ສັງ​ທອງ​ຈະ​ສູ້​ຊົນ​ຜະລິດ​ເຂົ້າ​ໃຫ້​ໄດ້ 38 ພັນ​ກວ່າ​ໂຕນ

ທ່ານ ສົມ​ເດດ ບຸບຜາ​ຄຳ ຮອງ​ຫົວໜ້າ​ຫ້ອງການ​ກະສິກຳ ແລະ ປ່າໄມ້ ເມືອງ​ສັງ​ທອງ  ໃຫ້​ສຳພາດ​ວັນ 26 ກຸມພາ 2019 ວ່າ: ປີ 2018 ການ​ຜະລິດ​ເຂົ້ານາ​ປີ​ເນື້ອທີ່​ແຜນການ 8.500 ເຮັກຕາ ປະຕິບັດ​ໄດ້ 8.320 ເຮັກຕາ ສະມັດຖະພາບ 4,5 ໂຕນ​ຕໍ່​ເຮັກຕາ ຜົນ​ຜະລິດ 37.440 ໂຕນ ນາແຊງ 58 ເຮັກຕາ ສະມັດຖະພາບ 4,15 ໂຕນ​ຕໍ່​ເຮັກຕາ ຜົນ​ຜະລິດ 240 ໂຕນ ແລະ ສວນ​ປູກ​ເຂົ້າ 584 ເຮັກຕາ ສະມັດຖະພາບ 1,8 ໂຕນ​ຕໍ່​ເຮັກຕາ ຜົນ​ຜະລິດ 1.650 ໂຕນ ລວມ​ຜົນ​ຜະລິດ​ທັງ​ໝົດ 38.713 ໂຕນ ນອກ​ນີ້ ເມືອງ​ສັງ​ທອງ​ຍັງ​ໄດ້​ສົ່ງເສີມ​ປະຊາຊົນ​ປູກ ພືດ​ອຸດສາຫະກຳ ປະຕິບັດ​ໄດ້ 1.505 ເຮັກຕາ ຜົນ​ຜະລິດ 27.358 ໂຕນ  ປູກ​ພືດ​ຜັກ​ປະຕິບັດ​ໄດ້ 1.067 ເຮັກຕາ ຜົນ​ຜະລິດ 10.394 ໂຕນ ພ້ອມ​ດຽວ​ກັນ​ນີ້ ຍັງ​ໄດ້​ຊຸກຍູ້​ໃຫ້​ປະຊາຊົນ​ລ້ຽງ​ງົວ ຄວາຍ ໝູ ແລະ ແບ້ ໄດ້​ທັງ​ໝົດ 24.950 ໂຕ ສັດ​ປີກ 72.038 ໂຕ ສາມາດ​ສະໜອງ​ທາດ​ຊີ້ນ​ໃຫ້​ສັງຄົມ​ໄດ້ 460 ໂຕນ​ຕໍ່​ປີ ພ້ອມ​ທັງ​ສົ່ງເສີມ​ໃຫ້​ປະຊາຊົນ​ປູກ​ຫຍ້າ​ລ້ຽງສັດ​ໄດ້  406,22 ເຮັກຕາ.

ສຳລັບ​ປີ 2019 ຫ້ອງການ​ກະສິກຳ ແລະ ປ່າໄມ້ ເມືອງ​ສັງ​ທອງ ສືບຕໍ່​ຊຸກຍູ້​ປະຊາຊົນ​ຜະລິດ​ເຂົ້ານາ​ປີ ເນື້ອທີ່ 8.500 ເຮັກຕາ ຜົນ​ຜະລິດ​ໃຫ້​ໄດ້ 36.635 ໂຕນ ໃນ​ນັ້ນ ເຂົ້າ​ອິນ​ຊີ 387,8 ເຮັກຕາ ນາແຊງ 280 ເຮັກຕາ ຜົນ​ຜະລິດ 1.260 ໂຕນ ສວນ​ປູກ​ເຂົ້າ 584 ເຮັກຕາ ຜົນ​ຜະລິດ 1.051 ໂຕນ ລວມ​ຜົນ​ຜະລິດ​ໃຫ້​ໄດ້ 38.896 ໂຕນ ພືດ​ອຸດສາຫະກຳ​ໃຫ້​ໄດ້ 800 ເຮັກຕາ ຜົນ​ຜະລິດ 6.150 ໂຕນ ພືດ​ຜັກ 560 ເຮັກຕາ ຜົນ​ຜະລິດ 3.920 ໂຕນ ຊຸກຍູ້​ປະຊາຊົນ​ຂາຍ​ຢາງພາລາ​ກ້ອນ​ໃຫ້​ໄດ້ 1.200 ໂຕນ ເຊິ່ງ​ຈະ​ສາມາດ​ສ້າງ​ລາຍ​ຮັບ​ໃຫ້​ປະຊາຊົນ​ໄດ້​ປະມານ 6 ຕື້​ກີບ ແລະ ຊຸກຍູ້​ປະຊາຊົນ​ໃນ​ການ​ຜະລິດ​ທາດ​ຊີ້ນ​ໃຫ້​ໄດ້ 1.043 ໂຕນ​ຕໍ່​ປີ.

