ປກສ ເມືອງສິງ ທໍາລາຍສວນຝິ່ນ ໃນຂອບເຂດ 2 ບ້ານ ລວມເນື້ອທີ່ 3.000 ກວ່າຕາແມັດ

ກອງບັນຊາການ ປກສ ເມືອງສິງ ແຂວງຫຼວງນ້ຳທາ ໄດ້ທຳລາຍສວນຝິ່ນທີ່ປະຊາຊົນລັກລອບປູກ ຢູ່ບ້ານພູດອນທັນ ແລະ ບ້ານນ້ຳມາຍ ເມືອງສິງ ຈໍານວນ 3.000 ກວ່າຕາແມັດ, ພາຍໃຕ້ການນຳພາໂດຍ ຮອ ຖາວອນ ພົມມະຈັນ ຮອງຫົວໜ້າພະແນກຕຳຫຼວດ ປກສ ເມືອງສິງ, ມີ ປກສ ກຸ່ມບ້ານອຸດົມສິນ, ອຳນາດການປົກຄອງ 2 ບ້ານ ແລະ ປກຊ-ປກສ ເຂົ້າຮ່ວມ.

ຮອ ຖາວອນ ພົມມະຈັນ ໄດ້ໃຫ້ຮູ້ວ່າ:ໂດຍການປະຕິວັດຄຳສັ່ງຂອງທ່ານເຈົ້າແຂວງ ເລກທີ 01/ຈຂ ວ່າດ້ວຍ ການກວດກາ, ຄວບຄຸມ ແລະ ສະກັດກັ້ນການປູກຝິ່ນ, ສູບຝິ່ນຄືນໃໝ່ ແລະ ການລັກລອບຊື້-ຂາຍຢາເສບຕິດທຸກປະເພດ.ຜ່ານການກວດກາສວນຝິ່ນຂອງປະຊາຊົນ ໃນຂອບເຂດເມືອງ ແມ່ນພົບເຫັນປະຊາຊົນບ້ານພູດອນທັນ ລັກລອບປູກຝິ່ນ 15 ຄອບຄົວ, ມີເນື້ອທີ 2 ເຮັກຕາ ກັບ 181 ຕາແມັດ ແລະ ບ້ານນ້ຳມາຍ ຈຳນວນ 2 ຄອບຄົວ, ມີເນື້ອທີ່ທັງໝົດ 881 ຕາແມັດ ລວມເນື້ອທີ່ທັງໝົດ 3.070 ຕາແມັດ.ຈາກນັ້ນ, ຈຶ່ງໄດ້ສົມທົບກັບພາກສ່ວນທີ່ກ່ຽວຂ້ອງໄປທໍາລາຍດ້ວຍການຖາງ ແລະ ຫຼົກ ເພື່ອບໍໃຫ້ຕົ້ນຝິ່ນເຕີບໃຫຍ່ໄດ້ອີກ.

ໃນການລົງທຳລາຍສວນຝິ່ນຄັ້ງນີ້, ເຈົ້າໜ້າທີ່ ໄດ້ສຶກສາອົບຮົມກ່າວເຕືອນ ຜູ້ທີ່ເປັນເຈົ້າຂອງສວນຝິ່ນ ພ້ອມເຊັ່ນບົດບັນທຶກໃຫ້ຢຸດເຊົາ ແລະ ອະທິບາຍໃຫ້ຮູ້ເຖິງຜົນຮ້າຍຂອງຝິ່ນ, ໃຫ້ຮູ້ເຖິງຄວາມຜິດ ເພື່ອບໍ່ໃຫ້ມີການລັກລອບປູກຝິ່ນຕື່ມອີກ.

ແຫຼ່ງຂ່າວ: ນສພ ຄວາມສະຫງົບ

Leave a Reply

Your email address will not be published. Required fields are marked *