ເຜີຍແຜ່ຜົນກອງປະຊຸມສຸດຍອດ ເຂດສາມຫຼ່ຽມພັດທະນາ

ກະຊວງການຕ່າງປະເທດ ຮ່ວມກັບແຂວງສາລະວັນ ໄດ້ຈັດກອງປະຊຸມເຜີຍແຜ່ ແລະ ຜັນຂະຫຍາຍຜົນກອງປະຊຸມສຸດຍອດເຂດ ສາມຫຼ່ຽມພັດທະນາ ກຳປູເຈຍ – ລາວ – ຫວຽດນາມ ( Cambodia, Laos, Vietnam:

CLV ) ຄັ້ງທີ 10 ແລະ ກະກຽມແຜນວຽກທີ່ສໍາຄັນ ສໍາລັບສົກປີ 2019 – 2020 ໃນວັນທີ 27 ກຸມພາຜ່ານມາ ທີ່ສະໂມສອນຂອງຫ້ອງ ວ່າການປົກຄອງແຂວງສາລະວັນ ພາຍໃຕ້ການເປັນ     ປະທານຮ່ວມຂອງ ທ່ານ ທອງຜ່ານ ສະຫວັນເພັດ ຮອງລັດຖະມົນຕີກະຊວງ ການຕ່າງປະເທດ ແລະ ທ່ານ ພູທົງ ຄຳມະນີວົງ ຮອງເຈົ້າແຂວງໆສາລະວັນ; ມີຜູ້ເຂົ້າຮ່ວມຈາກບັນດາຂະແໜງການທີ່ກ່ຽວຂ້ອງ ຂອງ 4 ແຂວງພາກໃຕ້ ຄື: ແຂວງສາລະວັນ, ຈໍາປາສັກ, ເຊກອງ ແລະ ອັດຕະປື ຈໍານວນ 100 ກວ່າທ່ານ.

ການຈັດກອງປະຊຸມຄັ້ງນີ້ ຈຸດປະສົງແມ່ນເພື່ອເຜີຍແຜ່, ປຶກສາຫາລື ແລະ ແລກປ່ຽນຄວາມຄິດເຫັນກ່ຽວກັບການຜັນຂະຫຍາຍ ຜົນຂອງກອງປະຊຸມສຸດຍອດເຂດສາມຫຼ່ຽມພັດທະນາ ກໍາປູເຈຍ – ລາວ – ຫວຽດນາມ ຄັ້ງທີ 10 ໂດຍສະເພາະບັນດາເອກະສານ ທີ່ຖືກຮັບຮອງເອົາແລ້ວ ເປັນຕົ້ນແມ່ນຖະແຫຼງການຮ່ວມຂອງກອງປະຊຸມສຸດຍອດ ກຳປູເຈຍ – ລາວ – ຫວຽດນາມ CLV ຄັ້ງທີ 10 ແລະ ແຜນປະຕິບັດງານວ່າດ້ວຍການເຊື່ອມຈອດເສດຖະກິດ CLV ເຖິງປີ 2030 ລວມທັງສັນຍາວ່າດ້ວຍການສົ່ງເສີມ ແລະ ອໍານວຍຄວາມສະດວກທາງດ້ານການຄ້າຢູ່ເຂດສາມຫຼ່ຽມພັດທະນາ ກໍາປູເຈຍ – ລາວ – ຫວຽດນາມ ( CLV DTA ) ທີ່ໄດ້ຮັບການ ລົງນາມລະຫວ່າງລັດຖະບານຂອງ 3 ປະເທດ ໃນກອງປະຊຸມສຸດຍອດ CLV ຄັ້ງທີ 9 ເດືອນພະຈິກ 2016 ທີ່ ສຽມລຽບ ປະເທດກຳປູເຈຍ.

ທັງນີ້, ກໍເພື່ອຊຸກຍູ້ການພັດທະນາເສດຖະກິດ – ສັງຄົມຂອງ ສປປ ລາວເຮົາ ກໍຄືບັນດາ   ແຂວງຢູ່ໃນເຂດສາມຫຼ່ຽມພັດທະນາ ລວມທັງຊຸກຍູ້ການເຊື່ອມໂຍງເສດຖະກິດກັບພາກພື້ນ ແລະ ສາກົນຂຶ້ນເທື່ອລະກ້າວ. ນອກຈາກນີ້, ຍັງໄດ້ປຶກສາຫາລື ແລະ ແລກປ່ຽນຄວາມຄິດເຫັນກ່ຽວກັບການກະກຽມຄວາມພ້ອມໃນດ້ານຕ່າງໆຂອງ ສປປ ລາວ ທີ່ຈະເປັນເຈົ້າພາບຈັດກອງປະຊຸມສຸດ ຍອດເຂດສາມຫຼ່ຽມພັດທະນາ ກໍາປູເຈຍ – ລາວ – ຫວຽດນາມ ຄັ້ງທີ 11 ໃນປີ 2020 ແລະ ແຜນວຽກທີ່ສຳຄັນຕ່າງໆ ແຕ່ປີ 2019 – 2020. ພ້ອມດຽວກັນນີ້, ບັນດາຜູ້ເຂົ້າຮ່ວມໄດ້ຮັບຟັງການລາຍງານຄວາມຄືບໜ້າຂອງການຈັດຕັ້ງປະຕິບັດວຽກງານໃນກົນໄກ ການຮ່ວມມື CLV ຈາກ 4 ແຂວງພາກໃຕ້ ໃນໄລຍະຜ່ານມາ ລວມມີຜົນໄດ້ຮັບ, ຂໍ້ຄົງຄ້າງ, ຂໍ້ສະເໜີ ແລະ ທິດທາງແກ້ໄຂວຽກ ງານໃນຕໍ່ໜ້າ.

ກອງປະຊຸມຄັ້ງນີ້ໄດ້ອັດລົງດ້ວຍຜົນສຳເລັດອັນຈົບງາມ ແລະ ບັນລຸໄດ້ຈຸດປະສົງເປົ້າໝາຍທີ່ວາງໄວ້ ໂດຍສາມາດກໍາໄດ້ບັນດາ ທ່າແຮງ, ກາລະໂອກາດ ແລະ ບັນດາສິ່ງທ້າທາຍຂອງ 4 ແຂວງພາກໃຕ້ ໃນກົນໄກການຮ່ວມມື CLV ແລະ ໄດ້ປຶກສາຫາລື, ເປັນເອກະພາບກັນກ່ຽວກັບການກຳນົດພາລະໜ້າທີ່ ແລະ ຄວາມຮັບຜິດຊອບຂອງບັນດາຂະແໜງການ ກ່ຽວຂ້ອງ ເພື່ອກະກຽມຈັດຕັ້ງຜັນຂະຫຍາຍແຜນວຽກໃນຕໍ່ໜ້າ ກໍຄືບັນດາຂໍ້ຕົກລົງເຫັນດີຂອງຜູ້ນຳ 3 ປະເທດ.

Leave a Reply

Your email address will not be published. Required fields are marked *