ມະຫັດສະຈັນ ຖ້ຳຜາກ້າ ແຫຼ່ງທ່ອງທ່ຽວ ຂອງແຂວງວຽງຈັນ

ຖ້ຳຜາກ້າ ​ເຊິ່ງຕັ້ງ​ຢູ່​ທີ່ບ້ານນ້ຳເຟືອງ, ເມືອງແມດ, ແຂວງວຽງຈັນ ​ເປັນ​ຖ້ຳ​ອີກ​ແຫ່ງ​ໜຶ່ງ​ທີ່​ມີ​ຄວາມ​ງົດ​ງາມ​ໜ້າ​ອັດສະຈັນ ​ໂດຍຖ້ຳແຫ່ງນີ້ອາດຈະມີໜ້ອຍຄົນທີ່ຈະຮູ້ຈັກເພາະວ່າມັນເປັນຖ້ຳທີ່ຕັ້ງຢູ່ໃນເຂດປ່າດົງທີ່ຕຶບໜາຫ່າງຈາກເທດສະບານຂອງເມືອງປະມານ 30 ກວ່າ​ກິໂລແມັດ. ການ​ທີ່​ຈະ​ເດີນ ທາງ​ເຂົ້າ​ໄປ​ໃນ​ສະຖານ​ທີ່​ແຫ່ງ​ນີ້ ​ແມ່ນ​ຕ້ອງ​ໄດ້ອາ​ໄສການເດີນເຮືອເປັນຫຼັກ ​ເຊິ່ງໃຊ້ເວລາປະມານເກືອບ 2 ຊົ່ວໂມງຈຶ່ງຮອດ.

ຕະຫຼອດ​ໄລຍະ​ຂອງ​ການ​ເດີນທາງ​ໄປ​ຫາ​ຖ້ຳ​ຜາ​ກ້າ​ໂດຍ​ການ​ຂີ່​ເຮືອນັ້ນ ​ທ່ານ​ຈະ​ໄດ້​ເຫັນ​ທຳ​ມະ​ຊາດຕາມ 2 ຟາກ​ຝັ່ງ​ສາຍ​ນ້ຳ​ເຟືອງອັນ​ສວຍ​ສົດ​ງົດ​ງາມ​ທີ່​ຍັງ​ຄົງ​ຄວາມ​ອຸດົມສົມບູນ​ດ້ວຍ​ປ່າ​ໄມ້​ໃບ​ຂຽວ ທີ່​ເຫັນ​ແລ້ວຊື່ນ​ຕາຊື່ນ​ໃຈ. ຈາກ​ການ​ບອກ​ເລົ່າ​ຂອງ​ຜູ້​ທີ່​ນຳ​ທາງ​ໃຫ້​ຮູ້​ວ່າ: ຖ້ຳຜາກ້າ ເປັນຜາຫີນອອ່ນຄ້າຍໆຫີນປູນປະ ກອບມີ 3 ໜ່ວຍພູຕິດຕໍ່ກັນ ​ໂດຍ​ແບ່ງ​ອອກ​ເປັນ 3 ຖ້ຳ​ຫຼັກໆ​ເຊັ່ນ: ຖ້ຳ​ຜາ​ກ້າ ເປັນ​ຖ້ຳ​ຊັ້ນ​ທຳ​ອິດ ເລີ່ມຈາກ​ປາກ​ຖ້ຳ​​ເຂົ້າໄປ​ຫາໜ່ວຍ​ພູໜ່ວຍ​ທີ 1, ສຳລັບໜ່ວຍ​ພູ​ໜ່ວຍ​ທີ 2 ຈະ​ມີ​ຖ້ຳ​ທີ່​ສູງ​ຂຶ້ນ​ໄປ​ອີກ​ເຊິ່ງມີ​ຊື່ວ່າ: ຖ້ຳ​ກິ​ງ ​ແລະ ຖ້ຳ​ຊັ້ນ​ທີ 3 ​ເປັນ​ຊັ້ນ​ສຸດ​ທ້າຍ​ເຊິ່ງ​ເປັນ​ຈຸດ​​ສູງ​ທີ່​ສຸດທີ່​ໃຊ້​ເປັນ​ຈຸດ​ຊົມ​ວິວມີ​ຊື່ວ່າ: ຖ້ຳ​ພະ​ລື​ສີ ມີສາຍນ້ຳເຟືອງໄຫຼລອດກ້ອງຖ້ຳ​ເຊິ່ງມີຄວາມຍາວປະມານ 5 ກວ່າກິ​ໂລແມັດ. ພາຍ​ໃນ​ຖ້ຳ​ປະກອບ​​ໄປ​ດ້ວຍ​ຄວາມ​ງົດ​ງາມ​ຂອງ​ຫີນຜາ, ນົມ​ຜາ​, ຫີນ​ຍ້ອຍ​ທີ່​ເກີດ​ຂຶ້ນ​ຈາກ​ທຳ​ມະ​ຊາດ​​ເຊິ່ງໄດ້​ສະ​ສົມ​ມາ​ຫຼາຍ​ປີ ກາຍ​ເປັນ​ປະຕິ​ມາ​ກຳ​ອັນ​ໜ້າ​ອັດສະຈັນທີ່​ຫາ​ຊົມ​ໄດ້​ຍາກ ​ແລະ ກໍ​ເປັນ​ສິ່ງ​ທີ່​ກຸ້ມ​ຄ່າ​ຫຼາຍ​ເມື່ອ​ທ່ານ​ໄດ້​ມາ​ຮອດ​ມາ​ເຖິງ​ຈຸດ​ນີ້. ​ແຕ່​ເນື່ອງ​ຈາກ​ວ່າ​ຖ້ຳ​ດັ່ງກ່າວ​ເປັນ​ສະຖານ​ທີ່​ທ່ອງ​ທ່ຽວ ​ໃໝ່​ການ​ພັດທະນາ​ໃນ​ດ້ານ​ຕ່າງ​ໆ​ຍັງ​ບໍ່​ທັນມີ​ຄວາມ​ສະດວກ​ສະບາຍ​ເທື່ອ ​ເຊິ່ງ​ໃນ​ອີກ​ບໍ່​ດົນ​ນີ້​ເຊື່ອ​ວ່າ​ສະຖານ​ທີ່​ດັ່ງກ່າວ​ຈະ​ໄດ້​ຮັບ​ການ​ພັດທະນາ​ຂຶ້ນ​ຈົນ​ເປັນ​ທີ່​ສົນ​ໃຈ​ຈາກ​ນັກ​ທ່ອງ​ທ່ຽວ​ທັງ​ພາຍ​ໃນ ​ແລະ ຕ່າງປະ​ເທດ​ຢ່າງ​ແນ່ນອນ.

