ປີ 2018 ມີນັກທ່ອງທ່ຽວເຂົ້າທ່ຽວຊົມສວນຊຽງຄວນ ເພີ່ມຂຶ້ນ 2-3 ເທົ່າຕົວ

ພາຍ­ຫຼັງ​ທີ່​ລັດ​ໄດ້​ອະ­ນຸ­ຍາດ​ໃຫ້​ພາກ​ເອ­ກະ​ຊົນ ເຂົ້າ​ມາ​ມາ​ມີ​ສ່ວນ​ຮ່ວມ​ໃນ​ການ​ສຳ​ປະ­ທານ​ພັດ­ທະ­ນາ ໄດ້​ເຮັດ​ໃຫ້​ສວນ​ວັດ­ທະ­ນະ­ທຳ​ຊຽງ​ຄວນ ກາຍ­ເປັນ​ສະ­ຖານ­ທີ່​ທ່ອງ​ທ່ຽວ​ແຫ່ງ​ໜຶ່ງ​ຢູ່​ນະ­ຄອນ­ຫຼວງ​ວຽງ​ຈັນ ທີ່​ໜ້າ​ທ່ຽວ​ຊົມ ສາ­ມາດ​ດຶງ​ດູດ​ນັກ​ທ່ອງ​ທ່ຽວ​ທັງ​ພາຍ​ໃນ ແລະ ຕ່າງ­ປະ­ເທດ ເຂົ້າ​ທ່ຽວ​ຊົມ​ສະ­ເລ່ຍ​ເກືອບ​ພັນ​ຄົນ​ຕໍ່​ວັນ ສາ­ມາດ​ສ້າງ​ລາຍ​ຮັບ​ໃຫ້​ຜູ້​ສຳ​ປະ­ທານ ແລະ ສ້າງ​ວຽກ​ເຮັດ​ງານ​ທຳ​ໃຫ້​ປະ­ຊາ­ຊົນ​ເຂດ​ໃກ້​ຄຽງ​ດີ​ສົມ­ຄວນ.

