​ໄດ້​ເຝິກ­ອົບ­ຮົມ​ໃຫ້​ພະ­ນັກ­ງານ​ແພດ​ໝໍ ແລະ ພະ­ຍາ­ບານ​ໂຮງ­ໝໍ​ແຂວງ​ພາກ​ໃຕ້ ແລະ ພາກ​ກາງ ສຳ­ເລັດ​ການ​ປັບ­ປຸງ​ພິມ​ໂປ​ສ​ເຕີ​ແນະ­ນຳ​ການ​ປິ່ນ­ປົວ​ຄຸ້ມ​ຄອງ​ກໍ­ລະ­ນີ ສະ­ເພາະ​ຂອງ​ສຸກ­ສາ­ລາ ແລະ ໂຮງ­ໝໍ​ເມືອງ ແລະ ແຂວງ ກະ­ກຽມ​ແຈກ​ຢາຍ ສົ່ງ​ທີມ​ແພດ​ສູນ​ກາງ​ລົງ​ປະ­ຈຳ​ຢູ່​ໂຮງ­ໝໍ​ແຂວງ ເພື່ອ​ໃຫ້­ການ​ແນະ­ນຳ ແລະ ຊ່ວຍ​ວຽກ​ປິ່ນ­ປົວ​ຄົນ​ເຈັບ ກະ­ກຽມ​ທີມ​ນັກ​ສຶກ​ສາ​ການ​ແພດ​ປີ​ທີ 6 ລົງ​ສົມ­ທົບ​ທີມ​ແພດ​ສູນ​ກາງ​ທີ່​ໄປ​ປະ­ຈຳ­ການ​ຢູ່​ໂຮງ­ໝໍ​ແຂວງ ນອກ­ຈາກ​ນີ້ ຍັງ​ໄດ້​ເອົາ­ໃຈ­ໃສ່​ໂຄ­ສະ­ນາ​ຜ່ານ​ສື່​ມວນ​ຊົນ ເພື່ອ​ໃຫ້​ປະ­ຊາ­ຊົນ​ຮູ້​ວິ­ທີ​ປ້ອງ​ກັນ.

Leave a Reply

Your email address will not be published. Required fields are marked *