ລາວໄດ້ຮັບທຶນຊ່ວຍເຫຼືອປັບປຸງສະພາບການດຳເນີນທຸລະກິດ – ການຄ້າ

ລັດຖະບານອົດສະຕຣາລີ ແລະ ທະນາຄານໂລກ ໄດ້ໃຫ້ທຶນຊ່ວຍເຫຼືອລ້າ 4,5 ລ້ານໂດລາອົດສະຕຣາລີ ໃຫ້ແກ່ໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າຂອງ ສປປ ລາວ.

ພິທີເຊັນສັນຍາຊ່ວຍເຫຼືອລ້າລະ ຫວ່າງລັດຖະບານອົດສະຕຣາລີ ແລະ ທະນາຄານໂລກ ໃຫ້ແກ່ໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າຂອງ ສປປ ລາວ ໄດ້ຈັດຂຶ້ນໃນຕອນເຊົ້າຂອງວັນທີ 8 ກຸມພາ 2019 ທີ່ກະຊວງອຸດສາຫະກຳ ແລະ ການຄ້າ     ( ອຄ ) ຕາງໜ້າເຂົ້າຮ່ວມເປັນສັກຂີພິຍານໃນພິທີເຊັນສັນຍາການຊ່ວຍເຫຼືອຝ່າຍ ສປປ ລາວ ໂດຍ ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງ ອຄ, ຝ່າຍອົດສະຕຣາລີ ໂດຍ ທ່ານ ຈ໋ອງ – ເບີນາລ໌ ຄາຣາສ໌ໂກ ເອກອັກຄະລາຊະທູດອົດສະຕຣາລີ ປະຈຳ ສປປ ລາວ ແລະ ທ່ານ ນິໂກລາ ພົນທາຣາ ຜູ້ຈັດການທະນາຄານໂລກ ປະຈຳ ສປປ ລາວ ພ້ອມດ້ວຍພະນັກງານວິຊາການຂອງທັງ 3 ພາກສ່ວນເຂົ້າຮ່ວມເປັນສັກຂີພິຍານ.

ທ່ານ ຈ໋ອງ – ເບີນາລ໌ ຄາຣາສ໌ໂກ ກ່າວວ່າ: ລັດຖະບານອົດສະຕຣາລີ ມີຄວາມຍິນດີທີ່ໄດ້ເຮັດວຽກກັບລັດຖະບານ ແຫ່ງ ສປປ ລາວ ແລະ ທະນາຄານໂລກ ເພື່ອປັບປຸງ ຄວາມສະດວກໃນການດຳເນີນທຸລະກິດການຄ້າ ແລະ ຄວາມສາມາດໃນການແຂ່ງຂັນຂັນຂອງບັນດາຫົວໜ່ວຍທຸລະກິດໃນລາວ ການຊ່ວຍເຫຼືອລ້າມູນຄ່າ 4,5 ລ້ານໂດລາອົດສະຕຣາລີ ຂອງພວກເຮົາຕໍ່ໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າໃນລາວ ຄັ້ງນີ້ຈະຊ່ວຍໃຫ້ພັດທະນາທຸລະກິດພາກເອກະຊົນເຊື່ອມໂຍງເສດຖະກິດເຂົ້າສູ່ພາກພື້ນ ແລະ ສາກົນ, ພ້ອມທັງຈັດຕັ້ງປະຕິບັດຕາມກົດລະບຽບສາກົນທີ່ສົ່ງເສີມສະຖຽນລະພາບ ແລະ ຄວາມຈະເລີນຮຸ່ງເຮືອງໃນພາກພື້ນຂອງພວກເຮົາ. ນອກຈາກນີ້, ພວກເຮົາຍັງມີຄວາມພາກພູມໃຈຕໍ່ການຊ່ວຍເຫຼືອໄລຍະຍາວໃຫ້ແກ່ການອຳນວຍຄວາມສະດວກທາງດ້ານການຄ້າ, ການພັດທະນາພາກເອກະຊົນ ແລະ ການປະຕິຮູບພາກເສດຖະກິດໃນໄລຍະໜຶ່ງທົດສະວັດຜ່ານມາ ໂດຍຜ່ານໂຄງການພັດທະນາດ້ານການຄ້າ ໄລຍະ 1 ແລະ 2 ເຊິ່ງພວກເຮົາໄດ້ໃຫ້ທຶນຊ່ວຍເຫຼືອຫຼາຍກວ່າ 12 ລ້ານໂດລາອົດສະຕຣາລີ ເພື່ອສະໜັບສະໜູນວຽກງານການອຳນວຍຄວາມສະດວກດ້ານການຄ້າ ແລະ ການພັດທະນາພາກເອກະຊົນໃນ ສປປ ລາວ.

