ວິທະຍາໄລປາກປ່າສັກ – ໂຮງແຮມ ລັດສະໝີ ຮ່ວມພັດທະນາຊັບພະຍາກອນມະນຸດ

ວິທະຍາໄລເຕັກນິກປາກປ່າສັກ ແລະ ໂຮງແຮມ ລັດສະໝີ ພລາຊາ ໄດ້ຮ່ວມກັນພັດທະນາຊັບພະຍາກອນມະນຸດ ເພື່ອສົ່ງເສີມ ແລະ ກໍ່ສ້າງກໍາລັງແຮງງານທີ່ມີຄຸນນະພາບ ຕອບສະໜອງໄດ້ຕາມແຜນພັດທະນາເສດຖະກິດ – ສັງຄົມ.

ເມື່ອວັນທີ 26 ກຸມພາຜ່ານມາ ທີ່ຫ້ອງປະຊຸມວິທະຍາໄລປາກປ່າສັກ ໄດ້ມີພິທີລົງນາມບົດບັນທຶກຄວາມເຂົ້າໃຈ ກ່ຽວກັບການຮ່ວມມືທາງດ້ານວິຊາການ ແລະ ພັດທະນາຊັບພະຍາກອນມະນຸດແບບຍືນຍົງ ໂດຍເປັນກຽດຮ່ວມລົງນາມຂອງ ທ່ານ ສາຍຄໍາ ພັນທະວົງ ຜູ້ອໍານວຍການວິທະຍາໄລເຕັກນິກປາກປ່າສັກ ແລະ ທ່ານ ແພງສະຫວັນ ບົວຄໍາວົງສາ ຜູ້ຈັດການຝ່າຍບຸກຄະລາກອນ ໂຮງແຮມ ລັດສະໝີ ພລາຊາ, ມີ ທ່ານ ໜູພັນ ອຸດສາ ຫົວໜ້າກົມອາຊີວະສຶກສາ ກະຊວງສຶກສາທິການ ແລະ ກີລາ, ພ້ອມດ້ວຍຄະນະຮັບຜິດຊອບທີ່ກ່ຽວຂ້ອງທັງ 2 ຝ່າຍ ເຂົ້າຮ່ວມເປັນສັກຂີພິຍານ.

ການຮ່ວມລົງນາມໃນຄັ້ງນີ້ ແມ່ນເພື່ອເຮັດໃຫ້ການຈັດຕັ້ງການຮ່ວມມືທາງດ້ານວິຊາການ ແລະ ພັດທະນາຊັບພະຍາກອນມະນຸດແບບຍືນຍົງ ໃຫ້ດໍາເນີນໄປຕາມແນວທາງນະໂຍບາຍຂອງພັກ ແລະ ລັດຖະບານ ເພື່ອເປັນການສົ່ງເສີມ, ກໍ່ສ້າງກໍາລັງແຮງງານທີ່ມີຄຸນນະພາບ, ຕອບສະໜອງໄດ້ຕາມແຜນພັດທະນາເສດຖະກິດ – ສັງຄົມແຕ່ລະໄລຍະ.

ທັງສອງຝ່າຍໄດ້ຕົກລົງຮ່ວມກັນ ຄື: ວິທະຍາໄລເຕັກນິກປາກປ່າສັກ ແມ່ນມີໜ້າທີ່ ແລະ ຄວາມຮັບຜິດຊອບ ຄື: ສະໜອງອາຄານ – ສະຖານທີ່, ຫ້ອງຮຽນທິດສະດີ, ຫ້ອງຮຽນພາກປະຕິບັດເຂົ້າໃນການຈັດຕັ້ງການຮຽນ – ການສອນ, ອໍານວຍຄວາມສະດວກອື່ນໆ ເພື່ອຮັບໃຊ້ໃຫ້ແກ່ການຮຽນ – ການສອນ ແລະ ການຝຶກອົບຮົມ, ຄົ້ນຄວ້າ ແລະ ນໍາສົ່ງນັກຮຽນ – ນັກສຶກສາລົງພາກປະຕິບັດຕົວຈິງຢູ່ ໂຮງແຮມ ລັດສະໝີ ພລາຊາ ຕາມການຕົກລົງຮ່ວມກັນ, ສະໜອງຂໍ້ມູນ – ຂ່າວສານດ້ານການຝຶກອົບຮົມ, ການພັດທະນາວິຊາການ ແລະ ແລກປ່ຽນປະສົບການວິຊາຊີບຕາມທ່າແຮງຂະຫຍາຍຕົວທາງດ້ານເຕັກໂນໂລຊີ ແລະ ທັນສະໄໝ.