ສະຖານ​ທີ່ຖ້ຳ​ຜາ​ກ້າ​ແຫ່ງ​ນີ້​ແມ່ນ​ເໝາະຢ່າງ​ຍິ່ງ​ໃນ​ການ​ທີ່​ຈະ​ສ້າງ​ໃຫ້ເປັນ​ແຫຼ່ງທ່ອງ​ທ່ຽວ​​ແບບອະນຸລັກ ໂດຍເອົາປະຊາຊົນໃນຂົງເຂດນັ້ນມີສ່ວນຮ່ວມເພື່ອພັດທະນາ ​ແລະ ສ້າງ​ລາຍ​ຮັບ​ໃຫ້​ກັບ ພວກ​ເຂົາ​ເຈົ້າ, ຖ້າຫາກ​ວ່າ​ມີ​ການ​ພັດທະນາ​ທີ່​ດີ​ເຊື່ອ​ແນ່​ວ່າ​ຖ້ຳ​ແຫ່ງ​ນີ້ຈະມີ​ຄວາມ​ສົນ​ໃຈ​ຫຼາຍບໍ່ນ້ອຍໜ້າຖ້ຳກອງລໍທີ່ແຂວງຄຳມ່ວນ.

ສຳລັບທ່ານທີ່ຕ້ອງການເດີນທາງໄປທີ່ ຖ້ຳຜາ​ກ້າ ຖ້າຫາກທ່ານໄປຮອດບ້ານ ນ້ຳເຟືອງແລ້ວຕ້ອງໄດ້ໄປພົວພັນກັບການຈັດຕັ້ງບ້ານກ່ອນ ແລ້ວເພິ່ນຈະເປັນຜູ້ຈັດເຮືອ ແລະ ຜູ້ນຳທາງໃຫ້.

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *