ອີໂວ້ ເປີດສູນຈໍາໜ່າຍເຄື່ອງກີລາ

ອີໂວ້ ສະຕໍ ( EVO STORE ) ສູນຈໍາໜ່າຍເຄື່ອງກີລາ, ອຸປະກອນຈາກຕ່າງປະເທດ ແລະ ຍັງເປັນຜູ້ຜະລິດຈໍາໜ່າຍຜະລິດຕະພັນເຄື່ອງກີລາລາວຍີ່ຫໍ້ EVO ເປີດສາຂາທີ 5 ເພື່ອເປັນສ່ວນໜຶ່ງໃນການອໍານວຍຄວາມສະດວກໃຫ້ສັງຄົມຄຽງຄູ່ກັບການພັດທະນາວົງການກີລາລາວ. ເມື່ອວັນທີ 8 ກຸມພາ 2019 ທີ່ຕຶກຫຼັງໃໝ່ຂອງ ອີໂວ້ ສະຕໍ ບ້ານຄໍາຮຸ່ງ ເມືອງໄຊທານີ ນະຄອນຫຼວງວຽງຈັນ ໄດ້ມີພິທີເປີດສູນດັ່ງກ່າວຂຶ້ນ ໃຫ້ກຽດເຂົ້າຮ່ວມໂດຍ ທ່ານ ບົວລານ ສິລິປັນຍາ ຮອງລັດຖະມົນຕີກະຊວງສຶກສາທິການ ແລະ ກີລາ, ທ່ານ ກະເສມ ອິນທະລາ ຮອງປະທານຄະນະກຳມະການໂອແລັມປິກແຫ່ງຊາດລາວ ແລະ ທ່ານ ສີສະຫວັນ ມ່າຢັງເຊິນ ປະທານ ອີໂວ້ ສະຕໍ ທັງເປັນປະທານສະໂມສອນ ອີໂວ້ ຢູໄນເຕັດ ພ້ອມດ້ວຍແຂກທີ່ຖືກເຊີນ ແລະ ນັກກີລາເຂົ້າຮ່ວມຢ່າງພ້ອມພຽງ. ໃນພິທີດັ່ງກ່າວ ປະທານ ອີໂວ້ ສະຕໍ ໄດ້ກ່າວຂອບໃຈທຸກພາກສ່ວນທີ່ໃຫ້ການຊຸກຍູ້ ແລະ ເອື້ອອໍານວຍຄວາມສະດວກ ຈົນເຮັດໃຫ້ ອີໂວ້ ກ້າວມາເຖິງຈຸດນີ້ ໂດຍມີວິໄສທັດໃນອະນາຄົດ 5 – 10 ປີ ອີໂວ້ ຈະເປັນຜູ້ນໍາການຕະຫຼາດດ້ານເຄື່ອງກີລາ ແລະ ຍີ່ຫໍ້ເຄື່ອງກີລາໃນ ສປປ ລາວ ປີ 2022, ອາຊຽນ ໃນປີ 2030 ແລະ ເປັນ Global brand ໃນປີ 2035 ພ້ອມສັນຍາວ່າຈະເປັນອີກແຮງສໍາຄັນໃນການພັດທະນາວົງການກີລາລາວ ເຊິ່ງເລີ່ມດ້ວຍການເຊັນສັນຍາສະໜັບສະໜູນຫຼາຍໆພາກສ່ວນ ຄື: ສະຫະພັນແລ່ນ – ລານ, ສະຫະພັນປິ່ງປ່ອງແຫ່ງຊາດລາວ, ສະຫະພັນກີລາ Lao E – Sport, ທີມບານເຕະ All Astar, ສະໂມສອນ ອີໂວ້ ຢູໄນເຕັດ, ທີມແລ່ນມາຣາທອນ Rock Runner, ທີມແລ່ນມາຣາທອນ LK Coaching ແລະ Influencer. ຂະນະດຽວກັນ, ທ່ານ ບູ້ສະໄໝ ບຸດທະວົງ ຜູ້ບໍລິການ ອີໂວ້ ສະຕໍ ກ່າວວ່າ: ອີໂວ້ ສະຕໍ ເປັນສູນຈໍາໜ່າຍເຄື່ອງກີລາ, ອຸປະກອນຈາກຕ່າງປະເທດ ແລະ ຍັງເປັນຜູ້ຜະລິດຈໍາໜ່າຍຍີ່ຫໍ້ເຄື່ອງກີລາລາວ ເຊິ່ງ EVO ຖືກສ້າງຕັ້ງຂຶ້ນໃນປີ 2015 ດ້ວຍກຸ່ມຄົນທີ່ຮັກມັກໃນການຫຼິ້ນກີລາ, EVO ຫຍໍ້ມາຈາກ EVOLUTION ທີ່ແປວ່າ: ວິວັດທະນາການບົ່ງບອກເຖິງພາຍໃນວັດທະນະທໍາອົງກອນ ທີ່ຕ້ອງການພັດທະນາຢ່າງບໍ່ຢຸດນິ້ງ ໂດຍພວກເຮົາຕັ້ງເປົ້າໃນທຸລະກິດເສື້ອຜ້າກີລາ ດ້ວຍການຜະລິດ ແລະ ນໍາເຂົ້າ, ຄັດເລືອກຜະລິດຕະພັນທີ່ສ້າງສັນ, ອອກແບບທີ່ທັນສະໄໝຕາມຍຸກຕາມກະແສທີ່ມີຄຸນນະພາບສູງກວ່າຕະຫຼາດທົ່ວໄປ, ລາຄາທີ່ຈັບຕ້ອງໄດ້ ພ້ອມບໍລິການທີ່ຕອບໂຈດໃຫ້ລູກຄ້າຄົບວົງຈອນ.

 

 

ຂໍ້ມູນມາຈາກ : ເສດຖະກິດການຄ້າ

Leave a Reply

Your email address will not be published. Required fields are marked *

Facebook