ທ່ານ​ນາງ ສ້ອຍ​ສຸ­ດາ ອິນ​ເມືອງ​ໄຊ ປະ­ທານ​ບໍ­ລິ­ສັດ ທ່ອງ​ທ່ຽວ ແລະ ການ​ລົງ­ທຶນ​ສາ­ກົນ​ລາວ ຈຳ­ກັດ ຜູ້​ສຳ​ປະ­ທານ​ສວນ​ວັດ­ທະ­ນະ­ທຳ​ຊຽງ​ຄວນ ໄດ້​ໃຫ້​ສຳ­ພາດ​ໃນ​ວັນ​ທີ 7 ກຸມ­ພາ 2019 ວ່າ: ສະ­ຖານ­ທີ່​ທ່ອງ​ທ່ຽວ​ສວນ​ຊຽງ​ຄວນ​ມີ​ທີ່​ຕັ້ງ​ຢູ່​ບ້ານ​ຊຽງ​ຄວນ ເມືອງ​ຫາດ​ຊາຍ​ຟອງ ຫ່າງ​ຈາກ​ຕົວ​ເມືອງ​ນະ­ຄອນ­ຫຼວງ​ວຽງ​ຈັນ ປະ­ມານ 25 ກິ­ໂລ­ແມັດ ນັບ​ແຕ່​ບໍ­ລິ­ສັດ​ໄດ້​ສຳ​ປະ­ທານ​ສວນ​ແຫ່ງ​ນີ້​ປີ 2017 ເປັນ­ຕົ້ນ​ມາ ບໍ­ລິ­ສັດ​ໄດ້​ລົງ­ທຶນ​ຫຼາຍ​ຕື້​ກີບ ພັດ­ທະ­ນາ​ທາງ​ດ້ານ​ພື້ນ­ຖານ​ໂຄງ​ລ່າງ ເພື່ອ​ສ້າງ​ສິ່ງ​ອຳ­ນວຍ​ຄວາມ​ສະ­ດວກ​ຕ່າງໆ ທີ່​ຈະ​ດຶງ​ດູດ​ນັກ​ທອ່ງ​ທ່ຽວ ເຊິ່ງ​ການ​ພັດ­ທະ­ນາ​ມາ​ຮອດ​ປັດ­ຈຸ­ບັນ​ໄດ້​ສຳ­ເລັດ 100% ຫຼາຍ​ໜ້າ​ວຽກ ເປັນ­ຕົ້ນ ຫ້ອງ​ນ້ຳ 18 ຫ້ອງ ທາງ​ຍ່າງ​ພາຍ​ໃນ​ສວນ​ເຂດ​ມໍ­ລະ­ດົກ ກຳ­ແພງ​ຮົ້ວ​ອ້ອມ​ພ້ອມ​ຕິດ​ລວ­ດລາຍ ແລະ ພະ​ພຸດ​ທະ​ຮູບ 47 ອົງ ສະ­ຖານ­ທີ່​ຈອດ​ລົດ ເວ­ທີ​ການ­ສະ­ແດງ​ສິ­ລະ​ປະ​ວັນ​ຄະ­ນະ​ດີ​ການ​ຕົບ­ແຕ່ງ​ສວນ​ດອກ​ໄມ້ ວາງ​ທໍ່​ລະ­ບາຍ​ນ້ຳ​ລົງ​ສູ່​ນ້ຳ­ຂອງ ຮັບ­ປະ­ກັນ​ບໍ່​ໃຫ້​ນ້ຳ​ຖ້ວມ​ໃນ​ລະ­ດູ­ຝົນ ວຽກ​ງານ​ໂຄ­ສະ­ນາ ແປ​ພາ­ສາ 6 ພາ­ສາ ຄື: ພາ­ສາ​ລາວ ອັງ­ກິດ ຈີນ ເກົາ­ຫຼີ ຝຣັ່ງ ໄທ ເພື່ອ​ອຳ­ນວຍ​ຄວາມ​ສະ­ດວກ​ໃຫ້​ແກ່​ນັກ​ທ່ອງ​ທ່ຽວ ທີ່​ຕ້ອງ­ການ​ຮູ້​ປາງ​ກໍ​ຄື​ປະ­ຫວັດ​ຂອງ​ພະ​ພຸດ​ທະ​ຮູບ​ແຕ່​ລະ​ອົງ ທີ່​ສ້າງ​ຢູ່​ສວນ​ແຫ່ງ​ນີ້ ສາ­ມາດ​ເລືອກ​ໄດ້​ຕາມ​ຕົວ​ເລກ​ທີ່​ຕິດ​ຕັ້ງ​ຢູ່​ຕາມ​ປ້າຍ​ຕ່າງໆ ໂດຍ​ລວມ​ແລ້ວ​ການ​ລົງ­ທຶນ​ພັດ­ທະ­ນາ​ມາ​ຮອດ​ປັດ­ຈຸ­ບັນ ເກືອບ 19 ຕື້​ກີບ ແລະ ການ​ພັດ­ທະ­ນາ​ໄດ້​ແບ່ງ​ອອກ​ເປັນ​ສອງ​ສ່ວນ ຄື: ເຂດ​ມໍ­ລະ­ດົກ ແລະ ເຂດ​ເສດ­ຖະ­ກິດ ຈະ​ມີ​ຮ້ານ​ອາ­ຫານ ຮ້ານ​ຂາຍ­ເຄື່ອງ​ທີ່​ລະ­ນຶກ ບ່ອນ​ຫຼິ້ນ​ເດັກ­ນ້ອຍ ຕູບ ສວນ​ດອກ​ໄມ້ ແລະ ອື່ນໆ ສ່ວນ​ໜ້າ​ວຽກ​ທີ່​ຍັງ​ບໍ່​ທັນ​ສຳ­ເລັດ ກຳ­ລັງ​ເລັ່ງ​ແມ່ນ​ປະ­ຕູ­ໂຂງ​ທີ່​ເປັນ​ວຽກ​ລະ­ອຽດ​ອ່ອນ ເຮັດ​ຍາກ​ທີ່​ຕ້ອງ​ໃຊ້​ຊ່າງ​ທີ່​ຊຳ­ນິ​ຊຳ­ນານ​ເພື່ອ​ຄວາມ​ງົດ​ງາມ ແລະ ອ່ອນ​ສ້ອຍ​ກ່ຽວ​ກັບ​ລວ­ດລາຍ​ລາວ​ຕ່າງໆ ຄາດ​ວ່າ​ຈະ​ສຳ­ເລັດ​ກ່ອນ​ບຸນ­ປີ­ໃໝ່​ລາວ​ທີ່​ຈະ​ມາ​ເຖິງ ສຳ­ລັບ​ອະ­ນາ­ຄົດ​ຈະ​ສືບ­ຕໍ່​ພັດ­ທະ­ນາ​ໄປ​ເລື້ອຍໆ ເປັນ­ຕົ້ນ ພັດ­ທະ­ນາ​ໂຊນ​ແຄມ​ຂອງ​ເຮັດ​ສວນ​ດອກ​ໄມ້ ຮ້ານ​ອາ­ຫານ ສ້າງ​ຕາ­ຝັ່ງ​ກັນ​ເຈື່ອນ​ປ້ອງ​ກັນ​ນ້ຳ​ຖ້ວມ ແລະ ອື່ນໆ.