ທ່ານ ນິໂກລາ ພົນທາຣາ ກ່າວວ່າ: ການສ້າງຄວາມເຂັ້ມແຂງໃຫ້ພາກເອກະຊົນໃນ ສປປ ລາວ ເປັນບຸລິມະສິດທີ່ສຳຄັນຂອງການພັດທະນາ ເພາະເປັນຂະແໜງການທີ່ສາມາດສ້າງວຽກເຮັດງານທຳ ແລະ ເຮັດໃຫ້ເສດຖະກິດເຕີບໃຫຍ່ຢ່າງຮອບດ້ານ ເຊິ່ງໂຄງການນີ້ມີຈຸດປະສົງເພື່ອຮັບປະກັນວ່າບັນຫາຫົວໜ່ວຍທຸລະກິດໂດຍສະເພາະທຸລະກິດຂະໜາດນ້ອຍ, ທຸລະກິດທີ່ບໍລິຫານໂດຍແມ່ຍິງ ແລະ ບັນດາທຸລະກິດທີ່ນອກສູນກາງເສດຖະກິດຫຼັກ ສາມາດໄດ້ຮັບຜົນປະໂຫຍດຈາກການປະຕິຮູບຂອງພາກລັດ ແລະ ພວກເຮົາມີຄວາມຍິນດີສືບຕໍ່ການຮ່ວມມື.

ທ່ານ ນາງ ເຂັມມະນີ ພົນເສນາ ກ່າວວ່າ: ລັດຖະບານອົດສະຕຣາລີ ແມ່ນໜຶ່ງໃນຄູ່ຮ່ວມພັດທະນາຫຼັກທີ່ໃຫ້ການສະໜັບສະໜູນ ສປປ ລາວ ໃນໄລຍະຫຼາຍທົດສະວັດຜ່ານມາ ເຊິ່ງທຶນຊ່ວຍເຫຼືອການພັດທະນາຈາກອົດສະຕຣາລີ ໄດ້ປະກອບສ່ວນອັນສຳຄັນໃນຂະແໜງສຶກສາ, ການພັດທະນາເຂດຊົນນະບົດ ແລະ ການປັບປຸງການຄ້າ ໂດຍສະເພາະແມ່ນທຶນຊ່ວຍເຫຼືອລ້າທີ່ລັດຖະບານອົດສະຕຣາລີ ໄດ້ມອບເຂົ້າໃນບ້ວງທຶນຊ່ວຍເຫຼືອລ້າຫຼາຍຝ່າຍທີ່ຫ້ອງການທະນາຄານໂລກເປັນຜູ້ບໍລິຫານ ເຊິ່ງເປັນການສະໜັບສະໜູນຄວາມພະຍາຍາມຂອງລັດຖະບານ ສປປ ລາວ ໃນການເຊື່ອມໂຍງລະບົບການຄ້າເຂົ້າສູ່ພາກພື້ນ ແລະ ສາກົນ, ທັງເປັນການປັບປຸງຄວາມສາມາດໃນການແຂ່ງຂັນ ເພື່ອສົ່ງອອກຂອງຂະແໜງການທີ່ບໍ່ແມ່ນຊັບພະຍາກອນທຳມະຊາດນຳອີກ.

ທັງນີ້, ເນື່ອງຈາກໄດ້ຮັບທຶນສະໜັບສະໜູນຈາກທະນາຄານໂລກ, ອົດສະຕຣາລີ ແລະ ອຽກລັງ ພວກຂ້າພະເຈົ້າຈະໄດ້ຈັດກອງປະຊຸມເປີດໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າ ຂອງ ສປປ ລາວ ເຊິ່ງມີເປົ້າໝາຍປັບປຸງສະພາບແວດລ້ອມໃນການດຳເນີນທຸລະກິດໃຫ້ພາກເອກະຊົນໄດ້ເຕີບໃຫຍ່ຂະຫຍາຍຕົວຂຶ້ນນັບມື້. ສະນັ້ນ, ຂ້າພະເຈົ້າໃນນາມຕາງໜ້າໃຫ້ລັດຖະບານ ສປປ ລາວ ຂໍສະແດງຄວາມຂອບໃຈເປັນຢ່າງສູງມາຍັງລັດຖະບານ ແລະ ປະຊາຊົນອົດສະຕຣາລີ ທີ່ໄດ້ໃຫ້ການສະໜັບສະໜູນເພື່ອພັດທະນາ ສປປ ລາວ ໃນໄລຍະຜ່ານມາຮອດປັດຈຸບັນ ແລະ ພວກຂ້າພະເຈົ້າພ້ອມແລ້ວທີ່ຈະເຂົ້າຮ່ວມເຮັດວຽກກັບທີມງານອົດສະຕຣາລີ ເພື່ອຈັດຕັ້ງປະຕິບັດບຸລິມະສິດຂອງການພັດທະນາພິເສດໃນຂົງເຂດການຄ້າ ແລະ ການລົງທຶນໃນຊຸມປີຕໍ່ໜ້າ.

 

ແຫຼ່ງຂ່າວ: ເສດຖະກິດ-ການຄ້າ

 

Leave a Reply

Your email address will not be published. Required fields are marked *

Facebook