ຄະນະກວດກາແຂວງວຽງຈັນ ສຸມໃສ່ກວດກາການຄຸ້ມຄອງບໍລິຫານລັດແຕ່ລະຂັ້ນ

ໃນໂອກາດເຂົ້າຮ່ວມ ກອງປະຊຸມວຽກງານກວດກາທົ່ວແຂວງວຽງຈັນ ໃນວັນທີ 26 ຜ່ານມາ, ທ່ານ ສີໃນ ມຽງລາວັນ ຮອງປະທານ ຄະນະກວດກາສູນກາງພັກ, ອົງການກວດກາລັດຖະບານ ແລະ ຮອງຫົວໜ້າອົງການຕ້ານການສໍ້ລາດບັງຫລວງຂັ້ນສູນກາງ ໄດ້ມີຄຳເຫັນຕໍ່ກອງປະຊຸມ ໂດຍ ທ່ານ ໄດ້ເນັ້ນໃຫ້ຄະນະກວດກາພັກ-ລັດແຂວງວຽງຈັນ ສືບຕໍ່ເອົາໃຈໃສ່ຊີ້ນຳ ແລະ ສຸມໃສ່ຕິດຕາມ, ກວດກາການຄຸ້ມຄອງບໍລິຫານລັດແຕ່ລະຂັ້ນ ໃຫ້ດຳເນີນໄປຢ່າງຖືກຕ້ອງຕາມລະບຽບກົດໝາຍ ເປັນຕົ້ນ ຕິດຕາມ, ກວດກາການປະຕິບັດພາລະບົດບາດ, ໜ້າທີ່, ການໃຊ້ສິດອຳນາດແຕ່ລະຂະແໜງການຂັ້ນແຂວງ ແລະ ຂັ້ນເມືອງ, ຕິດຕາມ, ກວດກາການປະຕິບັດປະຕິບັດມະຕິ, ຄຳສັ່ງ, ກົດໝາຍ ແລະ ລະບຽບການຕ່າງໆຂອງລັດ, ການເກັບລາຍຮັບເຂົ້າງົບປະມານ, ການປະຕິບັດກົດໝາຍພາສີອາກອນ, ກົດໝາຍງົບປະມານ ແລະ ອື່ນໆ.

ພ້ອມນີ້ ໃຫ້ສືບຕໍ່ຕິດຕາມ, ກວດກາລົງເລິກ ແລະ ສືບສວນ-ສອບສວນການຈັດຕັ້ງ ແລະ ບຸກຄົນ ທີ່ພົວພັນເຖິງໂຄງການລົງທຶນ ຂອງລັດ, ການຊຳລະໜີ້ສິນແບບມີສ່ວນຫລຸດ, ການຊຳລະເກີນ ແລະ ຊ້ຳຊ້ອນໃຫ້ສຳເລັດ, ປະຕິບັດມາດຕະການກວດກາເລີ່ມແຕ່ ຫົວທີ ຕໍ່ກັບການປະຕິບັດໂຄງການລົງທຶນຂອງລັດທີ່ຜ່ານມາ ແລະ ໂຄງການກໍ່ສ້າງທາງໄຟລົດລາວ-ຈີນ ໃນຂອບເຂດແຂວງວຽງ ຈັນ, ເອົາໃຈໃສ່ຕິດຕາມ, ກວດກາການຈັດຕັ້ງປະຕິບັດ ຄຳສັ່ງເລກທີ 15/ນຍ ຂອງນາຍົກລັດຖະມົນຕີ ກ່ຽວກັບການເພີ່ມທະວີ ຄວາມເຂັ້ມງວດໃນການຄຸ້ມມຄອງ ແລະ ການຂຸດຄົ້ນໄມ້, ເຄື່ອນຍ້າຍໄມ້ ແລະ ທຸລະກິດໄມ້ ໂດຍສະເພາະການຂຸດຄົ້ນ, ປຸງແຕ່ງໄມ້ ແລະ ການສົ່ງອອກ ຜະລິດຕະພັນໄມ້, ເຄື່ອງປ່າຂອງດົງ; ການດັດ ສົມໂຮງງານປຸງແຕ່ງໄມ້ໃຫ້ມີຄວາມເໝາະສົມກັບແຕ່ລະທ້ອງ ຖິ່ນ, ຕ້ານ ແລະ ສະກັ້ນບັນດາປະກົດການຫຍໍ້ທໍ້ ກ່ຽວກັບທຸລະກິດໄມ້ໃຫ້ເຂັ້ມງວດ, ຖ້າພົບເຫັນມີການເຄື່ອນໄຫວບໍ່ຖືກຕ້ອງໃຫ້ຮີບ ຮ້ອນແກ້ໄຂໂດຍໄວ.

ພ້ອມກັນນີ້, ຕ້ອງໄດ້ຕິດຕາມ, ກວດກາການສຳຫລວດ-ຂຸດຄົ້ນແຮ່ທາດ, ຄຸ້ມຄອງສະພາບແວດລ້ອມ, ການຄຸ້ມຄອງທີ່ດິນ, ການຫັນທີ່ດິນເປັນທຶນ, ການຫັນສິດຄຸ້ມຄອງ-ນຳໃຊ້ທີ່ດິນ, ການໃຫ້ເຊົ່າ ແລະ ໃຫ້ສຳປະທານທີ່ດິນ, ການປະຕິບັດນະໂຍບາຍທີ່ດິນຂອງລັດ, ການເກັບພາສີທີ່ດິນ ແລະ ອື່ນໆ.

Leave a Reply

Your email address will not be published. Required fields are marked *