ປັດ­ຈຸ­ບັນ ສວນ​ຊຽງ​ຄວນ​ມີ​ສິ່ງ​ອຳ­ນວຍ​ຄວາມ​ສະ­ດວກ​ຫຼາຍ​ຢ່າງ ເປັນ­ຕົ້ນ​ແມ່ນ​ເສັ້ນ­ທາງ​ມາ​ແຕ່​ຕົວ​ເມືອງ​ນະ­ຄອນ­ຫຼວງ​ວຽງ​ຈັນ ເປັນ​ເສັ້ນ­ທາງ​ປູ­ຢາງ ເວ­ລາ​ມາ​ທ່ຽວ​ນອກ­ຈາກ​ເຫັນ​ມໍ­ລະ­ດົກ​ແລ້ວ ຍັງ​ໄດ້​ທ່ຽວ​ຊົມ​ສວນ​ດອກ​ໄມ້ ສຳ­ຜັດ​ທຳ​ມະ​ຊາດ​ແຄມ​ຂອງ ແລະ ອື່ນໆ ໃນ​ໂອ­ກາດ​ເປີດ​ປີ​ທ່ອງ​ທ່ຽວ​ລາວ 2018 ສະ­ຖານ­ທີ່​ທ່ອງ​ທ່ຽວ​ສວນ​ຊຽງ​ຄວນ ກໍ​ເປັນ​ສະ­ຖານ­ທີ່​ທ່ອງ​ທ່ຽວ​ແຫ່ງ​ໜຶ່ງ ທີ່​ສາ­ມາດ​ດຶງ​ດູດ​ນັກ​ທ່ອງ​ທ່ຽວ​ທັງ​ພາຍ​ໃນ ແລະ ຕ່າງ­ປະ­ເທດ​ເຂົ້າ​ມາ​ທ່ຽວ​ຊົມ​ສະ­ເລ່ຍ 800 ຄົນ​ຕໍ່​ວັນ ອັນ​ດັບ​ໜຶ່ງ​ແມ່ນ​ນັກ​ທ່ອງ​ທ່ຽວ​ເກົາ­ຫຼີ ຖັດ​ລົງ​ມາ​ແມ່ນ​ຈີນ ຫວຽດ­ນາມ ລາວ ໄທ ແລະ ຝຣັ່ງ ຖ້າ​ທຽບ­ໃສ່​ປີ­ຜ່ານ­ມາ​ເພີ່ມ​ຂຶ້ນ 2-3 ເທົ່າ​ຕົວ ເຊິ່ງ​ຜົນ­ສຳ­ເລັດ​ດັ່ງ­ກ່າວ ກໍ​ຍ້ອນ​ການ​ສະ­ໜັບ­ສະ­ໜູນ​ຊ່ວຍ­ເຫຼືອ​ຕ່າງໆ​ຂອງ​ອຳ­ນາດ​ການ​ປົກ­ຄອງ​ນະ­ຄອນ­ຫຼວງ​ວຽງ​ຈັນ ເປັນ­ຕົ້ນ ກໍ​ແມ່ນ​ທ່ານ​ເຈົ້າ​ຄອງ ອຳ­ນາດ​ການ​ປົກ­ຄອງ​ເມືອງ​ຫາດ​ຊາຍ​ຟອງ ບ້ານ​ອ້ອມ​ຂ້າງ ແລະ ຂະ­ແໜງ­ການ​ກ່ຽວ­ຂ້ອງ​ຂອງ​ສູນ​ກາງ ແລະ ທ້ອງ­ຖິ່ນ.