ສ່ວນ​ການ​ຜະລິດ​ພືດ​ລະດູແລ້ງ​ໃນ​ສົກ​ປີຜ່ານມາ ໂດຍ​ສະເພາະ ການ​ຜະລິດ​ເຂົ້ານາແຊງ​ຕາມ​ແຜນການ 245 ເຮັກຕາ ສາມາດ​ປັກ​ດຳ​ໄດ້ 53 ເຮັກຕາ ເທົ່າ​ກັບ 22% ສາເຫດ​ຍ້ອນ​ການ​ຟື້ນ​ຟູ​ສ້ອມແປງ​ຊົນລະປະທານ​ບໍ່​ທັນ​ສຳເລັດ 4 ສະຖານີ ແລະ 2 ອ່າງເກັບນ້ຳ ເຊິ່ງ​ມີ​ອ່າງເກັບນ້ຳ​ທີ່​ສ້າງ​ໃໝ່​ຢູ່​ບ້ານ​ເຕົາ​ໄຫ ທີ່​ເປັນ​ໂຄງການ​ຊ່ວຍເຫຼືອ​ລ້າ​ຈາກ​ລັດຖະບານ ສ ເກົາຫຼີ ມາ​ຮອດ​ປັດຈຸບັນ​ສຳເລັດ​ປະມານ 90% ຄາດ​ວ່າ​ໂຄງການ​ນີ້​ຈະ​ສຳເລັດ​ການ​ກໍ່ສ້າງ​ປີ 2019.

ວຽກ​ງານ​ຕ້ານ​ແລ້ງ?ຕ້ານ​ຖ້ວມ ໄດ້​ມີ​ຄະນະ​ກຳມະການ​ຊຸກຍູ້​ການ​ຜະລິດ​ລະດູແລ້ງ?ຕ້ານ​ຖ້ວມ ຂັ້ນ​ນະຄອນຫຼວງ​ວຽງ​ຈັນ ແລະ ເມືອງ​ໃນ​ການ​ເຝົ້າ​ລະວັງ​ໄພ​ທຳ​ມະ​ຊາດ ພະຍາດ​ສັດ ແລະ ພືດ​ໃນ​ລະດູຝົນ ໃນ​ໄລຍະ​ຜ່ານ​ມາ ມີ​ໄພ​ທຳ​ມະ​ຊາດ​ນ້ຳ​ຖ້ວມ​ເຮັດ​ໃຫ້​ເນື້ອທີ່​ການ​ຜະລິດ​ຂອງ​ປະຊາຊົນ​ນາ​ເຂົ້າ ພືດ​ຜັກ ໄມ້​ກິນ​ໝາກ ພືດ​ອຸດສາຫະກຳ ໜອງ​ປາ ທົ່ງ​ຫຍ້າ​ລ້ຽງສັດ ໄມ້​ອຸດສາຫະກຳ ແລະ ອື່ນໆ ເສຍ​ຫາຍ 280,48 ເຮັກຕາ ປະຊາຊົນ​ໄດ້​ຮັບ​ການ​ຟື້ນ​ຟູ​ພາຍຫຼັງ​ນ້ຳ​ຖ້ວມ​ຈາກ​ພະ​ແນກ​ກະສິກຳ ແລະ ປ່າໄມ້ ນວ ມີ​ແນວ​ພັນ​ເຂົ້າ 1 ພັນ​ກິ​ໂລ ມູນ​ຄ່າ 5 ລ້ານ​ກີບ ແລະ ແນວ​ພັນ​ພືດ​ຜັກ ມູນ​ຄ່າ 16 ລ້ານ​ກວ່າ​ກີບ.

 

ແຫຼ່ງຂ່າວ: ນສພ ວຽງຈັນໃໝ່

 

Leave a Reply

Your email address will not be published. Required fields are marked *