ລາວ-ອາ​ເມ​ຣິ​ກາ ເປີດ​ນຳ​ໃຊ້ ເວັບ​ໄຊ​ປົກ​ປ້ອງ​ຜູ້​ຊົມໃຊ້

ໂດຍ​ໄດ້​ຮັບ​ການ​ສະໜັບສະໜູນ​ຈາກ​ລັດຖະບານ​ສະຫະລັດ​ອາ​ເມ​ຣິ​ກາ ໂດຍ​ຜ່ານ​ອົງການ USAID ເພື່ອ​ຊ່ວຍ​ໃຫ້​ຜູ້​ຊົມໃຊ້​ໄດ້​ຮັບ​ການ​ປົກ​ປ້ອງ​ຈາກ​ການ​ປະຕິບັດ​ຢ່າງ​ບໍ່​ຍຸດຕິ​ທຳ ໃນ​ວັນ​ທີ 26 ກຸມພາ 2019 ກະຊວງ​ອຸດສາຫະກຳ ແລະ ການ​ຄ້າ ໄດ້​ຈັດ​ພິທີ​ແນະນຳ​ເວັບ​ໄຊ​ປົກ​ປ້ອງ​ຜູ້​ຊົມໃຊ້​ຂຶ້ນ​ທີ່​ກະຊວງ​ອຸດສາຫະກຳ ແລະ ການ​ຄ້າ ມີ​ທ່ານ ສົມ​ຈິດ ອິນ​ທະ​ມິດ ຮອງ​ລັດຖະມົນຕີ​ກະຊວງ​ອຸດສາຫະກຳ ແລະ ການ​ຄ້າ ທ່ານ ບຸນ​ທຽມ ແກ້ວ​ສີ​ພາ ຫົວໜ້າ​ກົມ​ການ​ຄ້າ​ພາຍ​ໃນ ທ່ານ ແພດ​ທິກ ບຣາວ​ເວີ ຮອງ​ຜູ້ອຳນວຍການ​ອົງການ USAID  ພະນັກງານ​ທີ່​ກ່ຽວຂ້ອງ​ພາກ​ລັດ ແລະ ເອກະ​ຊົນ​ເຂົ້າ​ຮ່ວມ.

ທ່ານ ແພດ​ທິກ ບຣາວ​ເວີ ກ່າວ​ວ່າ: ເວັບ​ໄຊ​ປົກ​ປ້ອງ​ຜູ້​ຊົມໃຊ້​ແມ່ນ​ເຄື່ອງມື​ໃໝ່​ອັນ​ໜຶ່ງ​ຊ່ວຍ​ເຮັດ​ໃຫ້​ຜູ້​ຊົມໃຊ້​ຮູ້​ຄຸນຄ່າ​ກັບ​ເງິນ​ທີ່​ເຂົາເຈົ້າ​ຈ່າຍ​ໄປ ແລະ ຍັງ​ເຮັດ​ໃຫ້​ເກີດ​ການ​ແຂ່ງຂັນ​ທີ່​ເປັນ​ທຳ​ສຳລັບ​ຜູ້​ປະກອບ​ການ ແລະ ນັກທຸລະກິດ​ທີ່​ສະໜອງ​ສິນຄ້າ ແລະ ການ​ບໍລິການ​ໃຫ້​ມີ​ຄຸນ​ນະ​ພາບ​ສູງ ສຳລັບ​ເວັບ​ໄຊ​ປົກ​ປ້ອງ​ຜູ້​ຊົມໃຊ້​ແຈ້ງ​ໃຫ້​ຜູ້​ຊົມໃຊ້​ຮັບ​ຮູ້​ເຖິງ​ສິດ​ຂອງ​ຕົນ​ມີ​ຂໍ້​ມູນ​ທີ່​ບອກ​ກ່ຽວ​ກັບ​ການ​ຊື້​ສິນຄ້າ ແລະ ການ​ບໍລິການ​ທີ່​ປອດ​ໄພ ແລະ ນຳ​ສະເໜີ​ຊ່ອງ​ທາງ​ຮ້ອງທຸກ​ໃຫ້​ກັບ​ຜູ້​ຊົມໃຊ້ ໃນ​ກໍລະນີ​ທີ່​ຜູ້​ຊົມໃຊ້​ຖືກ​ປະຕິບັດ​ຢ່າງ​ບໍ່​ຍຸຕິ​ທຳ​ໃນ​ເວັບ​ໄຊ​ຍັງ​ເປັນ​ອີກ​ຊ່ອງ​ທາງ​ໜຶ່ງ​ທີ່​ສາມາດ​ສົ່ງ​ຄຳ​ຮ້ອງທຸກ ຫຼື ແຈ້ງ​ເບາະ​ແສ​ກ່ຽວ​ກັບ​ການ​ປະຕິບັດ​ທີ່​ບໍ່​ເໝາະ​ສົມ ຫຼື ບໍ່​ເປັນ​ທຳ​ການ​ໂທ​ແຈ້ງ​ຜ່ານ​ສາຍ​ດ່ວນ 1510 ໃນ​ເວັບ​ໄຊ​ຍັງ​ມີ​ວິ​ດີ​ໂອ​ກ່ຽວ​ກັບ​ວຽກ​ງານ​ປົກ​ປ້ອງ​ຜູ້​ຊົມໃຊ້ ທີ່​ສະໜັບສະໜູນ​ໂດຍ ອົງການ USAID ທີ່​ສະແດງ​ໃຫ້​ເຫັນ​ວ່າ​ຜູ້​ຊົມໃຊ້​ສາມາດ​ປົກ​ປ້ອງ​ຕົນ​ເອງ​ໄດ້.

ລັດຖະບານ​ສະຫະລັດ​ອາ​ເມ​ຣິ​ກາ ສະໜັບສະໜູນ​ການ​ສ້າງ​ເວັບ​ໄຊ ໂດຍ​ຜ່ານ​ໂຄງການ USAID LUNA II ເພື່ອ​ຊ່ວຍ​ລາວ​ເຮົາ​ເຊື່ອມ​ໂຍງ​ເຂົ້າ​ໃນ​ຕະຫຼາດ​ໂລກ ໂດຍ​ສະໜັບສະໜູນ​ລັດຖະບານ​ລາວ​ໃນ​ການ​ສ້າງ ແລະ ຈັດ​ຕັ້ງ​ປະຕິບັດ​ບັນດາ​ນະໂຍບາຍ ແລະ ລະບຽບ​ການ​ໃຫ້​ມີ​ຄວາມ​ໂປ່ງ​ໃສ​ມີ​ປະສິດທິພາບ ແລະ ສອດ ຄ່ອງ​ກັບ​ມາດຕະຖານ​ສາກົນ ເຊິ່ງ​ທ່ານ​ສາມາດ​ເຂົ້າ​ເບິ່ງ​ເວັບ​ໄຊ​ໄດ້​ທີ່ www.lcp.gov.la.

 

ແຫຼ່ງຂ່າວ: ນສພ ວຽງຈັນໃໝ່

 

Leave a Reply

Your email address will not be published. Required fields are marked *