ໃນ​ໂອ­ກາດ​ເປີດ​ປີ​ທ່ອງ​ທ່ຽວ​ລາວ-ຈີນ 2019 ສວນ​ຊຽງ​ຄວນ ຄາດ​ຄະ­ເນ​ໄວ້​ຈະ​ມີ​ນັກ​ທ່ອງ​ທ່ຽວ​ທັງ​ພາຍ​ໃນ ແລະ ຕ່າງ­ປະ­ເທດ​ເຂົ້າ​ມາ​ທ່ຽວ​ຊົມ​ສວນ​ແຫ່ງ​ນີ້ ປະ­ມານ 3 ແສນ​ຄົນ ໂດຍ​ຕັ້ງ​ຄວາມ​ຫວັງ​ໃສ່​ແມ່ນ​ນັກ​ທ່ອງ​ທ່ຽວ​ຈີນ ແລະ ເພື່ອ​ຮອງ​ຮັບ​ນັກ​ທ່ອງ​ທ່ຽວ​ທີ່​ຈະ​ມາ​ທ່ຽວ​ນັ້ນ ສວນ​ຊຽງ​ຄວນ​ກໍ​ມີ​ຄວາມ​ພ້ອມ​ດ້ານ​ການ​ບໍ­ລິ­ການ​ຕ່າງໆ ເປັນ­ຕົ້ນ ໄກ​ນຳ​ທ່ຽວ ການ​ໂຄ­ສະ­ນາ​ປະ­ຊາ­ສຳ­ພັນ​ຜ່ານ​ຫຼາຍ​ຊ່ອງ​ທາງ ແລະ ອື່ນໆ ໃນ​ໂອ­ກາດ​ນີ້​ທ່ານ​ນາງ ສ້ອຍ​ສຸ­ດາ ອິນ​ເມືອງ​ໄຊ ຍັງ​ໄດ້​ເຊີນ ຊວນ​ນັກ​ທ່ອງ​ທ່ຽວ​ທັງ​ພາຍ​ໃນ ແລະ ປະ­ເທດ ນັກ­ຮຽນ ນັກ​ສຶກ​ສາ ກໍ່​ຄື​ຄົນ​ຮຸ່ນ​ໃໝ່ ຈົ່ງ​ພ້ອມ​ກັນ​ມາ​ທ່ຽວ​ຊົມ​ສວນ​ຊຽງ​ຄວນ ເພື່ອ​ສຶກ​ສາ​ຂໍ້​ມູນ​ຮຽນ​ຮູ້​ວັດ­ທະ­ນະ­ທຳ ກໍ່​ຄື​ປະ­ຫວັດ­ສາດ​ຂອງ​ລາວ​ເຮົາ ມາ​ຊົມ​ວິວ​ບັນ­ຍາ­ກາດ​ແບບ​ທຳ​ມະ​ຊາດ​ແຄມ​ນ້ຳ­ຂອງ ມາ​ຊິມ​ອາ­ຫານ​ລາວ ມາ​ຮ່ວມ​ຈັດ​ກິດ­ຈະ­ກຳ​ຕ່າງໆ ໂດຍ​ສວນ​ແຫ່ງ​ນີ້ ໄດ້​ເປີດ​ບໍ­ລິ­ການ​ທຸກ​ວັນ​ນັບ​ແຕ່​ເວ­ລາ 8-17:30 ໂມງ ໃນ​ລາ­ຄາ​ຄ່າ​ບໍ­ລິ­ການ​ເຂົ້າ​ໄປ​ຊົມ​ຄົນ​ລາວ 10.000 ກີບ ແລະ ຕ່າງ­ປະ­ເທດ 15.000 ກີບ.

Leave a Reply

Your email address will not be published. Required fields are marked *

Facebook