‘ທຣັມ’ເຜີຍເຈລະຈາກັບ’ຄິມ’ ທີ່ຮ່າໂນ້ຍຫລົ້ມ ເພາະເລື່ອງຂວ້ຳບາດ

ສຳນັກຂ່າວຕ່າງປະເທດລາຍງານໃນວັນທີ 28 ກຸມພາ 2019 ວ່າ ປະທານາທິບໍດີໂດນັລ ທຣັມ ຖະແຫລງພາຍຫລັງສຳເລັດການ ປະຊຸມຢ່າງເປັນທາງການ ຄັ້ງທີ 2 ກັບທ່ານ ຄິມ ຈອງ ອຶນ ຜູ້ນຳສູງສຸດເກົາຫລີເໜືອເຊິ່ງສຳເລັດໄວກ່ວາກຳນົດການ ແລະບໍ່ມີການ ລົງນາມຂໍ້ຕົກລົງໃດໆຕາມທີ່ທຳນຽບຂາວປະກາດກ່ອນໜ້ານີ້ ໂດຍຜູ້ນຳສະຫະລັດກ່າວພຽງວ່າ “ຊີວິດຄົນເຮົາຕ້ອງກ້າວເດີນຕໍ່ໄປ ແລະນີ້ກໍ່ເປັນອີກກ້າວໜຶ່ງ” ກ່ອນອະທິບາຍວ່າ ລັດຖະບານປຽງຢາງຕ້ອງການໃຫ້ລັດຖະບານສະຫະລັດຍົກເລີກມາດຕະການຂວ້ຳ ບາດທັງໝົດ ເຊິ່ງ ທຣັມ ເອງຍັງບໍ່ສາມາດຕອບຮັບໄດ້

ຢ່າງໃດກໍ່ຕາມຜູ້ນຳສະຫະລັດຢືນຢັນວ່າ ການພົບຫາລືຄັ້ງນີ້ເຊິ່ງເປັນຄັ້ງທີ 2 ຕໍ່ຈາກການປະຊຸມທີ່ສິງກະໂປເມື່ອເດືອນມິຖຸນາ ປີທີ່ຜ່ານມາ ແມ່ນວ່າຜົນທີ່ອອກມາ ໜ້າເສຍໃຈ ຈາກທີ່ເລີ່ມຕົ້ນດ້ວຍດີເມື່ອຄືນວັນພຸດທີ່ຜ່ານມາ ແຕ່ ທຣັມ ຢືນຢັນວ່າ ການປະຊຸມຄັ້ງນີ້ມີຄວາມຄືບໜ້າ ບໍ່ວ່າຈະເປັນແນວຄິດເລື່ອງການເປີດສູນປະສານງານຂອງລັດຖະບານສະຫະລັດໃນນະຄອນ ຫລວງປຽງຢາງ ຖ້າຫາກເປັນຈິງຈະເປັນຈຸດເລີ່ມຕົ້ນຄັ້ງສຳຄັນໃນການຟື້ນຟູຄວາມສຳພັນທາງການທູດໃນລະດັບທະວິພາຄີ ແລະຄຳໝັ້ນຈາກທ່ານ ຄິມ ຈອງ ອຶນ ໃນເລື່ອງການບໍ່ທົດລອງຂີປະນາວຸດອີກ ແລະການປົດນິວເຄຼຍ ແມ່ນວ່າຜູ້ຊ່ຽວຊານຫລາຍ ຄົນວິເຄາະໄປໃນທາງດຽວກັນວ່າ ເລື່ອງການປົດນິວເຄຼຍ ເປັນໄປໄດ້ຍາກຫລາຍ ເພາະໃນຄວາມເປັນຈິງຜູ້ນຳທັງສອງທ່ານແປ ຄວາມໝາຍເລື່ອງດັ່ງກ່າວ ແຕກຕ່າງກັນ

ຫລັງຈາກນັ້ນ ທຣັມ ກໍ່ເດີນທາງກັບໂດຍການເຮືອບິນປະຈຳຕຳແຫ່ນງ ແອຟອຊວັນ ອອກຈາກນະຄອນຫລວງຮ່າໂນ້ຍ ເພື່ອກັບ ນະຄອນຫລວງວໍຊິງຕັນທັນທີ ຂະນະທີ່ຫາກລັດຖະບານປຽງຢາງຍັງບໍ່ປ່ຽນກຳນົດການ ທ່ານຄິມ ຈອງ ອຶນ ແລະ ຄະນະຈະຢ້ຽມຢາມ ຫວຽດນາມຕໍ່ຈົນຮອດວັນເສົານີ້ ເພື່ອເບິ່ງໂຄງການພັດທະນາດ້ານເສດຖະກິດ ແລະອຸດສາຫະກຳຂອງລັດຖະບານຫວຽດນາມ

Leave a Reply

Your email address will not be published. Required fields are marked *