ສ່ວນ ໂຮງແຮມ ລັດສະໝີ ພລາຊາ ແມ່ນມີໜ້າທີ່ ແລະ ຄວາມຮັບຜິດຊອບ ຄື: ຮ່ວມກັບວິທະຍາໄລເຕັກນິກປາກປ່າສັກ ພັດທະນາຫຼັກສູດ ແລະ ຕອບສະໜອງບົດຮຽນ ຫຼື ເອກະສານ, ອຸປະກອນທີ່ກ່ຽວຂ້ອງກັບສາຂາວິຊາຮຽນຕາມຄວາມເໝາະສົມ, ຈັດຝຶກອົບຮົມ ແລະ ຍົກລະດັບທາງດ້ານວິຊາການ, ຈັດກອງປະຊຸມສົນທະນາ, ແລກປ່ຽນປະສົບການລະຫວ່າງນັກວິຊາການຂອງ ໂຮງແຮມ ລັດສະໝີ ພລາຊາ ກັບຄູ – ອາຈານ ແລະ ນັກສຶກສາ, ຮັບເອົານັກສຶກສາໃນສາຂາວິຊາທີ່ກ່ຽວຂ້ອງລົງພາກປະຕິບັດຕົວຈິງຢູ່ ໂຮງແຮມ ລັດສະໝີ ພລາຊາ, ຈັດຫາງານ ແລະ ປະກອບວຽກເຮັດງານທໍາໃຫ້ກັບນັກສຶກສາໃນໄລຍະການສຶກສາ ແລະ ພາຍຫຼັງສໍາເລັດການສຶກສາຕາມ ຄວາມເໝາະສົມ.

ພ້ອມກັນນັ້ນ, ທັງສອງຝ່າຍຍັງໄດ້ແຕ່ງຕັ້ງຄະນະຮັບຜິດຊອບຮ່ວມມື ເພື່ອວາງແຜນການດໍາເນີນງານຮ່ວມກັນ, ກໍານົດວິທີການບໍລິຫານຄຸ້ມຄອງ ແລະ ວຽກງານວິຊາການພ້ອມທັງການຕິດຕາມປະເມີນຜົນ; ຮ່ວມກັນປຶກສາຫາລື ແລະ ປັບປຸງແຜນການປະຕິບັດລະອຽດໃນແຕ່ລະໄລຍະຕາມຄວາມເໝາະສົມ; ຮ່ວມກັນປະເມີນກ່ຽວກັບການປະຕິບັດວຽກງານໂດຍຈັດກອງປະຊຸມຮ່ວມກັນ 3 ເດືອນຕໍ່ຄັ້ງ; ປະຕິບັດຕາມຫຼັກການຂອງການຮ່ວມມືທີ່ສອດຄ່ອງກັບນະໂຍບາຍຕາມກົດໝາຍ ແລະ ລະບຽບການທີ່ກ່ຽວຂ້ອງ ໂດຍມີຜົນບັງຄັບໃຊ້ນັບແຕ່ມື້ລົງລາຍເຊັນເປັນຕົ້ນໄປ.

 

ແຫຼ່ງຂ່າວ: ເສດຖະກິດ-ການຄ້າ

 

Leave a Reply

Your email address will not be published. Required fields are marked *