ພະແນກ ສກຂ ຊຽງຂວາງ ຈັດການສອບເສັງຄັດເລືອກນັກຮຽນເກັ່ງ ຂັ້ນ ມ 4 ແລະ ມ 7

ພະແນກສຶກສາທິການ ແລະ ກີລາແຂວງ ( ສກຂ ) ຊຽງຂວາງ ຈັດພິທີສອບເສັງຄັດເລືອກນັກຮຽນເກັ່ງຂັ້ນມັດທະຍົມສຶກສາ ມ 4 ແລະ ມ 7 ທົ່ວແຂວງ ໃນວັນທີ 27 ກຸມພາ 2019 ນີ້ ທີ່ຫ້ອງປະຊຸມສູນການສຶກສານອກໂຮງຮຽນແຂວງ ພາຍໃຕ້ການເປັນປະທານຂອງ ທ່ານ ບົວລີ ພັນນາວົງ ຫົວໜ້າພະແນກສຶກສາທິການ ແລະ ກີລາແຂວງ, ເຂົ້າຮ່ວມມີ ທ່ານ ໄຊປັນຍາ ໄຊຍະຈິດ ຫົວໜ້າຂະແໜງມັດທະຍົມສຶກສາ ພະແນກ ( ສກຂ ) ພ້ອມຄະນະ, ມີຄະນະຮັບຜິດຊອບການສອບເສັງ ພ້ອມດ້ວຍນ້ອງນັກສອບເສັງທັງໝົດ 50 ກວ່າຄົນ.

ທ່ານ ນາງ ວຽງເພັດ ເທບອຸດົມ ຮອງຂະແໜງມັດທະຍົມສຶກສາ ພະແນກ ( ສກຂ ) ກ່າວລາຍງານໃຫ້ຮູ້ວ່າ: ສົກຮຽນ 2018 – 2019 ນີ້ ທົ່ວແຂວງຊຽງ ຂວາງ ມີນັກຮຽນທີ່ເປັນຕົວແທນໃຫ້ແຕ່ລະເມືອງສະໝັກເຂົ້າມາສອບເສັງນັກຮຽນເກັ່ງຂັ້ນແຂວງ ທັງໝົດ 48 ນ້ອງ ຍິງ 16 ນ້ອງ. ໃນນັ້ນ, ຂັ້ນ ມ 4 ມີ 24 ນ້ອງ ຍິງ 10 ນ້ອງ; ຂັ້ນ ມ 7 ມີ 24 ນ້ອງ ຍິງ 6 ນ້ອງ; ສໍາລັບວິຊາທີ່ນຳມາສອບເສັງ ປະກອບມີ 4 ວິຊາ ຄື: ພາສາລາວ – ວັນນະຄະດີ, ຄະນິດສາດ, ຟີຊິກສາດ ແລະ ເຄມີສາດ, ແຕ່ລະວິຊາໃຊ້ເວລາສອບເສັງ 120 ນາທີ. ນອກຈາກການສອບເສັງພາກວິຊາສະເພາະແລ້ວ ບັນດານ້ອງໆຍັງຈະໄດ້ໄປທັດສະນະສຶກສານອກສະຖານທີ່ ເພື່ອສຶກສາຮຽນຮູ້ແຫຼ່ງທ່ອງທ່ຽວທີ່ສໍາຄັນຂອງແຂວງ, ຕອບ – ຖາມຄວາມຮູ້ຮອບຕົວ ແລະ ກິດຈະກໍາອື່ນໆຕື່ມອີກ ໂດຍຈະໃຊ້ເວລາທັງ 2 ວັນ ຈຶ່ງຈະສໍາເລັດ, ສ່ວນຜົນຂອງການສອບເສັງຄາດວ່າຈະໃຫ້ຮູ້ໃນຕອນບ່າຍຂອງວັນທີ  28 ກຸມພາ 2019.

ທ່ານ ນາງ ວຽງເພັດ ເທບອຸດົມ ບອກໃຫ້ຮູ້ອີກວ່າ: ຈຸດປະສົງຂອງການຈັດການສອບເສັງນັກຮຽນເກັ່ງຄັ້ງນີ້ ນອກຈາກເປັນການຄັດເລືອກເອົານັກຮຽນເກັ່ງແຕ່ລະຂັ້ນຮຽນ ແຕ່ລະວິຊາ ເປັນຕົວແທນໃຫ້ແຂວງຊຽງຂວາງ ເຂົ້າໄປສອບເສັງນັກຮຽນເກັ່ງລະດັບຊາດ ທີ່ຈະຈັດຂຶ້ນຢູ່ນະຄອນຫຼວງວຽງຈັນ ໃນທ້າຍເດືອນເມສາທີ່ຈະມາເຖິງນີ້, ຍັງເປັນການເປີດໂອກາດໃຫ້ນ້ອງນັກຮຽນໄດ້ສະແດງອອກທາງດ້ານຄວາມຮູ້ – ຄວາມສາມາດ, ມີສະຕິປັນຍາ, ມີໂອກາດແລກປ່ຽນຖອດຖອນບົດຮຽນເຊິ່ງກັນ ແລະ ກັນ. ພ້ອມນັ້ນ, ຍັງເປັນການສ້າງຂະບວນການແຂ່ງຂັນການສອນດີ – ຮຽນເກັ່ງຂອງຄູ – ອາຈານ ແລະ ນັກຮຽນ ເພື່ອປັບປຸງຄຸນນະພາບການຮຽນ – ການສອນໃຫ້ດີຂຶ້ນເທື່ອລະກ້າວ.

ໂອກາດນີ້, ທ່ານ ບົວລີ ພັນນາວົງ ໄດ້ເນັ້ນໜັກໃຫ້ຄະນະຮັບຜິດຊອບການສອບເສັງຈົ່ງມີຄວາມຮັບຜິດຊອບສູງຕໍ່ໜ້າທີ່, ມີຄວາມໂປ່ງໃສບໍລິສຸດຍຸຕິທໍາ ເຮັດໜ້າທີ່ເປັນກາງ, ສ່ວນນັກສອບເສັງກໍໃຫ້ມີຄວາມທຸ່ນທ່ຽງ ຕັ້ງໃຈເຮັດບົດດ້ວຍຕົນເອງ, ປະຕິບັດໂມງເວລາເຂັ້ມງວດ ເພື່ອໃຫ້ການສອບເສັງດໍາເນີນໄປບັນລຸຕາມຈຸດປະສົງເປົ້າໝາຍ.

 

ແຫຼ່ງຂ່າວ: ເສດຖະກິດ-ການຄ້າ

 

Leave a Reply

Your email address will not be published. Required fields are marked *