ສ້ອມແປງໂຮງຮຽນປະຖົມທ່ານາສາ ລວມມູນຄ່າເກືອບ 200 ລ້ານກີບ

ໃນລະຫວ່າງວັນທີ 20 – 26 ກຸມພາ 2019 ທີ່ໂຮງຮຽນປະຖົມ ບ້ານທ່ານາສາ ເມືອງສັງທອງ ນະຄອນຫຼວງວຽງຈັນ ໂດຍການເຂົ້າຮ່ວມຂອງ ທ່ານ ນາງ ໄອ່ຄຳ ສໍອິນໄຊ ຮອງຫົວໜ້າກອງໂຄສະນາ ແລະ ຂົນຂວາຍການກຸສົນອົງການກາແດງລາວ, ທ່ານ ບົວຄຳ ສີສົງຄາມ ເຈົ້າເມືອງໆສັງທອງ, ທ່ານ ຊໍ ຈອງແຮ ຫົວໜ້າອົງການກາແດງ ແຂວງອຸນຊານ     ສ.ເກົາຫຼີ ພ້ອມດ້ວຍຄະນະ ແລະ ອາສາສະໝັກຈາກທັງສອງຝ່າຍ.

ໂດຍແມ່ນການຮ່ວມມືລະຫວ່າງອາສາສະໝັກອົງການກາແດງລາວ ແລະ ອາສາສະໝັກກາແດງ ສ.ເກົາຫຼີ ທີ່ເດີນທາງມາຢ້ຽມຢາມ ພ້ອມທັງໃຫ້ການຊ່ວຍເຫຼືອສ້ອມແປງໂຮງຮຽນໃນຄັ້ງນີ້ຢ່າງເປັນຂະບວນຟົດຟື້ນ ແລະ ຍັງມີອໍານາດການປົກຄອງຂັ້ນບ້ານ, ຜູ້ຕາງໜ້າຈາກນັກສຶກສາ ແລະ ກີລາເມືອງ, ອຳນາດການປົກຄອງ, ຄູ – ອາຈານ, ນ້ອງນັກຮຽນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ວຽກງານຕົ້ນຕໍແມ່ນສ້ອມແປງອາຄານຮຽນ 2 ແຫ່ງ ຄື: ປະຖົມ ແລະ ອະນຸບານ ບ້ານທ່ານາສາ ໂດຍທາສີອາຄານຮຽນທັງ 2 ຫຼັງ, ປ່ຽນສັງກະສີ, ຕິດຕັ້ງເພດານ, ປັບປຸງຝາອາຄານຊັ້ນອະນຸບານ ແລະ ສ້ອມແປງບໍ່ນໍ້າບາດານຂອງໂຮງຮຽນອະນຸບານ ບ້ານຫ້ວຍຫຼ້າ ເມືອງສັງທອງ ນະຄອນຫຼວງວຽງຈັນ ເນື່ອງຈາກວ່າອາຄານດັ່ງກ່າວມີຄວາມເກົ່າແກ່, ຊຸດໂຊມ ແລະ ເປ່ເພ ທັງສ້າງຄວາມຫຍຸ້ງຍາກໃຫ້ແກ່ການຮຽນ – ການສອນຂອງ ຄູ – ອາຈານ ແລະ ນ້ອງນັກຮຽນ.

ພ້ອມດຽວກັນນີ້, ກໍຍັງໄດ້ມອບອຸປະກອນການຮຽນ – ການສຶກສາໃຫ້ຄວາມຮູ້ດ້ານສຸຂະນາໄມ, ຮຽນຮູ້ວັດທະນະທຳລາວ ເຊັ່ນ: ການໃສ່ບາດ, ການນຸ່ງຖື, ການປຸງແຕ່ງອາຫານ, ບາສີສູ່ຂວັນ ແລະ ສະແດງສິລະປະຮ່ວມກັນ. ການເຄື່ອນໄຫວກິດຈະກຳລະຫວ່າງຊາວໜຸ່ມອາສາສະໝັກກາແດງລາວ ແລະ ກາແດງ   ສ.ເກົາຫຼີ ໄດ້ເລີ່ມແຕ່ປີ 2012 ເປັນຕົ້ນມາ ແລະ ປີນີ້ເປັນປີທີ 9. ສຳລັບງົບປະມານໃນການເຄື່ອນໄຫວກິດຈະກຳ ແລະ ໃຫ້ການຊ່ວຍເຫຼືອໃນຄັ້ງນີ້ແມ່ນການສະໜັບສະໜູນຈາກກາແດງ ແຂວງອຸນຊານ ສ.ເກົາຫຼີ ລວມມູນຄ່າທັງໝົດ 197 ລ້ານກວ່າກີບ ແລະ ຍັງມີເຄື່ອງບໍລິຈາກໃຫ້ນັກຮຽນລວມມູນຄ່າ 6 ລ້ານກວ່າກີບ.

ແຫຼ່ງຂ່າວ: ເສດຖະກິດ-ການຄ້າ

 

 

Leave a Reply

Your email address will not be published. Required fields are marked *